مرۆڤبوون: نە بێکێماسییە بەلکو هونەرێ زڤرینێیە
محمد سعدو قاسم
گەلەک جارا مروڤ دکەڤیتە د تورەکا خەلەت یا هزری دا وەسا دبینیت کو باوەریا دروست یان پاقژی یا دلی ئەوە کو چ جارا مروڤ نەشکێت و خەلەتییان نەکەت. ئەڤە هەستێ دروستکرنا وێنەیەکێ فریشتەیی و بێکێماسی د مێشکێ مروڤی دا پەیدا دکەت ئەڤە ئێک ژ مەزنترین داڤێن شەیتانییە دا کو مروڤی ژ هیڤییێ ببریت و ژ دلوڤانییا خودێ دوویر بکەت
چەندین کەس هەنە دەست یێ ژ نڤێژێن خو بەردایین یان د ناڤ بێدەنگیا دلێ خو دا ژ دەرگەهێ تەوبەیێ رەڤینە، بتنێ ژبەر کو هەست پێ دکەن نەشێن ب تمامی بەرامبەر کەمالیەتێ ڕاوەستن. بەلێ ڕاستی ئەڤەیە ئەرێ ما کەسەک هەیە بچیتە دەف میکانیکێ ترومبێلا دا کو موبایلا خو چێکەت ؟ بێگومان نە! ڤێجا چەوا مروڤ سروشتێ خو یێ لاواز ژ بیر دکەت و داخوازا بێکێماسیێ ژ خو دکەت؟ خودێ تو یێ ژ ئاخێ ئافراندی و ب نهێنیێن دلێ تە زانایە ئەو داخازێ ژتە ناکەت ببیە فریشتە، بەلکو وی بتنێ دڤێت تو ببیە مروڤ
ل دوویڤ فەرموودەیا پیروز د سەحیحا موسلم دا دهێت
«ئەگەر وە گۆنهـ نەکربان، دا خودێ وە ژناڤبەت و گەلەکێ دی ئینیت کو گونەهان بکن و داخوازا لێبورینێ بکن، دا لێ ببوریت»
ئەڤە نیشانەکا زەلالە کو خەلەتی نە برینەکە د جەوهەرێ باوەریا تە دا بەلکو راستیا سروشتێ مروڤینییێ بخویە قەدر و بەهایێ تە د هندێ دا نینە کو چ جار نەکەڤی بەلکو د هندێ دایە کو پشتی هەر شکاندن و کەڤتنەکێ د ناڤ سیبەرا گونەهێ دا، جارەکا دی ب برینێنن خو ڤە راببی و ب زڤری بو مەزناهیا دلوڤانییا خودێ
سیبەرێن ئەڤێ راستیێ د چیروکا وی سەحابەیی دا روون دبن ئەوێ چەندین جارێن دووبارە د ینانە دەف پێغەمبەری ژبەر ڤەخوارنا مەی و سزا ل سەر دهاتە برین جارەکێ ئێک ژ ئامادەبوویان نەفرەت لێ کرن پێغەمبەری (سڵاڤێن خودێ ل سەر بن) بەرەڤانی ژێ کر و گوت
«نەفرەتان لێ نەکەن، ب خودێ ئەز دزانم ئەو حەژ خودێ و پێغەمبەرێ وی دکەت»
ئەڤە وانەیەکا مەزنە کو رێبازا ئیسلامێ چ جارا مروڤێ کەفتی ب چاڤەکێ بچویک نابینیت بەلکو دەستێ وی دگریت دا جارەکا دی ل سەر پێیان ڕاوەستیت
تەوبە، بریارا بێ گونەهبوونا هەتاهەتایی نینە بەلکو بەیانا بەردەوامییا پەیوەندیێیە د ناڤبەرا لاوازییا مروڤی و دلوڤانییا بێسنورا خودێ دا ئەگەر ڕۆژەکێ ئالوزییان تو شکاندبی و کەفتبی، ئەڤە ناکەتە هند کو تو کەسەکێ خراپی…
تۆ ب تنێ ژ ئاخێی و هونەرێ تە د زڤرینا تە دایە.
