ئیران چ ژ هەرێما کوردستانێ دڤێت؟

زەنون سلێڤانەی ـ زاخو

پەیوەندیێن هەرێما کوردستانێ و کۆمارا ئیسلامی یا ئیرانێ پەیوەندیێن ئالۆز، هەمەجۆر و د هەمان دەم دا تژی گۆهۆڕینن. وەک جیرانەکێ ب هێز و کارتێکر، ئیران ژ هەرێمێ دڤێت هەڤکێشەیێن سیاسی و ئەمنی یێن خۆ ل سەر عێراقێ و دەڤەرێ ب پارێزیت.
دێ ل ڤێرێ ب خاڵان دیار کەین کا ئیران ل هەرێمێ چی دڤێت ٫
ئارامی و ئەمنیت (لێگەریان ل دویڤ دژبەرێن خۆ)
ئارمانجا هەرە سەرەکی یا ئیرانێ ل هەرێمێ ئەەمنیەتە ئیران گەلەک یا ب ترسە ژ وێ چەندێ کو ئۆپۆزسیۆنێن وێ یێن کورد (وەک حدکا و پارتێن دی) هەرێمێ وەکو بنکەیەکێ بۆ چالاکیێن سەربازی یان سیاسی دژی ئیرانێ بکار بینن. لەورا هەرێم دڤێت د هەموو حالەکی دا کۆنترۆڵا سنووران بکەت و نەهێلیت چ کارتێکرنەک ژ ئاخا هەرێمێ ڤە بگەهیتە ئاسایشا ناڤخۆیا ئیرانێ. لاوازکرنا نفووزا ئەمریکا و ئیسرائیلێ
ئیران هەرێمێ ب بەشەک ژ بەرەیا پێشڤەبرنا ئارمانجێن ئەمریکا و ئیسرائیلێ ل دەڤەرێ دبینیت. ژ بەر ڤێ چەندێ، ئیران هەردەم دڤێت کارتێکرنا خۆ ل سەر بڕیارێن سیاسی یێن هەرێمێ هەبیت، دا کو هەرێم نەبیتە جهەکێ بۆ دژایەتیکرنا ئیرانێ ژ ئالیێ هێزێن بیانڤی ڤە.
ئابووری و بازرگانی
ئیران دڤێت بازارێ هەرێما کوردستانێ بۆ کەلوپەلێن خۆ ب پارێزیت. ژ بەر دەرەنجامێن سزایێن ئابووری یێن ل سەر ئیرانێ، هەرێم بۆ ئیرانێ دەرگەهەکێ گرنگێ ئابووری یە بۆ هندەکرنا کەلوپەلان و پەیداکرنا دراڤێ بیانی. ئیران دڤێت پەیوەندیێن بازرگانی دگەل هەرێمێ د ئاستەکێ بلند دا بمینیت.. کارتێکرنا سیاسی ل سەر بەغدا
ئیران هەرێمێ وەک ئامرازەکێ دبینیت کو دگەل بەغدا بکار بینیت. گەلەک جاران ئیران ب رێیا هەرێمێ یان دژایەتیکرنا هندەک بڕیارێن هەرێمێ، دڤێت فشارێ ل حکومەتا فیدرالی یا عێراقێ بکەت دا کو سیاسەتێن ئیرانێ پێش بێخیت،
ب کورتی، ئیران ژ هەرێمێ دڤێت کو جیرانەکێ بێ دەنگ، ئارام و دوور ژ سیاسەتێن دژی ئیرانێ” بیت. لێ د هەمان دەم دا، هەرێما کوردستانێ دڤێت د ناڤبەرا فشارێن ئیرانێ و بەرژەوەندیێن خۆ یێن نیشتیمانی و دۆستینیێن خۆ دگەل جیهانێ دا، هاوسەنگیەکێ دروست بکەت، داکو سەروەرییا خۆ ب پارێزیت. ؛