پەیاما نێچیرڤان بارزانی ب هەلکەفتا 65 ساڵیا شۆڕشا ئەیلولێ
ب هەلکەفتا ٦٥ەمین ساڵیادا هەڵگیرسانا شۆڕشا ئەیلولا مەزن، نێچیرڤان بارزانی پەیامەک بەلاڤکر و تێدا ڕاگەهاند، شۆڕشا ئەیلولێ دایکا شۆڕشێن کوردستانێ بوو، هەروەسا جەخت ل سەر گیانێ تەبایی و هەڤکارییا د ناڤبەرا هەمی لایەنان دا کر.
دەقێ پەیاما نێچیرڤان بارزانی:
ئەڤرۆ د یادا شێست و پێنج ساڵیا شۆڕشا مەزنا ئەیلولێ دا، ب بلندترین ڕێز و شکۆڤە یادا سەرکردەیێ شۆڕشێ و بزاڤا ڕزگاریخوازا گەلێ کوردستانێ، بارزانییێ نەمر و هەمی تێکۆشەرێن دڵسۆز و پێشمەرگەیێن قارەمان دکەین کو هێز و بازۆ و خەباتکەرێن شۆڕشێ بوون.
دروود بۆ گیانێ پاکێ شەهیدێن شۆڕشێ و سڵاڤ و پێزانین بۆ بنەماڵ و کەسۆکارێن وان یێن سەربەرز. سڵاڤ بۆ هەمی وان پێشمەرگە و خەباتکارێن دێرین کو د ژیانێ دا ماینە و هیڤیا تەمەن درێژی و ساخلەمییا باش بۆ وان دکەین.
شۆڕشا مەزنا ئەیلولێ، دایکا شۆڕشێن کوردستانێ، د قۆناغەکا سەخت و دژوار دا کو نکۆڵی ل بوون و مافێن گەلێ کوردستانێ دهاتە کرن، بوو هێڤێنێ هوشیاری و بیر و ناسنامەیا نەتەوەیی و نیشتمانی. شۆڕشێ ب کۆمکرنا هەمی چین و توێژ و پێکهاتێن ئاینی و نەتەوەیی یێن کوردستانێ ل ژێر ئێک چەتر، ئیرادەیەکا پۆڵایین ئاڤاکر و دەنگێ ڕەوایێ ئازادیخوازییا گەلێ کوردستانێ گەهاندە تەواویا جیهانێ و بناغەیێ ئێکەم دانپێدانانا فەرمی و دەستکەفتێن دەستووری یێن پاشتر دانا.
د دەمەکی دا کو ب شانازیڤە ئەڤێ یادا مەزن ساخ دکەینەڤە، جەخت ل سەر بەهایێن بلند یێن شۆڕشێ د ئێکڕیزی، تەبایی، پێکڤەژیان، ئێکترقەبوولکرن و ئاشتیخوازیێ دا دکەین. وەک چەوا سەرکەفتن و مانەوا شۆڕشا ئەیلولێ بەرهەمێ ئێکگرتووییێ بوو، ئەڤرۆ ژی ب تنێ ڕێک بۆ پاراستنا فیدراڵی، قەوارەیا هەرێما کوردستانێ، مافێن دەستووری و دەربازکرنا ئالنگارییان، پێکڤەبوون و پتەوکرنا گیانێ تەبایی و هەڤکارییا د ناڤبەرا هەمی هێز و لایەنێن سیاسی دایە، دا کو بشێین داهاتوویەکێ سەقامگیر و گەشتر بۆ نەڤیێن خۆ مسۆگەر بکەین.
بلند و شکۆدار بیت یادا شۆڕشا مەزنا ئەیلولێ، سڵاڤ و دروود بۆ گیانێ پاکێ شەهیدێن کوردستانێ.
نێچیرڤان بارزانی
2026/9/11
