بەهای باخچەی مناڵان لەبەهەشتی نیشتماندا

ستار ئەحمەد
​باخچەی منداڵان تەنیا بینایەکی ڕەنگاوڕەنگ و شوێنێک بۆ بەسەربردنی کات نییە، بەڵکو بەردی بنچینەی ئەو کۆمەڵگەیەیە کە خەونی پێوە دەبینین و دەمانەوێت لە ئاییندەدا لەسەر نەخشەی شارستانییەت جێگەی خۆی بکاتەوە. کاتێک باس لە چەمکی بەهەشتی نیشتمان دەکەین، بێگومان ناتوانین ئەو بەهەشتە بێ ڕەنگ و دەنگی منداڵان و بێ ئەو پەروەردە بنەڕەتییە وێنا بکەین کە لە باخچەکاندا چەکەرە دەکات، چونکە لێرەوەیە یەکەمین هەنگاوەکانی مرۆڤ بەرەو ناسینی خۆی و ژینگە و نیشتمانەکەی دەست پێدەکات. ئەم وێستگە چارەنووس سازە تەنیا سەرەتایەکی سادەی خوێندن نییە، بەڵکو لە ڕووی زانستییەوە هەستیارترین وێستگەی تەمەنە، چونکە توێژینەوەکانی زانستی دەمار دەیسەلمێنن کە نزیکەی لە سەدا نەوەی مێشکی مرۆڤ لە پێنج ساڵی یەکەمدا گەشە دەکات، ئەمەش وا دەکات باخچەی منداڵان ببێتە ئەو هەلە زێڕینەی کە تێیدا ژیری و داهێنان بنچینەسازی بۆ دەکرێت. باخچەی منداڵان ئەو کارگەیەیە کە تێیدا هەستی نیشتمانپەروەری و بەرپرسیارێتی کۆمەڵایەتی بە شێوەیەکی زانستی و سەردەمیانە لە ناخی مرۆڤی داهاتوودا دەچێنرێت، ئەم قۆناغە هەستیارە لە تەمەنی مرۆڤدا، وەک نەمامێک وایە کە ئەگەر لە زەوییەکی پڕ لە میهرەبانی و زانستدا بڕوێنرێت، لە داهاتوودا دەبێتە دارێکی بەردار کە سێبەرەکەی بۆ هەمووان دەبێت. گرنگیی باخچەی منداڵان لەوەدایە کە تەنیا فێربوونی پیت و ژمارە نییە، بەڵکو فێربوونی هونەری پێکەوەژیان و ڕێزگرتنە لە جیاوازییەکان، منداڵ لەوێدا فێردەبێت کە ئەو بەشێکە لە گشتێکی گەورەتر، فێردەبێت کە چۆن مافەکانی خۆی بپارێزێت و ئەرکەکانی بەرامبەر بە هاوڕێکانی و ژینگەکەی جێبەجێ بکات. یەکێکی تر لە بەها باڵاکانی باخچەی منداڵان، چەسپاندنی دادپەروەریی کۆمەڵایەتییە، چونکە لەوێدا منداڵان بەبێ گوێدانە جیاوازیی دارایی و پێگەی خێزانی، لە یەک ئاست و بە یەک پۆشاکەوە دادەنیشن، ئەمەش یەکەمین وانەی کردەیی یەکسانییە کە ڕێگری دەکات لە دروستبوونی گرێی دەروونی لە داهاتوودا. لە وڵاتانی پێشکەوتوودا، باخچەی منداڵان وەک ستراتیژێکی نەتەوەیی سەیر دەکرێت و نەک تەنیا بۆ فێربوونی پەڕتووک، بەڵکوو بەوێنەی ناوەندێک بۆ فێربوونی کارامەییەکانی ژیان بەکاریدەهێنن، چونکە دەزانن هەموو ئەو وەبەرهێنانەی لەم قۆناغەدا دەکرێت، لە داهاتوودا دەبێتە هۆی کەمبوونەوەی ڕێژەی تاوان، زیادبوونی داهێنانی زانستی و بەهێزبوونی ئابووریی نیشتمانی. ئەگەر بمانەوێت نیشتمانەکەمان بکەینە بەهەشت، دەبێت سەرەتا لە باخچەکانەوە دەست پێبکەین، دەبێت ژینگەیەکی وا بخولقێنین کە منداڵ تێیدا هەست بە ئارامی و شکۆ بکات، چونکە ئەو منداڵەی ئەمڕۆ لە باخچەیەکی مۆدێرن و پڕ لە زانیاریدا پەروەردە دەبێت، بەیانی دەبێتە ئەو سەرکردە و پزیشک و ئەندازیارەی کە بە دڵسۆزییەوە خزمەتی خاکەکەی دەکات. لەم پێناوەدا، پێویستە تێڕوانینی بازرگانی بۆ باخچەی منداڵان کۆتایی بێت و وەک ناوەندێکی زانستیی باڵا مامەڵەی لەگەڵ بکرێت، هەروەها پەرە بە توانای پەروەردەکاران بدرێت چونکە مامەڵەکردن لەگەڵ مێشکی منداڵ پێویستی بە پسپۆڕی و تێگەیشتنی قووڵی دەروونی هەیە. باخچەی منداڵان پردێکە لە نێوان جیهانی بچووکی خێزان و جیهانی گەورەی کۆمەڵگە، ئەگەر ئەم پردە بە ڕێگەیەکی دروست و زانستی دروست نەکرێت، ئەوا مرۆڤی داهاتوو لە ناوەڕاستی ڕێگەکەدا تووشی دڕدۆنگی و نامۆبوون دەبێت. پەروەردەکارانی ئەم بوارە دەبێت وەک باخەوانێکی لێهاتوو بن ،کە بزانن چۆن مامەڵە لەگەڵ جۆرە جیاوازەکانی گوڵەکاندا دەکەن، چونکە هەر منداڵێک بەهرەیەکی تایبەتی تێدایە کە ئەگەر لە باخچەدا نەدۆزرێتەوە، ڕەنگە بۆ هەمیشە بخنکێنرێت. بەهای ڕاستەقینەی نیشتمان لە سامانی سروشتیدا نییە، بەڵکو لەو دەسکەوتە مرۆییەدایە کە لە باخچەی منداڵانەوە گەشە دەکات، کاتێک منداڵێک فێری ئەوە دەکرێت کە چڵە دارێک نەشکێنێت و ئاوی گوڵەکان بدات، لە ڕاستیدا ئێمە خەریکین پارێزەری داهاتووی ژینگەی نیشتمان دروست دەکەین، کاتێک فێری دەبێت یارمەتی هاوڕێیەکی بدات، ئێمە خەریکین بنەماکانی مرۆڤدۆستی و پێکەوەژیان لەو بەهەشتەدا دادەڕێژین کە ناوی نیشتمانە. پێویستە تێڕوانینی کۆمەڵگە بۆ باخچەی منداڵان بگۆڕێت و وەک ناوەندێکی زانستی و پەروەردەیی باڵا سەیری بکرێت، چونکە هیچ نەتەوەیەک نەگەیشتووەتە کەناری ئارامی و پێشکەوتن ئەگەر لە بنەڕەتەوە دەستی پێنەکردبێت. باخچەی منداڵان ئەو مناڵدانەیە کە تێیدا کەسایەتیی مرۆڤ وێنا دەکرێت، بۆیە هەموو تێچوویەک و ماندووبوونێک لەم پێناوەدا، گەورەترین خزمەتە بە ئاییندەی نەتەوە، چونکە هیچ وەبەرهێنانێک پڕ بایەختر نییە لە دروستکردنی مرۆڤێکی تەندروست، هۆشیار و نیشتمانپەروەر. لە کۆتاییدا، بەهەشتی نیشتمان تەنیا بە گوتار و دروشم دروست نابێت، بەڵکو بەو پیت و وشە و یاری و پێکەنینانە دەگەشێتەوە، کە ئەمڕۆ لە باخچەی منداڵاندا دەبیسترێن و دەبینرێن، ئەوە ئەو بنچینە پتەوەیە کە کۆشکی سەرفرازیی میللەتێکی لەسەر بونیاد دەنرێت و گەرەنتی مانەوە و گەشەکردنی بەردەوام دەکات لە جیهانێکی پڕ لە ململانێدا، کە تەنیا بۆ ئەوانەیە کە لە منداڵییەوە فێری ئەزموونی زانست و خۆشەویستی کراون.