تەمی ئاڵۆزییەکان و تیشکی دیپلۆماسی نێچیرڤان بارزانی لە دڵی بڕیاری جیهانیدا
لوقمان عوسمان گه ڵاڵی
لە کاتێکدا جیهان لە نێوان شەپۆلە توندەکانی سیاسەت و ئاڵۆزییە ئەمنییەکاندا وێڵە بەدوای کەنارێکی ئارامدا جارێکی دیکە هەولێر دەبێتەوە بە سەنتەری هاوکێشە نێودەوڵەتییەکان و ئەندازیاری دیپلۆماسیی کورد بەرەو میونشن ڕێڕەو دەگرێت. ئێوارەی ئەمڕۆ پێنجشەممە نێچیرڤان بارزانی سەرۆکی هەرێمی کوردستان بە شکۆیەکی سیاسییەوە و بە بانگهێشتێکی فەرمی گەیشتە خاکێک کە تێیدا بڕیارە چارەنووسسازەکانی ئاسایشی جیهان دەدرێن.
میونشن سەکۆیەک بۆ دەنگی گەلێکی زیندوو :
کۆنفرانسی ئاسایشی میونشن تەنها کۆبوونەوەیەکی ئاسایی نییە بەڵکو گۆڕەپانی زلهێزەکانە بۆ کێشانی نەخشەی نوێی جیهان. لەم ناوەندەدا ئامادەبوونی نێچیرڤان بارزانی وەک سەرکردەیەکی لێهاتوو و خاوەن دیدگایەکی قووڵ پەیامێکی ڕوون دەگەیەنێت کە کوردستان نەک تەنها بەشێکە لە چارەسەری کێشەکان بەڵکو کاراکتەرێکی سەرەکی و کاریگەرە لە پاراستنی سەقامگیریی ناوچەکەدا.
دیدار لە لوتکەدا و پاراستنی بەرژەوەندییەکان :
سەرۆکی هەرێم لەم گەشتەیدا کۆڵەکەیەک دەبێت بۆ گەیاندنی دەنگی گەلی کوردستان و تاوتوێکردنی ئاڵۆزییەکانی عێراق و ناوچەکە. ئەو بە لێهاتووییە ناسراوەکەی خۆی لەگەڵ سەرکردە و بڕیارەبەدەستانی جیهان دادەنیشێت تا بیسەلمێنێت کە ئاشتی و ئاسایش بەبێ لەبەرچاوگرتنی پێگەی هەرێمی کوردستان مەحاڵە. ئەم جووڵە دیپلۆماسییە باڵایە جارێکی دیکە نیشانی دەدات کە نێچیرڤان بارزانی چۆن دەتوانێت لەناو قەیرانەکاندا دەرگای نوێ بۆ داهاتوویەکی گەشتر بکاتەوە و دۆزی ڕەوای گەلەکەی لە لووتکەی ناوەندە نێودەوڵەتییەکاندا بچەسپێنێت.
