ماڵی نێچیرڤان بارزانی ، ئەو ناونیشانەیجیهان بۆ پاراستنی ئاشتی لە دەوری کۆدەبێتەوە

لوقمان عوسمان گە ڵاڵی

​لە کاتێکدا جیهان و ناوچەکە تینووی ئارامی و زمانی دیالۆگن، دەستێکی ڕەش و ترسنۆک، بە ئامانجگرتنی ماڵی سیمبولی دیپلۆماسی و پێکەوەژیان لە هەرێمی کوردستان، دەیەوێت پەیامی وێرانکاری و پشێوی بڵاوبکاتەوە. هێرشکردنە سەر ماڵی سه رۆک نێچیره ڤان بارزانی ، تەنها بە ئامانجگرتنی کەسایەتییەک یان شوێنێکی جوگرافی نییە، بەڵکو هێرشێکی ڕاستەوخۆیە بۆ سەر ئەو سەقامگیرییەی کە بە خوێنی هەزاران پێشمەرگە و ساڵانێک لە دانایی سیاسی بەدەستهاتووە.
​ئەوانەی زمانی درۆن و مووشەک بۆ گفتوگۆ هەڵدەبژێرن، لە ڕاستیدا دان بە شکستی فەلسەفی و سیاسی خۆیاندا دەنێن. کاتێک گروپە توندڕەو و لەیاسادەرچووەکان ناتوانن لە مەیدانی عەقڵ و ئاوەدانیدا ڕکابەری بکەن، پەنا دەبەنە بەر تیرۆرکردنی ئارامی. بەڵام مێژوو سەلماندوویەتی کە تۆوی ئاشتی لە خاکی ئەم نیشتمانەدا ئەوەندە قووڵ چێنراوە، بە باهۆزی هیچ گروپێکی تاریكپەرست هەڵناکێشرێت.
​ئەم هێرشە ناڕەوایە، کە ڕووبەڕووی شەپۆلێکی گەورەی ناڕەزایەتی نێودەوڵەتی و ناوخۆیی بووەوە، نیشانەی ئەوەیە کە پاراستنی قەوارەی هەرێمی کوردستان و سەرکردایەتییە حەکیمەکەی، ئیتر تەنها خواستێکی ناوخۆیی نییە، بەڵکو پێویستییەکی ستراتیژییە بۆ پاراستنی ئاسایشی هەموو ناوچەکە. پەیوەندییە بەپەلەکانی سەرۆک و سەرکردە جیهانییەکان و جەختکردنەوەیان لەسەر پشتیوانی هەرێم، ئەو ڕاستییە دەسەلمێنن کە کوردستان تەنها نییە و ئەو پیاوەی تەمەنی خۆی بۆ ئاشتەوایی تەرخان کردووە، جێگەی متمانەی جیهانە.
​ئەو شەمشەمەکوێرانەی لە تاریکیدا هێرش دەستپێدەکەن، دەبێت بزانن کە ئیرادەی گەلێک بۆ ژیان، زۆر لە درۆنەکانی ئەوان بەهێزترە. ئەوانەی دەیانەوێت ماڵی ئاشتی بڕووخێنن، تەنها ڕووی ڕاستەقینەی خۆیان وەک دوژمنی مرۆڤایەتی و پێکەوەژیان نیشان دەدەن. هەرێمی کوردستان بەم پەلامارانە نەک هەر پاشەکشە ناکات، بەڵکو یەکدەنگیی ناوخۆیی و پێگەی نێودەوڵەتییەکەی پۆڵایینتر دەبێت.
​لەکۆتاییدا، تیرۆر و ئاژاوەگێڕی تەنها پەڵەیەکی ڕەش دەبن لە مێژوودا، بەڵام ناوی ئەو سەرکردانەی کە لە کاتی زریاندا دەبنە چەتر بۆ پاراستنی گەلەکەیان و دوورخستنەوەی شەڕ،
بە درەوشاوەیی دەمێنێتەوە. کوردستان دەمێنێت و ئاشتیش وەک هەمیشە بەسەر زمانی چەک و باروتدا سەردەکەوێت.