درزەکا نویی یا ئەمریکی!

تۆم براک، هنارتیێ سەرۆکێ ئەمریکا بۆ عێراقێ، پێشنیازەکا نوو ئینا پێش کو دەرگەهێ قەیرانەکا نیشتمانی د ناڤبەرا عەرەب و کوردان دا ڤەدکەت، و وەڵاتی دزڤڕینیتەڤە بۆ کەشوهەوایێ بەری سالا 2003ێ. ل دویف تشتێ دهێتە بەلاڤکرن، براک داخوازا هەڵوەشاندنا هێزێن پێشمەرگەی و تێکەڵکرنا وان د ناڤ هێزێن ئەمنی یێن حکومی دا دکەت، هەروەک چەوا هاتیە کرن دگەل گروپێن چەکدار. ئەڤ پێنگاڤە ژی رەنگە وەک بەرهەڤیەک بهێتە تێگەهشتن بۆ ب دوماهی ئینانا تایبەتمەندیا هەرێما کوردستانێ و زڤڕین بۆ مۆدێلا دەوڵەتا ناوەندی (مەرکەزی)، هاوشێوەی وێ یا کو هندەک دەوڵەتێن دەڤەرێ تێدا دژین.

دیارە کو تۆم براک ب دروستی ل سەر دیرۆکا خەباتا گەلێ کورد د چەرخێ دەربازبوویی دا نەخواندیە، و نزانیت کا هێزێن پێشمەرگەی چ پێگەهـ و جهان د هۆشیاریا نیشتمانی و نەتەوەیی یا کوردی دا دگرن. یا فەر ئەو بوو کو ناڤهاتی پێداچوونەکێ د دەستوورێ عێراقێ دا بکەت، و ل سروشتێ جیۆپۆلیتیکی یێ ئاڵۆز یێ عێراقێ و دەڤەرێ بگەهیت، بەری هندێ هزرێن هۆسا بینیتە پێش کو دەستکاریێ د هاوسەنگیێن هەستیار دا دکەن، ئەو هاوسەنگیێن کو ل سەرانسەرێ دەهسەلانێن درێژ ژ شەڕ و ڕێککەفتنان پێکهاتینە.

مافێ گەلان د دیارکرنا چارەنڤیسێ خۆ دا ناهێتە پشتگوھ خستن یان بازدان ب سەر دا، چ ژ لایێ هنارتیەکێ نێودەوڵەتی یێ نوو هاتبیتە د ناڤ گۆڕەپانا عێراقێ دا، یان ژ لایێ دەوڵەتێن جیران ڤە بیت، ئەوێن کو هەبوونا هەرێمەکا فیدراڵ یا کوردی د ناڤ عێراقێ دا وان بێزار دکەت. راستیێن دیرۆک و جوگرافیایێ، قوربانیدانێن خوینێ، و ئەو روحا د ناڤ چیاین کوردستانێ دا دژیت، گەلەک مەزنترن ژ هندێ کو بهێنە کورتکرن د حەزا هنارتیەکێ یان پرۆژەیەکێ سیاسی یێ دەمکی دا. ئەوا د ویژدانێ گەلان دا جێگیر بووی، ناهێتە دووبارە نەخشاندن ب بڕیارەکا کارگێڕی یان دیتنەکا دەرەکی، گرنگ نینە کا چ لایەن ل پشت بیت.

چنکو ڕاستیێن دیرۆک و جوگرافیایێ، و ئەو ڕووبارێن خوینا شەهیدان یێن بۆ ڤێ خاکێ ڕشتین، دگەل وێ روحا پۆڵایینا د ناڤ چیاین کوردستانێ دا دژیت، گەلەک مەزنتر و ب هێزترن ژ هندێ کو ب حەزا هنارتیەکێ عابر یان پرۆژەیەکێ سیاسی یێ دەمکی بهێنە بەرزەکرن! ئەوا ب خوینێ د ناڤ قۆلاچێن ویژدانا گەلێ مە دا هاتیە نەخشاندن، ب بڕیارەکا سەرکاغەزێ یان ب دەستێ چ هێزێن دەرەکی ناهێتە ژێبرن، پێشمەرگە ژی دێ هەر وەک چیایێن کوردستانێ یێ ئاوا و سەرپێ مینیت.

بێریڤان خضر