بادینان؛ ئاخەکا پڕ پیت و بەرەکەت

نڤێسین: محەمەد هەسنانی

ژ سنوورێ قەزا هەریر هەتا دگەهیتە قەزا ئاکرێ، ب دووریا دەیان کیلۆمەترا، ئاخەکا بەرهەمدار، زەڤییەکا پڕ بەر و ژێدەرێن دەریاچە و ئاڤەکا دەولەمەند بەرچاڤ دبن. ئەڤ سروشتێ دەولەمەند ئانکو ئاخا زەنگینا دەڤەرا بادینان، ساڵانە هەزاران تەنێن بەرهەمێ جۆراوجۆر یێ کشتوکاڵی پێشکێشی بازاڕی دکەت، کو نە تەنێ پێداویستییێن هەرێما کوردستانێ، بەلکۆ دەڤەرێن دی یێن عێراقێ ژی دابین دکەت.

هەبوونا ئەڤان بەرهەمێن ناڤخۆیی، زێدەباری دابینکرنا بەشەکێ مەزن ژ پێداویستییێن خۆراکی یێن هەرێمێ، ل هەمان دەمدا بوویە ئۆگەرا پەیداکرنا هەزاران دەرفەتێن کاری و ژێدەرەکێ سەرەکی یێ ژیار و بژێڤیا سەدان جووتیار و خاوەنکار و کێلبەندا ل ناوچەیێ.

ژ بۆ پاراستن و گەشەپێدانا ئەڤی سێکتەرێ گرنگ، فەرە حکومەتا هەرێما کوردستانێ و وەزارەتا کشتوکاڵ و ژێدەرێن ئاڤێ ب پڕانی ب پەی داواکارییێن جووتیارێن ئەڤێ دەڤەرێ ڤە بێن.

ئەڤە ژی ب ڕێکا:
دابینکرنا پێداویستی و کەرەستەیێن باشتر یێن کشتوکاڵی.
چێکرن و نۆژەنکرنا ڕێکوبانێن گوندان و دەڤەرێن کشتوکاڵی.
ئاڤاکرنا کارگەهێن پێشەسازییا کشتوکاڵی و کۆگەهێن سارکەر (ساردکەرەوە) ل دەڤەرێ، دا کو بەرهەمێ جووتیاران ژ فەوتیانێ بهێتە پاراستن و ب ڕەنگەکێ شایستە بهێتە ساخکرن و فرۆشتن.

پشتبەستن ل سەر بەرهەمێ ناڤخۆیی، بنەمایێ سەرەکی یێ گەشەپێدانا ئابووریا هەر وەلاتەکی یە. ب هێزکرنا کەرتی کشتوکاڵی ل جهێن بگونجین و کەلتووری یێن وەک دەڤەرا بادینان، هەرێما کوردستانێ ژ بەستنەڤە ب بەرهەمێن هاوردەکری یێن دەرڤە ڕزگار دکەت و بنگەهەکێ قایم ژ بۆ ئابووریەکا سەربەخۆ و بەردەوام دادەمەزرینێت.

هەروەكی دەڤەرا بادینان نەک تەنێ ژێدەرەکێ مەزن ئانکو کانیا بەرهەمێ کشتوکاڵی یە، بەلکۆ ستوونەکا سەرەکی یا ئاسایشا خۆراکی یا تەڤایا هەرێما کوردستانێ یە. پشتەڤانیکرنا جووتیارێن ئەڤێ دەڤەرێ و وەبەرهێنان ل کەرتی کشتوکاڵی، پێنگاڤەکا فەرە ژ بۆ ئاڤاکرنا ئابووریەکا سەربەخۆ و خۆڕاگر ل هەمبەری گۆڕانکارییان.