ڤیستەڤال و پێشەنگەهێن بەرهەمێن خۆمالی؛ ژێدەرەکێ ڕزقی یە بۆ هەژار و دەستکورتان
نڤێسین ؛ زەنون سلێڤانەی
ل ڤێ سەردەما کو ژیان تژی ئاستەنگ و دژوار بوویە، هزرەکا مرۆڤایەتی و ئابووری یا گرنگ هەی کو ڕۆژ بۆ ڕۆژێ پتر جهێ خۆ د ناڤ جڤاکێ مە دا دگریت؛ ئەو ژی گێڕانا ڤیستەڤال و پێشەنگەهێن بەرهەمێن خۆمالی یە. ئەڤ پێشەنگەهە نها بتنێ جهەک بۆ نیشادانا کەلوپەلان نینن، بەلکو بووینە پرۆژەیەکێ مەزن یێ مالباتێن دەستکورت، خودان کارێن دەستکرد، و خودان پێداویستیێن تایبەت، تاكو ب رێکا بەرهەمێن دەستێن خۆ ژیانەکا ب ڕوومەت بۆ خوە و مالباتێن خۆ پەیدا بکەن.
ژێدەرەکێ زیندی بۆ ژیانێ و بلندکرنا شیانێن جڤاکی
بەلگەیێ دیار ئەوە کو گەلەک ژ مالباتێن هەژار و خودان کێم دەرامەت، شیانێن مەزن د چێکرنا کارێن دەستکرد، چاندنا خۆمالی، دروومانا کەلوپەلێن کەلتووری، و ژمارەکا بەرهەمێن خوارنێ یە. لێ ئاریشا سەرەکی یا وان هەمیشە نەبوونا بازارەکی گونجای بوو بۆ فرۆتنا وان بەرهەمان. ل ڤێرێ ڕۆلێ ڤیستەڤال و پێشەنگەهان دەردەکەڤە پێش؛ ئەو دبنە پرەكا بێ ڤەقەتان د ناڤبەرا دەستێن کارگەر یێن وان مرۆڤان و کڕیارێن کو حەزا پشتەڤانیکرنا بەرھەمێ خۆمالی هەی.
- دەستەبەرکرنا داهاتەکێ ڕۆژانە: فرۆتنا بەرهەمان د ناڤ ڤیستەڤالان دا هاریکارییا مالباتێن کێم دەرامەت دکەت کو ب سەرخوە بژین و پێدڤیێن سەرەکی یێن ژیانا ڕۆژانە دابین بکەن.
- ژێدەرێ هیڤی و پاشەڕۆژێ: بۆ گەلەک گەنج و ئافرەتێن دەستکورت، ئەڤ پێشەنگەهە دبنە دەستپێکا پرۆژەیەکێ بچووک یێ بازرگانی کو د پاشەڕۆژێ دا مەزن دبیت.
- پاراستنا کلتووری: پتریا بەرهەمێن ل ڤان پێشەنگەهان دهێنە نیشادان، ب ژێدەرەکێ دیرۆکی و کلتووری ڤە گرێدای نە، کو ئەڤە ژی ڕەسەناڤیا جڤاکی پارێزیت.
ئەرکێ مە یێ مروڤایەتی و نیشتمانی
پشتەڤانیکرنا ڤان ڤیستەڤالان نە بتنێ ئەرکەکێ ئابوورییە، بەلکو پشکداریکرنە د بلندکرنا شکۆیا مروڤی دا. هەر دەمێ مرۆڤەکێ دەستکورت دبینی کو ب برنجا دەستێن خۆ بەرهەمەکی چێدکەت و د پێشەنگەهێ دا دفرۆشە، ئەو نیشانەیا هێز و بەرخودانا وی یە لەوما گەشکەکرنا ڤان چالاکیان، واتە کێمکرنا رێژا بێکاریێ و ڤەکرنا دەرگەهێن رزق و روزییێ ل بەر کەسێن پێدڤی.
باوەریا مە ئەوە کو حکومەت، رێکخراوێن جڤاکێ سڤیل، و خێرخواز دڤێت هەمی هەڤکار بن بۆ بەردەوامیدان ب ڤیستەڤالێن خۆمالی؛ چونکە هەر بەرهەمەکێ ل وێ پێشەنگەهێ بهێتە کڕین، زڤڕینەکا راستەوخۆیە بۆ سەر ژیانا خێزانەکا هەژار و دەستکورتان ل وەلاتی؛
