نێچیرڤان بارزانی: دڤێت مێژوویا پری تاوان و مالوێرانییا ڕابردوو ببیتە پەند و وانەیەكا هەردەمی بوو عیراقێ
نێچیرڤان بارزانی، سەرۆكێ هەرێما كوردستانێ د سالیادا ئەنفالا بادیناندا دیاركر، ئەو دووپاتییێ ل مۆكۆمكرنا تەبایی، ئێكرێزی، پێكڤەژیانا ئاشتییانە و بهێزكرنا هاریكارییا دناڤبەرا هەموو لایەنێن سیاسیدا دكەن، داكو بشێن پاشەرۆژەكا ئارام و سەقامگیر بۆ گەلێ خۆ مسۆگەربكەن.
سەرۆكێ هەرێما كوردستانێ دیاركر، ئەڤرۆ هەلكەڤتا ب ئازار یا 38 سالێن تاوان ئەنفالا بادینان ل بیر دئینن، كو ل 25ێ تەباخێ هەتا 6ی ئەیلولا 1988ێ د دووماهی قۆناغا شالاوێن ئەنفالێدا، ڕژێما وی دەمی یا عیراقێ خەلكێ سڤیل، ئاڤ، ئاخ، هەوا و ژینگەها دەڤەرا بادینان ب چەكێ قەدەغەكری كرە ئارمانج، د ڤێ هەلكەفتێدا ب ڕێزڤە هەموو شەهید و قۆربانییێن ئەنفالا بادینان و هەموو ئەنفالكرییێن كوردستانێ ل بیر دئینن، سەرێ ڕیز و نەوازشێ بەرامبەر گیانێ وان یێ پاقژ دچەمینن.
هەروەسا ئاشكراكر، ئەنفال تاوانەكا مەزن بوو ب دژی مرۆڤایەتییێ كو ژلایێ دادگەها بلندا تاوانێن عیراقێڤە وەكو جینۆساید، تاوانا شەڕی و تاوانا دژی مرۆڤایەتییێ هاتییە نیاسین، لەوما دڤێ هەلكەڤتێدا داخوازا خۆ ژ حكومەتا فیدرال دكەین هەموو كەسوكارێن قۆربانییێن ئەنفالێ و هەموو قۆربانییێن تاوانێن ڕژێما پێشتر ل هەرێما كوردستانێ ژلایێ ماددی و مەعنەویڤە قەرەبوو بكەت.
هەڤدەم دڤێت بزاڤێن وان بۆ ناساندنا ئەنفالێ ل سەر ئاستێ نێڤدەولەتی وەكو جینۆساید د بەردەوامبن.
سەرۆكێ هەرێما كوردستانێ ئاماژە ب هندێ دا، دڤێت مێژوویا پر ژ تاوان و مالوێرانییا ڕابردوو ببیتە پەند و وانەیەكا هەردەمی بۆ عیراقێ داكو ڕێگرییێ ل دووبارەبوونا هەر جۆرە ستەمكاری و بنپێكارییەكێ بكەت و مافێن دەستووری یێن گەلێ كوردستانێ و هەموو پێكهاتەیان د پاراستیبن، دڤی بیاڤیژیدا دووپاتییێ ل مۆكۆمكرنا تەبایی، ئێكرێزی، پێكڤەژیانا ئاشتییانە و بهێزكرنا هاریكارییا دناڤبەرا هەموو لایەنێن سیاسیدا دكەن داكو بشێن پاشەرۆژەكا ئارام و سەقامگیر بۆ گەلێ خۆ مسۆگەر بكەن.
ل دووماهییا پەیاما خۆ، سەرۆكێ هەرێما كوردستانێ دیاركر، سلاڤ بۆ گیانێ پاقژ یێ شەهیدێن ئەنفالا بادینان و تماما شەهیدێن كوردستانێ، هەردەم ب پێزانین و ڕێزڤە هەلویستێ نیشتیمانی و مرۆڤدۆستانە یێ خەلكێ هەولێرێ و دەوروبەرێن وێ ل بیر دئینن كو د ڕۆژێن دژواردا د هەوارا زیانڤێكەڤتییێن بادینان چوو.
