پاشەڕۆژا پەیوەندیێن ھەرێما کوردستانێ دگەل حکومەتا سوریا یا ڤەگوھێز دناڤبەرا بەرژەوەندیێن نەتەوەیی و گۆڕانکاریێن ھەرێمی دا
ئاوارە نێروەیی
د گەل گۆڕانکاریێن سیاسی یێن بلەز ل سووریا و ھاتنا ئەحمەد شەرعی بۆ سەر دەستھەلاتێ ھەرێما کوردستانێ خو ل بەرامبەر قۆناغەکا نوی و ھەستیار دبینیت، پەیوەندیێن د ناڤبەرا ھەولێر و دیمەشقێ بتنێ نە گرێدای ب کاروبارێن دیپلۆماسی نە، بەلکو پەیوەندییەکا راستەوخۆ ب ئاسایشا نەتەوەیی و ئابووری و چارەنڤیسێ کوردێن ڕۆژئاڤایێ کوردستانێ ڤە ھەیە.
د ڤێ گوتارێ دا، دێ ل سەر چەند تەوەرێن سەرەکی یێن ڤێ پاشەرۆژێ راوەستین:
١- ئاسایشا سنووری و مەترسیا تیرۆرێ:ھەرێما کوردستانێ ئەڤ سنورە دگەل سووریا کو بەشەک ژ ڤی سنوری ژ وان دەڤەرێن عەرەبێن سنی پێکدھێن کو دەمەکیدا ئەڤ عەرەبێن سنە دگەل رژێما سەدام حوسێن بین گەلەک جاران کارکریە دگەل تیرۆرستان ئەگەر سەقامگیریا سووریا و رۆژئاڤایێ کوردستانێ یا ئارام بیت دێ یا ھەرێما کوردستانێ ژی یا ئارام بیت ، ئەگەر حکومەتا شەرع نەشێت کۆنترۆلا سنووران بکەت یان ئەگەر ململانێ دگەل ھەسەدە دژوار لێ بکەت مەترسی ھەیە جارەکا دی شانێن نڤستیێن داعشێ ل دەڤەرێن سنووری سەرھەلبدەنەڤە ھەروەھا ھەرێما کوردستانێ دڤێت ب ھشیاری سەرەدەریێ دگەل ڤێ دۆسیێ دا بکەت کو سنوورێن وێ ژ ھەرەشەیێن ئەمنی پاراستی بن.
٢-دۆسەیا ئاوارەیان و بارێ مرۆڤایەتی:
ژ دەستپێکا خوپێشاندانێن خەلکێ سوریا و ڕۆژئاڤایێ کوردستانێ گەلەک خەلک ژ سوریێ و رۆژئاڤایێ کوردستانێ ئاوارەی ھەرێما کوردستانێ بین ھەتا نوکە ژی بەشەک ژ وان ڤەنەگەریانە. ھەر جۆرە تێکچوونەک ل سوریا و رۆژئاڤایێ کوردستانێ دبیتە ئەگەرێ شەپۆلەکا نوی یا کۆچبەریێ بەرەڤ ھەرێما کوردستانێ ، پاشەڕۆژا پەیوەندییان دناڤبەرا حکومەتا سوریا یا ڤەگوھێز دێ کاریگەریێ ل سەر پرۆسەیا زڤڕینا ئارەزوومەندانە یا ئاوارەیان کەت و دێ ھەرێم بزاڤێ کەت دگەل دیمەشقا نوی بگەھیتە لێکتێگەھشتنەکێ دا کو ماف و تەناھیا ڤان ئاوارەیان ل دەمێ زڤڕینێ پاراستی بیت.
٣-ئابووری و دەروازەیێن بازرگانی:
دەروازێ سێمالکا (پێشخابوور) دەرگەھێ ئابووری یێ دناڤبەرا ھەرێما کوردستانێ و رۆژئاڤایێ کوردستانێ ڤە گرێدایە ئەگەرد پاشەڕۆژێدا حکومەتا سوریا یا ڤەگوھێز ب شێوەیەکێ فەرمی دانپێدانێ ب ڤی دەروازەیی بکەت دێ بزاڤێن بازرگانی گەشەکرنەکا مەزن دناڤبەرا (ھەرێما کوردستانێ) و ( سوریا ورۆژئاڤایێ کوردستانێ) دروست بیت و ئەڤە د بەرژەوەندییا ھەرێمێ دایە کو سوریا و ڕۆژئاڤایێ کوردستانێ بیتە بازاڕەک بۆ بەرھەمێن دەڤەرێ، لێ مەترسی ئەوە کو دیمەشق ڤان دەروازەیان وەک کارتەکا فشارێ ل دژی ھەرێمێ یان ھەسەدە ب کار بینیت.
٤-ڕۆلێ ناڤبەین کاریێ ھەرێما کوردستانێ:
بەرپرسێن ھەرێما کوردستانێ و ب تایبەت سەرۆک مەسعود بارزانی ڕۆلەکێ کاریگەر ھەبوویە د ناڤبەرا لایەنێن کوردی یێن سووریا و ھەروەھا د قۆناغێن داھاتیدا ھەرێم دشێت بیتە پرەک بۆ گەھاندنا دەنگێ کوردێن ڕۆژئاڤا بۆ دیمەشقێ، ژبەر کو ھەرێم ئەزموونەکا دەولەمەند د فیدرالی و مافێن دەستووری دا ھەیە، دشێت وەک مۆدێلەک یان ژی ڕاوێژکارەک بھێتە دیتن بۆ چارەسەرکرنا کێشەیا کوردی ل سووریا.
ئەنجام:
پاشەڕۆژا پەیوەندیێن ھەولێر و دیمەشقێ دێ ل سەر بنەمایێ “بەرژەوەندیێن ھەڤپشک” ئاڤا بیت، لێ باوەریا کەسایەتیێن وەک ئەحمەد شەرع دێ وەک تێبینییەکا مەزن مینیت چونکە دەمەکێ ب ئەگەرێ تێکەلی دگەل (قاعیدە) ل عیراقێ ھاتبوو گرت و ھێشتا تێبینی لسەر وی ھەنە. ھەروەھا دێ ھەرێما کوردستانێ بزاڤێ کەت سیاسەتەکا ھەڤسەنگ پەیڕەو کەت ژ لایەکێ ڤە پاراستنا دەستکەفتێن کوردان ل سوریا بکەت و ژ لایێ دی ڤە دروستکرنا پەیوەندییەکا فەرمی دگەل حکومەتا سوریا یا ڤەگوھێز بۆ پاراستنا بەرژەوەندیێن خۆ یێن ئابووری و ئەمنی و سیاسی دورست دکەت .
