دەما لەش دبیتە پیڤەر بۆ بدەستڤەئینانا کاری…!
نورا جعفر شیمؤ
د جڤاکێن پێشکەفتی دا زانست و شیان و بروانامە پیڤەرێن سەرەکی نە بۆ بدەستڤەئینانا کاری ، بەلێ ل هەرێما کوردستانێ دیاردەیەکا نەجوان سەر هەلدایە ئەو ژی بکارئینانا لەش و جوانیێ یە وەک کەرەستەک بۆ ب دەستڤەئینانا دەرفەتێن کاری کو ڤێ چەندێ جڤاکێ تووشی ئاریشەیەکا مەزن کری ، ئەڤ دیاردەیە نەک بتنێ سەنگا زانست و خاندنێ کێم دکەت بەلکو کاریگەرییا وێ یا نەرێنی ل سەر هەمی ئافرەتان دکەڤیت .
جڤاکێ مە ژ بەر سروشتێ خۆ یێ عەشایری کێم جارا جوداهیێ دێخیتە د ناڤبەرا ئازادییا تاکی و کریارا نەرێنی دا ، لەورا دەما هندەک ئافرەت بۆ بدەستڤەئینانا پلە و کارێن مەزن قوربانیێ ب لەشێ خۆ ددەن د ئەنجامدا جڤاک ب کۆم بڕیارێ ددەت ئانکۆ جڤاک « تەر و هشکان » پێکڤە دسوژیت ، ئەڤە ژی دبیتە ئەگەر کو ناڤ و دەنگێ هەمی ئافرەتێن بزاڤکەر و خۆدان شیان بکەڤیتە ژێر گۆمانێ و وێنەیێ ئافرەتا کارکەر تێکبچێت .
ژ لایەکێ دیژیڤە ئەڤ کریارە خەون و هیڤییێن سەدان ئافرەتێن خۆدان بروانامە و پێگەهشتی ژناڤ دبەت گەلەک ژ کچێن مە ساڵێن تەمەنێ خۆ د خاندنێ و ماندیبوونێ دا دەرباز دکەن دا کو ب شیانێن خۆ بگەهنە ئارمانجێن خۆ ، بەلێ دەما دبینن جهێن وان ب ڕێکەکا نە جوان و نەدادپەروەرانە ژ لایێ کەسێن بێ شیان ڤە دهێنە داگیرکرن تووشی بێ هیڤیەکا مەزن دبن .
گەر ل مێژوویا جڤاکێ خۆ یێ کوردی بزڤرین گەلەک وێنەیێن شانازیێ یێن ئافرەتێن مە یێن سەردەمێن بەرێ دەردکەڤن ئەو ئافرەتێن کو ب هزر و ئازایەتی و مۆڕالا خۆ سەرکردایەتییا جڤاکی یا کری نەک ب کریارێن کێم بها و قوربانییدان ب رێزا خۆ .
گەلەک ژ نمونێن ئافرەتێن مە ب ژیری و مێرخاسی و سەنگا خۆ یا جڤاکی ناڤدار بوون و کاریگەری ل سەر بڕیارێن مەزن یێن سیاسی و جڤاکی کرینە ، وان نیشان دا کو ئافرەتا کورد دشێت ببیتە ئەندازیارا جڤاکی و خۆدان پێگەهەکێ بڵند بێی هندێ کو بازرگانیێ ب شکۆیا خۆ بکەت .
بەراوردکرنا وێ مێژوویا تژی ژ شانازی دگەل هەلویستێن هەڤچەرخ وێ ڕاستیا تاڵ دیار دکەت شکۆیا ئافرەتێ ل سەر بنیاتێ ژیری و ڕەوشتێ وێ دهێتە ئاڤاکرن نە ل سەر کەرەستەکرنا لەشێ وێ .
ل دوماهیێ دبێژم رزگاربوون ژ ڤێ ئاریشێ پێدڤی ب هوشیارییا جڤاکی هەیە و سەپاندنا یاسایێن تۆند ل سەر سەرمایەدار و خودان کاران ، پێدڤییە شیان و مۆڕال ببەنە تاکە سنور و پیڤەر بۆ وەرگرتنا کاری دا کو مافێ چ ئافرەتەکا ماندیبوی نەهێتە خوارن …
