شاندەکێ بلند یێ حکومەتا هەرێمێ دێ چیتە بەغدا
بڕیارە ل چەند ڕۆژێن بهێت شاندەکێ بلند یێ تەکنیکی و دارایی یێ حکومەتا هەرێما کوردستانێ ب سەرۆکایەتییا وەزیرێ دارایی بچیتە بەغدا، ئەڤ سەرەدانە دێ ب مەرەما ئێکلاکرنا پشکا هەرێمێ ژ یاسایا بودجەیێ 2026ــێ و دابینکرنا مەزاختییێن دارایی بۆ پرسا مووچەیی فەرمانبەران بیت.
ئێكشەمبی 15ــی شوباتا 2026ــێ، ل گۆرەی ژێدەرێن میدیایی بڕیارە ل دووماهییا ئەڤێ حەفتییێ یان ل دەستپێکا حەفتییا بهێت، شاندەکێ بلند یێ حکومەتا هەرێما کوردستانێ ب مەرەما دانوستاندنێ ل سەر پرسا مووچە و ڕەشنڤیسێ یاسایا بودجەیا سالا 2026ــێ، سەرەدانا بەغدا بکەت.
سەرۆکایەتییا شاندی دێ ژ لایێ ئاوات شێخ جەناب، وەزیرێ دارایی و ئابووریڤە هێتە کرن، هەروەسا شاند دێ یێ پێکهاتی بیت ژ سکرتێرێ جڤاتا وەزیران، ڕێڤەبەرێ گشتییێ بودجەی و ڕێڤەبەرێ گشتییێ ژمێرکاری ل وەزارەتی دارایی.
ئارمانجا سەرەکییا ئەڤێ سەردانێ، بۆ دانوستاندنا مەزاختییێن دارایی یێن سالێن بهێت و چەسپاندنا شایستەیێن دارایی یێن هەرێما کوردستانێ یە د یاسایا بودجەیێ فیدرال دا، ب جۆرەکی کو ئاریشەیێن دارایی و پرسا مووچەیی ب تەمامی بهێتە چارەسەرکرن.
