کورتە چیروک ب ناڤێ (ڤەژاندنا بیرهاتنێن کەڤن و گەشتەک بۆ سەردەمێ زێڕین)

دهیتە گوتن کو هەفپەیڤینا دناڤبەرا دو هەڤالان دا و گەشتەکێ بۆ ناڤ سەردەمێ زێڕین، دەرگەهەکی لە بەر دلەکێ وەستیایێ ڤەدکەت کو هێشتا ئەو ڕەنگ و رامانێن بەری نوکە یە؛ پەیڤێن تە نڤیسین وەک پرەکێ نە ناڤبەرا سادەبوونا بەرێ و ئالۆزیا ئەڤرۆ دا، و چەند جوانە مرۆڤ لە ناڤ بێهنڤەدانا بێدەنگیێ دا، شیابیت بگەهیتە وان ناسنامەیێن ڕەسەن یێن کو لە سەر لاپەڕێن کەڤن هاتینە نڤیسین، چونکو هەر پەڕەک ژ وێ دەفتەرێ، نە بەس بیرهاتن بوو، بەلکو نووکرنا سووز و پەیمانەکێ بوو لە گەل خۆ و بەری نوکە؛ و هەروەسا مرۆڤ گەلەک پێدڤی ڤان ئارامگەهێن دلڤەکرنێ یە داکو بشێت لە گەل هەلویستێن ژیانێ ب باوەرییەکا مەزنتر و ڕووناهییەکا پتر سەحکەتە پاشەڕۆژا خۆ.
ئیک ژ هەردو هەڤالان بەحسێ خۆ دکەت دبێژیت ، ئێڤارەکا کەش و هەوایکێ سار پشتی من قەهوەکا گەرم ڤەخاری، رۆنشتبوم بەر دەرگەهێ ژوورا خۆ، بەرێ خۆ ددا ئەسمانی و بارانەکا هویر و هێدی و خۆش دباری و چپکێن خوناڤێ لە سەر پەنجەرا ژوورا من جێهببوون. من ژی هزر لە وێ دا کر کو ئەز ژورا خۆ لێکبدەم؛ ئەز رابووم و دەستپێکر کو هندەک کەلوپەل و سندووقێن کەڤن یێن لە بن تەختێ خۆ لێکبدەم و ڕێکبێخەم. ژ نییشکەکێ ڤە دەستێ من کەفتە سەر سندوقەکا داری یا بچووک، یا کو ئەڤە چەند سال بوون من ژبیرکر بوو و هەر من نەڤەکربوو. لە سەر رەخەکێ وێ نەخشێ هندەک بەلگێن گۆلان ب رەنگێن جوداجودا کێشایی هاتبوو دروستکرن. ئەز راوەستیام و هزرێن خۆ کۆمڤەکرن، ئەها بیرا من هات دەمێ ئەم گەنج، هەر ئیک ژ هەڤالێن مە بیرهاتنێن خۆ یێن رۆژانە دنڤێسین و بۆ خۆ ڕادکرن؛ دلێ من دەست ب قوتانەکا بلەز کر ، ژ بەرکو ئەڤە سندووقا بیرهاتنێن کەڤن و نامەیێن دەمێن گەنجاتیێ تێدا هەبوون.
دەمێ من سندووقێ ڤەکری، روندک ژ چاڤێن هاتنە خوار و دیمەن هاتن پێش چاڤێن من، هەستەکێ تایبەت لە دەف من دیار بوو. من دەست دا دەفتەرەکا بچووک، ناڤێن چەند هەڤالان لە سەر نڤێسی بوون و نامەیێن هەڤالان و هندەک وێنەیێن کەڤن لە ناڤ دەفتەرا کەڤن دا هاتبون هەڵگرتن هەر ل بیرا من نەمابون . من لاپەڕەک ژ وێ دەفتەرێ ڤەکر و دەستپێکر ب خواندنا وان پەیڤێن کو من بەری دەهان سالان بەرێ نوکە نڤێسین بون .
پتریا وان پەیڤ و ڕستا، خەون و هیڤییێن من بوون بۆ پاشەڕۆژێ؛ هیڤییێن چەندین کارێن جوان بوون، ئیک ژ وان هیڤییان خواندنا پەرتووکان و گەشتکرنا هەمی جیهانێ بوو. من ب دەنگێ خۆ یێ نزم خواند و من دیت کو گۆتارێن من یێن دەستپێکێ چەندسادە و بێ فێل بوون، لێ لە هەمان دەم دا تژی بوون ژ ڕاستگۆیی و ڕەسەنیێ. مرۆڤ گەلەک جار لە ناڤ لەزاتی و ئالۆزیا ژیانا رۆژانە دا بەرەزە دبێت و ژبیر دکەت کو مروڤ خودان ئارمانج و مەرەم بوو، لێ گەهشتنە ڤان دیمەنێن کەڤن هەر وەک ئاڤەکا تێزی لە سەر لەشێ مرۆڤی دا بهێته خوار.
من بەرێ خۆ دا چەند وێنەیێن کەڤن، لە گەل هەڤالێن خۆ یێن دەمێن قوتابخانێ، لە باغچەیەکێ ب کەیف رۆنشت بووین، بێ ئەوەی هزر بکەین کو دێ رۆژەک هێت و هەر ئێک ژ مە دێ بەرەف کۆژیەکی جیهانێ ڤە چیت. ڤەگەڕیانا ڤان دەما بۆ ناڤ دلێ وی دەمی، وەک ئینانەڤەیا هەناسەیەکا پاقژ بوو بۆ ناڤ ژیانا مە یا ئەڤرۆ.
من دیت کو چەند تشت هاتینە گۆهۆڕین؛ هندەک ژ وان خەونان پێک هاتن و بوونە ڕاستی، هندەکێن دی ژی هێشتا یێن ماینە ب رێڤە لە هیڤییێ نە، و هندەک ژ خەونێن کێمتر گرنگ ژی لە گەل دەمی هاتنە گۆهۆڕین و جهێ خۆ دانە ب مەرەمێن مەزنتر. لێ یا گرنگ ئەڤ بوو کو من زانی ئەو ماندووبوونا بەری چەند سالێن بۆرین و ئەو شەڤێن درێژ یێن بێخەوی و کارکرن بێ ئەنجام نەبووینە؛ هەمی کار و خەبات بوونە بنیات بۆ ژیانا مە یا ئەڤرۆ.
لێ دەمەکێ درێژ من خۆ ژبیر ڤەکر لە ناڤ بیرهاتنێن بەرێ دا. جارەکا دی من دەفتەرا خۆ کرە لە ناڤ سندووقێ دا و دەرێ وێ باش گرتەڤە، لێ ئەڤ ژوورە تژی هێزەکا نوی یا هیڤییان بوو. مرۆڤ گەلەک جاران پێدڤی یە رۆژێن چوویی ساخ بکەتەڤە، داکو بشێت ڕێکا خۆ یا پێشیێ ب باوەرییەکا مەزنتر و دلخوشیڤە قۆناغەکا دی پتر ببڕێت.
نڤیسکار / رەحیما بەرواری