ژمارە سفری گۆڤاری 2+2=1 بڵاو دەکرێتەوە

گۆڤاری (٢+٢=١) لە ڕۆژی ١٤ـی ئاداری ٢٠٢٦، ساڵڕۆژی لەدایکبوونی بارزانی نەمر، باوکی ڕۆحیی نەتەوەی کورد، ژمارە (سفر)ـی خۆی بڵاودەکاتەوە، سەرنووسەری گۆڤارەکەش دەڵێت، ئامانجمان لە دەرکردنی گۆڤارەکە، زیادکردنی پشتگیریی نێودەوڵەتییە بۆ دۆزی ڕەوای کورد.

چیرۆکی سەرەکی: گۆڤاری (٢+٢=١) گۆڤارێکی کوولتوری نەتەوەیی کوردستانیە، بڕیارە سبەی شەممە ١٤ـی ئاداری ٢٠٢٦ بە ھەردوو ڕێنووسی سۆرانی و لاتینی لە ھەرێمی کوردستان و ئەورووپا بە دیدگایەکی سیاسی، ئەخلاقی و مێژوویی بڵاوبکرێتەوە و لە مانگەکانی داھاتووشدا بە زمانە زیندووەکانی دیکەی جیھانیش بڵاو دەکرێتەوە.

لێدوانی فەرمی: غازی گەردی، سەرنووسەری گۆڤاری (٢+٢=١) بە “زێیێ بادینان” ڕاگەیاند، بیرۆکەکە لە باوەڕێکی سادە بەڵام قووڵ سەریھەڵداوە؛ کاتێک کورد یەکبگرێت، دەبێتە ھێزێکی بێوێنە لە خزمەت ئاشتی، کەرامەت و مافەکانی گەلاندا. لەسەر ئەو بنەمایەش، ئامانجی سەرەکیمان لە دەرکردنی گۆڤارەکە، یەکێتیی گەلی کوردە، لە دەرەوەی سنوور، پارت و جیاوازییە ئایدۆلۆژییەکان. مێژوو چەندین جار پێشانی داوە کە دابەشبوون، کاریگەرترین چەک بووە دژ بە گەلی کورد.

ئامانجی گۆڤارەکە چییە:

سەرنووسەری گۆڤارەکە ڕایگەیاند، جگە لە یەکێتیی گەلی کورد و لادانی جیاوازییە ئایدۆلۆژییەکان، ئامانجە سەرەکییەکانمان ئەوەیە، پرسی کورد بە جددی و ڕوونی چارەسەر بکرێت، نەک وەک پێکدادانێکی ناوخۆیی، بەڵکو وەک پرسێکی ھەرێمی و نێودەوڵەتی. ئێمە شیکاری، ڕامان و پێشنیازی سیاسیی ڕاستەقینە پێشکەش دەکەین بۆ ئەوەی ببینە بەشێک لە چارەسەرێکی بەردەوام، بەبێ تووندوتیژی و ھەژموونی لۆژیکی وێرانکەر.

ھاوکات ٢+٢=١ ئامانجیەتی ببێتە تاقیگەیەکی بیرۆکەکان بۆ بنیادنانی ئاشتییەکی ھەمیشەیی. ئاشتییەکی دادپەروەرانە، بەبێ مەرجی شەرمنانە، بەبێ نکۆڵیکردن لە ناسنامەی کورد و بەبێ دەستبەرداربوون لە مافە بنەڕەتییەکانمان. ئێمە پێمان وایە نابێت بابەتی ئاشتی وەک لاوازییەکی نەتەوەیی ببینرێت، بەڵکو وەک ھەڵبژاردنێکی ستراتیژی و شارستانیی بەھێز و کاریگەر.

گۆڤارەکە ھەوڵ دەدات لە ڕێگەی دەربڕینی ھەڵوێستی ڕۆشنبیرانەوە، بە زمانێک کە دیپلۆمات، دامەزراوە، ڕۆشنبیر و کۆمەڵگەی مەدەنی لە سەرانسەری جیھان لێی تێبگەن، پشتگیریی نێودەوڵەتی بۆ دۆزی کورد کۆبکاتەوە. دەمانەوێت بڵێین کە ئێمە دۆزی کورد ناکەینە بارگرانی بەسەر جیھانەوە و وەک فاکتەرێک دژ بە ھیچ کەس، سیستەم یان دەوڵەتێکی تایبەت نایبینین، بەڵکو وەک دیدگایەکی فەلسەفی و ڕۆشنبیریی خۆمان دەریدەبڕین.

ناوەڕۆکی گۆڤارەکە:

ئەم گۆڤارە فەزایەکی نوێیە بۆ یادکردنەوەی تێکۆشانە بەکۆمەڵەکانی نەتەوەی کورد. تێیدا باس لە ئازارە مێژووییەکانی کورد لە جینۆساید، کۆچی زۆرەملێ، بێدەنگیی سەپێنراو و بەڵێنە شکاوەکان دەکات.

لەنێو دوو توێی گۆڤارەکە، کورد وەک سووتەمەنیی ڕق و کینە خۆی نابینێت، بەڵکو تێکۆشان و ھەڵوێست و دیدگای خۆی بۆ ئاشکراکردنی ڕاستییە مێژووییەکان تەرخان دەکات.

بابەتە ستراتیژییەکە: سەرنووسەری گۆڤاری (٢+٢=١) ئاماژە بە وتەیەکی بارزانی نەمر دەدات کە دەڵێت، “بڕوامان وایە؛ ئاشتییەکی بەردەوام بەبێ ناسینی مێژووی نەتەوەکان ھەرگیز نایێتە دی. ئێمە پێگەیشتووین و لە خزمەت ئەو ڕێگەیەدا دەبین کە باوەڕمان پێیەتی، کە ئەویش ڕێگەی کوردایەتییە”.