پەیاما مەکتەبا ڕێکخستنا پ.د.ک، ب ھەلکەفتنا 16 تەباخێ و 80 یەمین سالیادا دامەزراندنا پارتی دیموکراتی کوردستان

جەماوەرێ وەڵاتپارێزێ کوردستانێ
خێزانێن سەربەرزێن شەهیدان، پێشمەرگەیێن قارەمان:

ئەڤرۆ 16ی تەباخێ، 80 سال ب سەر دامەزراندنا پارتیا مە، پارتی دیموکراتی کوردستان دەربازدبن، کو هەڤدەمە دگەل ژدایکبوونا پێشی و لێڤەگەڕێ گەلێ مە، جەنابێ سەرۆک مسعود بارزانی.
ب هەلکەفتنا ڤان هەردوو یادەوەریێن مەزن، گەرمترین پیرۆزباهییان ئاراستەی جەنابێ سەرۆك بارزانی، کەس و کارێن سەربلندێن شەهیدان، پێشمەرگێن قەهرەمان، کادر و ئەندام جەماوەرێ ئەمەکدارێ پارتی و تەڤایا گەلێ: کوردستانێ دکەین.

خویشک و برایێن خۆشتڤی:
دامەزراندنا پارتی بڕیارەکا ئاسایی نەبوو، بەلکۆ ژ ئەنجامێ خواندنەکا کوور و ستراتیژی، یا کەتوارێ تال و پڕ ب ئازارێ سیاسی، ئابووری، جڤاکی و ڕۆشەنبیریێ بوو، یێ کو گەلێ کورد تێدا دەربازدبوو، نەخاسمە پشتی کەتوارێ دابەشبوون و بێ بەشبوونێ ژ سادەترین مافێن ژیانێ ل سەر گەلێ مە هاتینە سەپاندن و گەلێ کورد ڕاستی نائۆمێدیێ بووی.
د چارچۆڤێ هەستکرنێ ب بەرپرسیاریەکا مێژوویی، بەرامبەر چارەنڤیسێ تاری و پاشەڕۆژا نەدیار یا گەلێ کورد و وەک پێدڤییەکا دیرووکی، بابێ ڕۆحیێ نەتەوا کورد بارزانیێ نەمر بڕیارا دامەزراندنا پارتی دا، کو وەکو هێزەکا ڕێکخستی و ڕەسەن، سەرکێشییا بزاڤا ڕزگاریخوازیا گەلێ کورد د وێ قۆناغا هەستیار و تژی ئاستەنگ وئالنگاری دا بکەت.
پارتیا مە هەر ژ وێ ڕۆژێ تا ئەڤرۆ، ژبۆ پاراستنا ناسنامەیا گەلێ کورد د سەنگەرێ پێشیێ یێ خەبات قوربانیدانێ دا مایە، و قۆناغ ل دووڤ قۆناغێ، ل گورەی هەلومەرج و دەرفەتان، دەستکەفتێن مەزن بۆ گەلێ کوردستانێ بدەستڤە ئیناینە، کو ئەڤرۆکە ب شانازی ڤە بیرەوەریا 80 سالیادا وێ ساخبکەین.
بیرەوەریا دامەزراندنا پارتی، بتنێ ساخکرنا یادا دامەزراندنا پارتیەکا سیاسی نینە، بەلکو بیتئینانا ئافڕاندنا هزرەکێ و ڕێبازەکێ یە، کو ھەم دامەزراندنا وێ پێنگاڤەکا گرنگبوو د ڕێڕەوا بزاڤا ڕزگاریخوازی و خەباتا گەلێ مە دا، و هەم ژی پێویستییەکا مێژوویی بوو بۆ بدەستڤەئینانا خواست و ئارمانجێن گەلێ مە.
هەڤالێن پارتی پەروەر :
زنجیرەیا خەباتا بەردەواما چەکداری، سیاسی، ڕەوشەنبیری و میدیایی یا پارتیا مە، د قۆناغێن جوداجودا یێن تێکۆشینی دا، ل د سەردەمێ ڕژێما پاشایەتی و کۆماری دا و هەروەسا د شۆڕشێن ئەیلوولا مەزن، گوڵان و ڕاپەڕینا ئادارا 1991ێ دا، و هەمی ئەو دەستکەفتێن د وی کاروانێ درێژێ خەباتێ دا هاتینە بدەستڤەئینان، شاهدێن وێ چەندێ نە، کو پارتی وەکو هێزەك، ڕێکخستنەك و بزاڤەکا پێشەنگ، پشتبەستی بوویە ب بھێزا جەماوەرێ خۆ و پشتەڤانیا تەڤایا تەخ و توێژ و پێکهاتەیێن نەتەوەیی، ئایینی و مەزهەبی یێن کوردستانێ، هەروەسا ب گیانێ کوردایەتی و کولتوورێ دیالۆگ، ڕێکێن ئاشتیانە و پێکڤەژیانێ ل سەر ئاستێ ناڤخۆ و پارچەیێن دی یێن کوردستانێ، خەبات کریە پێخەمەتی ب دەستڤەئینانا مافێ چارەنڤێس بۆ گەلێ کورد.
گەلێ مە ب درێژاهیا 80 سالێن خەباتا پارتی دیموکراتی کوردستان، ل ژێر سیبەر و ڕێبەری)ا بابێ ڕۆحیێ نەتەوا کورد بارزانیێ نەمر و جەنابێ سەرۆك بارزانی، ب سەدان ئەڤرازی و نشیڤی و قۆناغێن سەخت و دژوار بڕینە و چەندین مین و پیلانێن نەیار و نەحەزێن مللەتێ کورد پۆچەلکینە، لێ ھەمی گاڤا و سەرەڕای ھەمی ئالنگاڕیان وەکو ھێزەکا نەتەوەیی و نیشتیمانی یا بێ ڕکابەر د گۆپیتکێ دا مایە.
پارتی وەکو هەمی جاران، پێشەنگا خەباتا کوردایەتی و کۆڵنەدانێ و سەرکێشا کاروانێ خەباتا گەلێ کورد کریە و ب ھەڵویستێن خۆ یێن نەتەوەیی و بەرگرییا مەردانە ژ خاک و مافێن گەلێ کوردستانێ، هندی دی پێگەهـ و ناڤودەنگێن خۆ، ل سەر هەمی ئاستان بهێزتر لێکرییە و بەرنامەیێ وێ یێ نیشتمانی، ئاڤەدانخوازیی سەربۆڕا وێ یا حکومڕانیێ بۆ خەلکێ کوردستانێ جهێ ئومێدێ یە.
کوردستانیێن هێژا:
د ڤێ هەلکەفتنا پیرۆز دا ب دەلیڤە دزانین کو جارەکا دی تەکەزیێ ل سەر تەباییێ و پێکڤەکارکرنێ د ناڤبەرا تەڤایا هێز و لایەنێن سیاسی بکەین، بۆ کاراکرنا پەرلەمانی و پێکئینانا حکومەتا هەرێما کوردستانێ و داخوازێ ژ سەرجەم هێز و لایەنێن سیاسی دکەین کو ل ئاست بەرپرسیاریا ڤێ قۆناغا هەستیار دابن، یا کوردستان، عێراق و دەڤەرا ڕۆژهەلاتا ناڤێن تێدا دەربازدبیت.
د ڤێ یادا پڕ شکۆدار دا، بەڵێن و پەیمانێ بۆ ڕحا بلندفڕا بارزانیێ نەمر، جەنابێ سەرۆك (مسعود بارزانی) و مالباتێن سەربلندێن شەھیدان و تەڤایا خەلکێ کوردستانێن دووپات دکەینەڤە، کو وەکو هەمی جاران ل سەر ڕێبازا بارزانیێ نەمر و ھێلا نەگۆڕ و ڕەسەنا و ڕاستەقینە یا کوردایەتی و نیشتمانپەروەریێ بەردەوام بین بۆ پاراستنا قەوارەیێ سیاسی و یاسایی و دەستووریێ هەرێما کوردستانێ و دەستکەفتێن گەلێ مە.
درۆد و سڵاڤ بۆ گیانێ پیرۆزێ دامەزرێنەرێ پارتیا مە و نەخشەسازێ ڕێبازا کوردایەتیێ، بابێ رۆحیێ نەتەوا کورد بارزانیێ نەمر.
درۆد سڵاڤ بۆ ئەندازیارێ ئاشتیێ کاک ئیدریسێ جانەمەگ .
سڵاڤ بۆ گیانێ پاکێ سەرجەم شەهیدێن ڕێکا سەروەری، ئازادی و ڕزگارییا کوردستانێ.
سلاڤ و ڕێز بۆ پێشمەرگێن قەهرەمان د سەنگەرێن بەرگریێ دا.
سلاڤ و ڕێز بۆ تەڤایا هێزێن پارستانا سەقامگیری و ئارامیا هەرێما کوردستانێ.
ھەر بەرز و بلندبیت ئالایێ پیرۆزێ کوردستانێ و کوردستان هەرا ئارام و ئاڤەدانبیت.

مەکتەبا ڕێکخستنا پارتی دیموکراتێ کوردستان

16 تەباخا 2026ێ