توندوتیژیا دژی ئافرەتان؛ ئافرەت بخو ئەگەرە !
ئەگەر ئەڤرۆ ئەم داخبار بین ب هەبوونا توندوتیژیێ دژی ئافرەتان ، پێتڤییە ب ڕاستگۆیی ژ خۆ بپرسین ، ئەرێ ئەف توندوتیژیە سەرچاوەیێ سەرەکی یێ وێ ژ کیڤە دهێت ..!
لێ ل دەسپێکێ پێدڤیە شلوڤەیەکا گونجایی هەبیت بۆ پرسیارا ، ئەرێ ئەڤ زەلامێن توندوتیژیێ ئەنجام ددەن ، ل بەر دەستێ کێ مەزن بووینە …!
هەردەم دهێتە گۆتن کو جڤاک لسەر دەستێ ئافرەتێ دهێتە بڕێڤەبرن ، و دخێزانێدا ئافرەتێ رولەکێ باش هەیە دپەروەردە کرنا زاروکان دا ، کو سێ پشکێن پەروەردەیا زاروکی بۆ ئافرەتێ دزڤریت کۆ ئەوژی ( دایکە ) و بتنێ پشکەک بۆ بابی دزڤریت .
دڤێرەدا ڕۆڵێ دایکێ وەک ئەندازیارا سەرەکی یا جڤاکی دیار دبیت ، ئانکو ئافرەت بخو دشێت ببیتە ئەگەرێ نەهێلانا توندوتیژیێ کۆ ئەوژی ب رێکا پەروەردەیەکا دروست .
چەوا دایک دشێت نەوەیەکێ بێ توندوتیژی ئاڤا بکەت …!
دەما کۆ دایک ب کارێ پەروەردەکرنا زاروکان رادبیت پێدڤیە زاروکان لسەر شێوازێ ڕێزگرتنێ پەروەردە بکەن ب تایبەتی رەگەزێ « نێر ، کوڕ » .
دایک پێتڤییە کوڕێ خۆ فێر بکەت کو ڕێزگرتن ل ئافرەتێ نیشانا مەردینی و کەسایەتیا وی یا بێهێز نینە ، بەلکو بلند ترین ئاستێ تێگەهشتنێ یە ، پێتڤییە فێری ماف و سنووران بکەت کۆ دایک کوڕێ خۆ فێر بکەت کا مافێن ئافرەتێ چنە ، و توندوتیژی چ یا ( جەستەیی بیت یان یا دەروونی و پەیڤی بیت ) چ جاران چارەسەری نینە بەرامبەر ئافرەتێ .
دەمێ دایک بخو ڕێزێ ل مافێن خۆ دگریت و کوڕێ خۆ فێر دکەت کو مرۆڤ نابیت ستەمێ قەبوول بکەت ، کوڕ ژی لسەر وێ هزرێ مەزن دبیت کو ئافرەت خودان ئیرادە و کەرامەتە .
ئانکو لڤێرە دیار دبیت کو ئافرەت کلیلا گۆڕینا جڤاکی یە ، و ئەو بتنێ دشێت ببیتە ئەگەرێ کێمکرن و نەهێلانا توندوتیژیێ دژی ئافرەتان .
ل دوماهیێ دبێژم زاروکێن خۆ ب شێوازەکێ وەسان پەروەردە بکەن کو ببنە پارێزەرێن مافان ، نەک پێشێلکارێن مافان …
نورا جعفر شیمؤ
