ڕەمەزان: قوتابخانەیا گوهۆرینێ و نووکرنا ژیانێ

نڤیسین: (سەیاف مازی)
هەیڤا رەمەزانێ تنێ هەلکەفتەکا ئایینی یا سالانە نینە، بەلکو وێستگەهەکا گرنگا مرۆڤایەتیێ و دەروونییە، کو تێدا مرۆڤ خۆ ژ نوو دبینیتەڤە. ئەڤ هەیڤە وەک “قوتابخانەیەکێ” دهێتە هەژمارتن بۆ پەروەردەکرنا نەفسێ و رێکخستنا ژیانا رۆژانە ب شێوەیەکێ کو مفای ب گشتی بگەهینیتە تاک و جڤاکی.
١. رەمەزان و ئارامیا دەروونی
د ڤێ هەیڤێ دا، مرۆڤ فێری “سەبرێ” دبیت. دوویرکەفتن ژ خوارن و ڤەخوارنێ ژ سپێدێ تا ئێڤاری، مەشقەکا بهێزە بۆ کۆنترۆڵکرنا ئارەزوویان. ئەڤ چەندە دبیتە ئەگەرێ پەیدابوونا ئاشتیەکا ناخی و کێمکرنا تورەبوونێ، کو ئەڤرۆ جڤاکێ مە پتر ژ هەر دەمەکێ پێدڤی پێ هەیە.
٢. بهێزکرنا پەیوەندیێن جڤاکی
رەمەزان هەیڤا کۆمبوونێ یە. ل سەر سفرەکێ کۆمبوونا خێزانێ و جیرانان، و گوهۆڕینا خارنێن “قاپەکی” د ناڤبەرا مالان دا، ئەو سۆز و خزمایەتییا کو د ناڤ مژوولیا ژیانێ دا لاواز بووی، دووبارە دژینیتەڤە. هەروەسا هەستکرن ب ئازارێن برچیان و هەژاران، روحا هەڤکاریێ و دەستگرتنیێ د ناڤ خەلکی دا زێدە دکەت.
٣. رەمەزان وەک دەرفەتەکا تەندروستی
ژ لایێ زانستی ڤە، رووژیگرتن پشێوییەکا مەزن ددەتە سیستەمێ هەرسکرنێ و هاریکاریا لەشی دکەت بۆ پاقژکرنا ژەهرێن کۆمبووی . ئەگەر مرۆڤ رێنمایێن ساخلەم یێن خارنێ پەیڕەو بکەت، رەمەزان دبیتە باشترین دەم بۆ رێکخستنا کێشا لەشی و دوویرکەفتن ژ عاداتێن خراب یێن خارنێ.
٤. پەیاما رەمەزانێ بۆ مە چییە؟
ئارمانجا سەرەکی ژ رەمەزانێ ئەوە کو ئەڤ گوهۆرینە تنێ بۆ ٣٠ رۆژان نەمینن. ئەڤ هەیڤە هاتیە دا کو مە فێری دیسپلینێ بکەت؛ چەوا زمانێ خۆ بپارێزین، چەوا دەمێ خۆ رێکبخەین، و چەوا ببینە مرۆڤەکێ ب مفا بۆ دەوروبەرێن خۆ.
دەرئەنجام:
بلا رەمەزانا ئەڤسالە تنێ ب رووژیبوونەکا جەستەیی نەبیت، بەلکو بلا ببیتە دەسپێکا ژیانەکا نوو، کو تێدا رەوشت، زانست و مرۆڤایەتی د ئێک چوارچۆڤە دا کۆم ببن