ئاشتوبوونا وجودی ل گەل تێرنەبوونێ…

کەوسەر شەوکەت

هەگەر ئەم بێژین غوربەت نە عەرزەکێ دەرەکی یە، ل سەر ماهییەتا مرۆڤی، بەلکی سیفەتەکێ زاتی و پێکهاتەیەکا ئەزەلییا کەینوونەیا مرۆڤی یە. وی دەمی ‘تێربوون’ دێ وەک وەهمەکا مەعریفەتناسی هێتە هەلوەشاندن؛ چونکی لڤێرە تێرنەبوون نە کێماسییا بوونێ یە، بەلکی ڕەنگدانەڤەیا وێ زێدەهیا وجودی یە، یا کو د بنەڕەت دا چ عەرزێن دیاریکری تێرا گونجاندنا وێ ناکەن.
ل ناڤ ڤی ئاسۆی، تێرنەبوون دێ بیتە زمانێ ڕاستەقینە یێ غوربەتێ؛ چونکی هەر تێربوونەک واتا بەرزەکرن و غوربەت و کەڤتنا ل ناڤ واقیعەکێ سنوردارە.
ئێدی پرسیار ئەڤەیە: مرۆڤ دێ چەوان ل ناڤ ڤێ “ڤەبوونا بێدوماهی” ئانکو ل ناڤ ڤێ تێرنەبوونێ، ئیدراکێ ب حەقیقەتا خۆ کەت؟
ل گۆرەی ڤێ پرسیارێ “تێرنەبوون” وەک کێماسییەکا بێی بوها ناهێتە دیتن، ئەو دێ بیتە “شێوازەکێ وجودی” کو تێدا مرۆڤ بۆ خۆ و بۆ جیهانێ ئاشکەرا دبیت.
بۆ گەهشتن ئەڤێ تێگەهشتنێ ، ئاشتوبوونا وجودی مەرجە.
ئاشتبوون ل گەل وێ ڕاستییێ کو تێرنەبوونا مرۆڤی، نیشانا کوورییا ڕەهێن وی یە، ل ناڤ غوربەتێ. ئەڤ ئاشتبوونە ب واتا دوماهیک ئینانا ڤێ گرژییێ نابیت، بەلکی ب واتا تێگەهشتنا “زەرورەتا” وێ بۆ پێگەهشتنا مرۆڤی یە.
ئەو تشتێ ئەم دبێژینێ “قەلەق” یان “تژینەبوون”، نە ژ هەژارییا سروشتێ جیهانێ یە، بەلکی ئەڤە ڤەدگەرێت بۆ “سروشتێ پەیوەندییێ” ب خۆ.
جیهان بۆ مرۆڤی وەک کومکەرەکا تەمامکری خۆ ئاشکرا ناکەت. بەلکی ئەو بەردەوام بەر ب ئاسۆیەکی نوو خو ڤەدکەت، ئەڤ ئاسویە ل گەل هەر بزاڤەکا ئیدراکێ، بەرفەرهتر لێ دهێت.
ل گۆرەی ئەڤێ تێگەهشتنێ، گوهۆرین دێ ژ “خودانبوون” بۆ “شەهادەت و بینینێ”، گوهۆرینەکا ئەخلاقی بتنێ نابیت، بەلکی گوهۆرین دێ د “پەیوەندییا ل گەل بوونێ” دا بیت. ب ئەڤێ گوهۆڕینێ جیهان نامینیت بابەتەک بۆ “خۆدانییێ”، بەلکی دێ ڤەگەڕیت وەک مەیدانا “تەجەلییا” حەقیقەتێ.
د ئەڤی چارچووڤەیدا، غوربەت نامینیت برینەک کو ساڕێژ ببیت، ئەو دێ بیتە شێوازێ حزورا مرۆڤی د جیهانێ، حزورەک کو تێدا تێرنەبوون دبیتە پەرژانەک، دا مرۆڤ ل ناڤ نیشتیمانێن دەستکرد نەهێتە زیندانکرن.
ئەڤ حوزوورە نە ل سەر ئیستیقرارێ یە، بەلکی ل سەر ئاشکەرابوونا بەردەوام ڕاوەستیایە. لڤێرە نیشتەجێبوون نە گەهشتنە ب چرکەیا دوماهییێ، بەلکی مانا ل ناڤ بلنداهییەکا ڤەکری یە، بەرامبەر هەر ئاسۆیەکی. لەورا، ئەو زێدەهیا وجودی نە بارگرانییە، بەلکی مەقامێ ڕەسەنییا مرۆڤی یە کو ناهێلیت بوون ل ناڤ وێنەیەکی تەمامکری دا بێهتە زیندانکرن. هەگەر مرۆڤ تێر بووبا، دا سەیرورە ڕاوەستیت و بوون دا بیتە “دیارکەرەکێ داخستی” یێ بێ داهات.