دەمێ دلەتەنگی یا هەلبەستڤانێ مەزن ئەحمەدێ نالبەند گەھشیتە گۆپیتکێ
نالبەند ب ژار و ژیری ژیا، گەلەک دەردێ نەداریێ کێشا، سێ ھەڤژین د ژیانا خۆدا ڤەشارتن.
مرادا وی کوڕەک بوو، کو ناڤێ وی ل پاش وی ھەلگریت، لێ ڕحا ئێکانێ وی ژی ل پێش چاڤێن وی بلند فڕی.
نالبەند وەکی ھەردەم ئازار و خەمێن ژیانێ دکرنە ھێڤێنێ هەلبەستێن خۆ، د ڤێ ھەلبەستێ ژی دا ب زمانەکێ سادە، پەیڤان دکەتە خودیکا برینەکا کوور، کو چ جاران کەسەرێن وێ تەنا نابن.
ئەو وەکی بابەکێ دلشکەستی، ھناڤ سۆتی و ھەڕفتی، هەست و سوزێن خۆ دڕێژیتە سەر پەڕێن کاغەزێ.
ئەو مرنا کوڕێ خۆ وەک ئاگرەکێ کەل ب برینێت دلێ خۆ ڤە دبینیت.
د ڤان دێڕان دا، نالبەندێ ئازارکێش، ژ بێدەسھەڵاتییا خۆ، بەرامبەر قەدەرێ و ڕادەستبوونێ ب فەرمانا خودێ دیار دکەت؛ ب تایبەت دەمێ زمانێ کوردی و عەرەبی بکاربینیت دا کو مەزناتییا ڤێ دەردێ پڕ ب ئازار بکۆژیت.
تشێ بالکێش ئەوە، کو ئەڤ ھەلبەستا ژ ھناڤێن سۆتی یێن نالبەندی دەرکەتی، د دیوانا وی یا ب ناڤێ ( باغێ کوردا) دا ب چاڤ من نەکەتیە، لێ مامۆستایێ مەزن ( سادق بەھەئەدین) ئامێدی، ئەڤ ھەلبەستا نازک، د ناڤ لاپەڕێن (ھۆزانڤانێن کورد) دا ھمبێزکریە و پاراستیە. سڵاڤ ل گۆڕا ھەردوو زانایێن مەزنێن بەھدینان (ئەحمەدێ نالبەند) و (سادق بەھائەدین)ێ ئامێدی بن.
ھەلبەست:
ئاگرێ بەردایە من مرنا کوڕی
مات ابنی بان غبنی
طار تبنی فی الهواء
انه داء عظیم ربنا انت الدواء .
سەد جار شوکر
الله چ کر
بەرخێ من بر .
مر کوڕێ من
سوت دلی من
شکسەت ملێ من
ژ بەر کوڕی .
چو ڕوحا من
وەی بەلا من
کوڕ مری .
کوڕ کولیلەک بوو
تەڕ و شین بوو
باکێ دوین بوو
ل سەر دلی .
چاڤێ تاری
شین و زاری
دین و ھاری ئەولی.
مەست و دین
سەد برین
کەتنە دلی .
یا خودێ من
تو ڕحا من
پاش کوڕێ من وەرگری.
یان بو سەبری
تو مودەبری
خوشکە قەبرێ ڤی کوڕی.
یا ئیلاھی
هو ب ساناهی
ب خێر و شاهی
کوڕ ڤەشاررت .
ل ناڤ مەزاری
ل کەڤنەواری
ئەڤ لەشێ نازک ڤەشارت .
