١٨ى شوباتێ: قوتابخانەیا پێگەیاندنا سەرکردە و ڕێڕەوا خەباتا زانستێ
نڤیسین: (سەیاف مازی)
د دیرۆکا بزاڤا ڕزگاریخوازییا گەلێ کوردستانێ دا، هندەک وەرچەرخانێن مێژوویی هەنە کو نە بتنێ ڕەوتێ خەباتێ گوهۆڕی، بەلکو بوونە بنەما بۆ ئاڤاکرنا مرۆڤێ کورد یێ خودان شیان. دامەزراندنا ئێکەتیا قوتابیێن کوردستانێ ل ١٨ی شوباتا سالا ١٩٥٣ێ، ئێک ژ وان وەرچەرخانێن گرنگە کو ب دەستپێشخەریا جەنابێ بارزانیێ نەمر هاتە ئەنجامدان.
سەرهلدانەک ژ ناڤ جەرگێ تەنگاڤیان
د سەردەمەکێ دا کو گەلێ کورد د بن زۆرداری و بێبەشبوونێ دا دژیا، پێدڤی ب رێکخراوەکێ هەبوو کو دەنگێ زانست و نەتەوەیی ب ئێک ڤە گرێ بدەت. ١٨ی شوباتێ بوو ب رووگەها وان لاوێن خودان هزر کو دڤیا ل پاڵ خویندنێ، دۆزا ڕەوا یا گەلێ خۆ ژ بیر نەکەن. ئەڤ ئێکەتیە بوو ب پرەک د ناڤبەرا زانستگەهـ و چەپەرێن بەرگریێ دا.
ئەرک و کارنامەیا ئێکەتیێ
د درێژاهیا تەمەنێ خۆ یێ پڕی سەروەری دا، ئێکەتیا قوتابیان چەندین ئەرکێن پیرۆز یێن کێشایە سەر ملێن خۆ:
- پێگەیاندنا کادران: ئەڤ رێکخراوە بوویە کارگەها پێگەیاندنا سەرکردێن مەزن یێن کو ئەڤرۆ د جومگێن جودا جودا یێن دەستهەلاتێ و جڤاکی دا خزمەتێ دکەن.
- بەرەڤانیکردن ل مافان: هەر دەم د سەنگەرێ پێشێ یێ بەرەڤانیکردنێ دا بوویە ژ مافێن رەوا یێن قوتابیان بێی جوداهی.
- بلندکرنا هوشیاریا نەتەوەیی: چاندنا تەوەرێ هەستێ نەتەوایەتی د دلێ نەوەیێن نوو دا و گرێدانا وان ب ئاخ و ئالایێ کوردستانێ ڤە.
قوتابی و ئالنگاریێن سەردەم
ئەڤرۆ کو ئەم یادا ٧٣ سالیا دامەزراندنا ڤێ ئێکەتیێ دکەین، ئەرکێ قوتابیان گرانتر لێ هاتیە. د سەردەمێ تەکنەلۆژیا و ژیرییا دەستکرد دا، پێدڤیە قوتابیێن مە چەکێ زانستێ ب جۆرەکێ بکاربینن کو بشێن کوردستانێ بەرەڤ ئاسۆیەەکێ گەشت تر ببەن. وەکی چەوا د دوهی دا د چەپەرێن شۆرەشێ دا بوون، ئەڤرۆ ژی دڤێت د ناڤ تاقیگەهـ و هۆلێن خویندنێ دا پێشەنگ بن.
پەیاما دوماهیێ
١٨ی شوباتێ نە بتنێ بیرەوەریا رێکخراوەکێ یە، بەلکو نووکرنەوا پەیمان و وەفاداریێ یە بۆ خوینا شەهیدێن قوتابی و وان تێکۆشەرێن کو تەمەنێ خۆ د ڤێ ڕێبازێ دا ب سەر برین. پیرۆز بیت ئەڤ یادا مەزن و بژیت کورد و کوردستان.
