دەقێ بەیاننامەیا مەکتەبا سیاسی ب هەلکەفتا 16ی تەباخێ، 80 ساڵیا دامەزراندنا پارتی دیموکراتی کوردستان
جەماوەرێ خۆڕاگر، مالباتێن سەربەرزێن شەهیدان و پێشمەرگەیێن قارەمان
ئەڤرۆ بە شانازیڤە یادا دامەزراندنا پارتیا خۆ دکەینەڤە، ئەو پارتیا داکۆکیکارەکا ڕاستەقینەیا بەرژەوەندیێن گەلێ مە یە، ئەو یادا وێستگەهەکا هەرە گرنگا خەباتا مێژووییا بزاڤا ڕزگاریخوازییا کوردستانێ و کاروانەکێ نەوهستیای یێ تێکۆشانا سیاسی یە بۆ داکۆکیکرنێ ژ مافێن نەتەوەیی و نیشتمانی و بنەمایێن دیموکراسیێ، هەروەسا بیرئینانا خەباتەکا تەمەن 80 ساڵیا وەرچەرخان و قوربانیدان و ئهزموون و سەرچاوەیێ ئیلهاما بهایێن ئازادی و دیموکراسیێ ژی یە.
ئەو هەلکەفت تەنێ بیرەوەریەکا دەمکی یا دامەزراندنا پارتەکا سیاسی نینە، بەلکۆ بەرجەستەکرنا ئیرادەیا ئازادیخوازانەیە بۆ ڕەتکرنا پیلانێن دوژمنان و زۆلم و زۆرداریێ ل سەر ڕێبازا حەکیمانەیا “بارزانیێ نەمر” کۆ دەمەکی زەمینەیەکا سەردەمیانە بۆ چەمکێ کوردایەتیێ داڕشت و ب پەیڕەوکرنا بهایێن شۆڕشگێڕی، پەرە ب بزاڤا ڕزگاریخوازییا کوردستانێ دا.
خەباتا هەمەلایەنەیا پارتیا مە ل شۆڕشێن ئەیلوول، گوڵان، ڕێککەفتنامەیا 11ی ئادارێ و ڕاپەڕینا 1991ێ، نیشانا وێ چەندێ ددەن کۆ هێزەکا پێشەنگا پشتڕاست ب جەماوەر و هەموو پێکهاتێن نەتەوەیی و ئایینی یە و هەمیشە بە کلتوورێ دیالۆگێ بزاڤ بۆ بدەستڤەئینانا ئارمانجێن نەتەوەیی کریە.
ل یادا 80 ساڵیا دامەزراندنا پارتیا خۆ دا پێداگیریێ ل سەر وێ چەندێ دکەینەڤە، وەفاداری بۆ مێژوویا پارتی و قوربانیدانا تێکۆشەرێن وێ تەنێ بیرئینان نینە، بەلکۆ ئهزموونا وێ ڕابردوو و مێژوویێ، بەرپرسیاریەتیەکا نەتەوەیی و نیشتمانی یە بەرامبەر نوکە و ئایندهیێ ب ڕێکا کەفتنا پاراستنا دەستکەفتێن مە و دوورخستنا هەرێما کوردستانێ ژ وان ئاڵۆزیێن سیاسی و گرژی و شەڕ و پێکدادانێن دەوروبەرێن مە، هەروەسا پاراستنا کوردستانێ و ڕێگری ل هندێ کۆ ببیتە جهەک بۆ کاریگەری ئێخستنە سەر ئەمنیەتا دەوروبەرێن مە و ڕێزگرتنا دوولایەنەیا بەرژەوەندیان و بهێزکرنا پێگەهێ دەستووری یێ هەرێمێ و کاراکرنا ڤەیا پەرلەمانی وەک ئەرکەکێ مێژوویی و پێکهێنانا کابینەیا دەیێ و حکومەتەکا بەهێز، هەروەسا بهێزکرنا یەکڕیزیێ و ڕێزگرتن ژ فرەییا پێکهاتان و بهێزکرنا سەقامگیری و ئاشتەوایێ ل هەرێمێ.
خەڵکێ خۆڕاگر و پشوودرێژێ هەرێما کوردستانێ ل وان ساڵێن بوری سەلماندینە کۆ حەژێکرنا نیشتیمان و گەلێ خۆ ل سەرووی هەموو بابەتەکێ دیترە، ژبەر هندێ ب ئەرکێ خۆ دزانین ب هەموو شیانانڤە کار بۆ چارەسەرکرنا ئاریشە و گرفتان بکەین ب ئاراستەیا دابینکرنا ئاسایش و پێدڤیێن ژیانەکا سەرفرازانە.
ل یادا 16ی ئابێ دا، دەستێ دۆستایەتی و پێکڤەکارکرنێ بۆ تمام یا لایەنێن سیاسیێن بەشدار ل پرۆسەیا سیاسییا عێراقێ درێژ دکەین، ئەرکێ هەموویانە بێ جیاوازییا بیروبۆچوونێن سیاسی، باوەریا ئایینی و مەزهەبیڤە پێکڤە کاربکەین عێراق بۆ هەموویان بیت و دوور بێخین ژ تێکەلبوونێ ل شەڕ و ئاژاڤەیێن ناوچەیێ و، هەموو پێکهات پێکڤە ب بەرپرسیاریەتیڤە شێوازەکێ حوکمڕانییا دروست و سەردەمیانە بگرنە بەر، ئەڤە ژی ژ پێخەمەت بەرژەوەندیا خەڵکێ عێراقێ یە، هەروەکی ب ئاشکرا گوتیە عێراق تووشی ئاریشەیێن زۆر هاتیە کرن، ڕەوا نینە چیتر ل وێ بازنەیێ بپێچیت، چونکی خەڵکێ عێراقێ چیدی بەرگەیا وان هەموو نەهامەتیان ناگریت، ئەڤە ژی بەرپرسیاریەتیەکا ئەخلاقی، نیشتمانی و ئایینی یە.
ب ڤێ هەلکەفتا مێژوویی، قوربانیدانا تێکۆشەران و پێشمەرگە و شەهیدان بەرز دنرخینین و ئەڤێن گیانێ خۆ ل پێناو ماف و ئازادی و سەروەریا نەتەوە و خاک و گەلێ مە بەخشین، هەروەسا تێکۆشان و خۆڕاگریا بەرەباب ل دویف بەرەبابێن ڕێیا پارتایەتیێ و ڕێبازا بارزانیێ نەمر.
ل ڤێ یادا پرشنگدار دا، پەیمانێ بۆ گەلێ کوردستانێ و سەرۆک (مەسعود بارزانی) دووپات دکەین کۆ ل سەر ڕێبازا ڕەسەنا کوردایەتیێ بەردەوام بین بۆ پاراستنا قەوارەیێ هەرێمێ و بهێزکرنا بنەمایێن دیموکراسیێ و پێکڤەژیانێ.
سڵاڤ بۆ دامەزرێنەر و ڕابەرێ ڕێبازا کوردایەتیێ (مستەفا بارزانیێ نەمر) و کاکە (ئیدریسێ هەمیشە ل یاد) و هەموو شەهیدێن کوردستانێ.
سوپاس و پێزانین بۆ کادر، ئەندام و لایەنگرێن پارتیا مە، هەروەسا گەرمترین پیرۆزباهی ل پێشمەرگەیێن قارەمان و خەڵکێ خۆڕاگرێ کوردستانێ دکەین.
سەرکەفتن بۆ خەباتا ڕەوایا گەلێ مە یە، بەرز و بلند بیت ئاڵایێ کوردستانێ.
مەکتەبا سیاسییا
پارتی دیموکراتی کوردستان
16ی ئابا 2026
