سەرکردەیەکێ رەوتا حیکمە: ب تنێ 1.5 تریلیۆن دینار د گەنجینەیا وەزارەتا دارایی دا ماینە
سەرکردەیەکێ رەوتا حیکمە، راگەهاند وەزارەتا دارایی یا ئیراقێ د رەوشەکا ب زەحمەت دایە و ب تنێ نێزیکی 1.5 تریلیۆن دینار د یەدەگێ وێ دا ماینە.
ئەڤ هوشدارییا فەدعەمی د دەمەکی دایە کو ئیراق ژبەر راوەستیانا هنارتنا پەترۆلێ و ئالۆزییێن هەرێمی، تووشی قەیرانەکا دارایی یا مەزن بوویە و حکومەت ب زەحمەت دشێت پارەیێ پێدڤی بۆ مووچەیان کۆم بکەت.
ئەڤرۆ رۆژا پێنجشەمبی، 5ێ خزیرانا 2026ێ، حەسەن فەدعەم، سەرکردە د رەوتا حیکمە دا، د هەڤپەیڤینەکا تەلەڤزیۆنی دا دیار کر کو وەزیرێ دارایی وەزارەتەک وەرگرتییە کو یەدەگێ وێ گەلەک کێمە. فەدعەمی تەکەز کر کو پێدڤییە وەزارەتا دارایی رێکارێن بلەز بگریتە بەر دا کو پشتراستییێ بدەتە فەرمانبەران کو مووچەیێن وان بێی گیرۆبوون دێ هێنە بەلاڤکرن.
فەدعەمی هەروەسا ل دۆر قەیرانا سوتەمەنییێ ژی، ئاشکرا کر کو د وەرزێ هاڤینێ دا رۆژانە ئیراق پێدڤی ب 47 ملیۆن لیترێن بەنزینێ یە، لێ راوەستاندنا هاوردەکرنا بەنزینێ ژ لایێ حکومەتا سوودانی ڤە و چووننا کۆمپانییا ژاپۆنی، ئەڤ قەیرانە پتر مەزن کرییە.
فەدعەمی هەروەسا ئاماژە ب هندەک مەلەفێن سیاسی و ئەمنی ژی کر و ئاشکراکر پڕکرنا وەزارەتێن ڤالا ژبەر ناکۆکییان دێ گیرۆ بیت.
هەروەسا ل دۆر چەکێ گرۆپێن چەکدار ژی، دیار کر چار گرۆپان بەرهەڤییا خۆ بۆ رادەستکرنا چەکی نیشان دایە. ل دویماهییا ئاخفتنێن خۆ دا، فەدعەمی جەخت ل سەر وێ یەکێ کر کو پێدڤییە چەکێ پێشمەرگەی ژی ل ژێر فەرمانا حکومەتا فیدرال بیت.
د سالا 2026ێ دا قەیرانا دارایی و یا سوتەمەنییێ ل ئیراقێ گەهشتییە ئاستەکێ مەترسیدار، ب تایبەت پشتی کو ئیراقێ ل مەها ئادارا ئەڤسالە ژبەر داخستنا دەرتەنگا هورمز رەوشا “هێزا قاهیرە” ل سەر پەترۆلگەهان راگەهاندی. ئەڤ چەندە بوویە ئەگەرێ هندێ کو داهاتێ پەترۆلێ یێ کو پتر ژ 90%ێ یا بودجەیێ پێکدهینیت، ب رەنگەکێ بەرچاڤ کێم ببیت.
