کورتە چیرۆک: کچا شەڤێ
م.ئیمان نەزیر ڕەمەزان
خۆ ب کچا شەڤێ بناڤ کربوو، ژبەرکو د ڕۆژێ دا دناڤ قەرەبالغیا مرۆڤاندا هەردەم وێ هەست ب تنێبوونێ دکر. ب رۆژێ خۆ خەمگین ددیت، لێ شەڤێ باوەشا خۆ بۆ ڤەدکر؛ وێ ژی بخۆ، ب پەناگەهەکا ئارام و پڕی دلۆڤانی ددیت، وەکی وەڵاتەکێ ئازاد کو تێدا هەست ب مرۆڤ بوونا خۆ دکر.
وەکی رۆژ ئاڤا دبوو و شەڤێ چەنگێن تاریاتیا خۆ بسەر گەردوونی دا دکێشا، بێدەنگیەکا مەزن و ئارام لسەر دلێ وێ کچێ دبوو مێهڤان. ژ خۆشیێن بێدەنگیێ دا دڤیا ژ کەیفا دا بدەنگەکێ بلند و بهێز بکەتە قێری؛ قێریەکا هند بلند کو جیهانێ دەنگ ڤەدەت هەتا بگەهیتە عەرشێ بلندێ ئاسمانێ.
ئەو ژ دیتنا هەمی مرۆڤان دویر دکەت، لبەر پەنجەرا خۆ تنێبوونا خۆ هەمبێزدکر. ئەو بایێ فێنکێ هوینێ د پەنجەرێ ڕا ژورا وێ دا دهاتە ژورێ، داڤێن پرچا وێ پێ سەرما دکر، هەر وەکی وان ژی نەڤێت چجار شەڤ ب دیماهیک بهێت.
وێ چاڤێن خۆ دبرنە ئاسمانی؛ هەر وەکی کەڤالەکێ ڕەش هاتبیتە خەملاندن ب دندکێن ستێرێن زێری یێن زەر. وێ دناڤ وێ جوانینێ دا ڕەنگێ ڕوحا خۆ ددیت، و لژێر وێ تاریاتیێ دا خەم و ماندیبوونا خۆ یا رۆژێ هەمی ژبیردکر، هەر وەکی بێژی شەڤ مەرهەمەکا سار یا پەنچێ یە بۆ گیانێ وێ هەمیێ.
ب دەنگەکێ هێدی و نزم دگەل هەیڤێ دئاخڤت. هەیڤێ ژی وەکی دایکەکا دلۆڤان گوهداری بوو دکر، وێ ژی ڕویدانێن خۆ یێن رۆژێ هەمی بۆ ڤەدگیران و دگۆتێ: “تۆ بمینە دگەلمن وەکی دوستەکا ڕاستەقینە و نهێنیێت من ئاشکەرا نەکە.” ستێرکان ژی ل دورماندورێ هەیڤێ خۆ د بریسقاندن، هەر وەکی دگۆتنێ: “ئەم ژی یێن دگەلتە.”
دناڤ وێ تاریاتیێ و بێدەنگیێ دا تشتەکێ سەیر چێبوو؛ دوو پەلاتینکێن جوان و بالکێش قەستا پەنجەرا وێ کرن و لپشت پەنجەرێ هەردوویان گەلێک سەما دکر. وێ ژی هەست پێدکر هەر وەکی ئەڤ پەلاتینکە یێن هاتین دا پەیاما دلێ وێ بەرەڤ ئەسمانیڤە ببەن، هەروەکی دبێژنێ: “تۆ یا بتنێ نینی، ئەم ژی دگەلتەنە.” تاریاتیا شەڤێ و گەردوونی و ئەو هەردوو پەلاتینکە نیشانەکا دی بوون ژ هێڤیێن مەزن بو وێ. لڤینا وان پەلاتینکا دبوونە هێزا لڤینێ دناڤ بێدەنگیا شەڤێ دا.
شەڤ ژی یا بەرەڤ دیماهیکێ دچیت، هێشتا چاڤێن کچا شەڤێ ژ ئاسمانی ڤەدەر نەبوینە. بەری تیشکێن رۆژێ بکەڤنە لسەر ئەردی و جیهانا مرۆڤان ژ خەو ڕابیت، ڕوناهیا هەیڤ و ستێرکان کێم کێم بەر ب ئاڤا بوونێ دچن، دگەل پەلاتینکا یێن دبێژنێ: “ئێدی دەما خاتر خاستنێ یە.”
ل وی دەمی، کچێ سەرێ خۆ د پەنجەرێ ڕا ئیناتەدەر، هەناسەکا کویر و خەمگین هەلکێشا، پاشی بەرەڤ جهێن خۆ چوو. سەرێ خۆ دانا سەر بالیفکێ و گۆتی: “خوزی چجار شەڤ ب دیماهیک نەهاتبا…” دگەل نڤستنا پەلاتینکا و بەرزەبوونا ستێرکان، چاڤێ وێ ژی کەفتنە خەوکا گران.
