ڕەوشا گشتی یا کوردستانێ دناڤبەرا تەحەدیێن نوکە و ئاسۆیا پاشەڕۆژێ دا
ئاوارە نێروەیی
کوردستان د قۆناغەکا گەلەک هەستیار و پڕی گۆڕانکاریێن بلەز دا دەرباز دبیت کو ئەڤ چەندە کارتێکرنەکا راستەوخۆ ل سەر ژیانا ڕۆژانە یا وەلاتیان دکەت چ ل سەر ئاستێ سیاسی ئابۆری یان ژی جڤاکی .
ئەگەر ئەم تەماشای بارودۆخێ سیاسی بکەین ئەم دبینین کو هەرێما کوردستانێ د ناڤ جەرگێ کێشە و ململانێن دەڤەرێ دا دژیت کو پێگەهێ وێ یێ جیوپۆلیتیکی وەسا لێ دکەت بکەڤیتە بن فشارێن دەرەکی یێن بەردەوام ژ لایێ دەولەتێن جیران و کێشەیێن هەلاویستی دگەل حکومەتا فیدرال ل بەغدا ب تایبەتی د بوارێن بودجە نەفت و دەڤەرێن ئیدارەیا هەرێمێ دا ،د هەمان دەم دا ناکۆکیێن ناڤخۆیی یێن د ناڤبەرا لایەنێن سیاسی دا هندەک جاران دبنە ئەگەرێن لاوازبوونا پێگەهێ هەرێمێ د دانوستاندنان دا لەوما د ڤێ قۆناغێ دا ئێکڕێزی و دیالۆگەکا نیشتمانی یا ڕاستەوخۆ ژ هەر دەمەکی پتر پێدڤی یە بۆ پاراستنا قەوارێ دەستووری یێ هەرێمێ و دەستکەفتێن کو ب خوینا هزاران شەهیدان هاتینە دەستڤەئینان
ژ لایێ ئابۆری ڤە وەلات د ناڤ قەیرانەکا دژوار دا دەرباز دبیت کو بارگرانیەکا مەزن ئێکخستیە سەر ملێن وەلاتیان ب تایبەتی پرسا پاشکەفتن و گیرو بوونا مووچەیێن فەرمانبەران کو بوویە ئەگەرێ سستبوونا بازاری و کێمبوونا دەلیڤەیێن کاری پشتبەستن بتنێ ب داهاتێ نەفتێ و لاوازیا کەرتی تایبەت و چاندنێ، ئابۆرێ کوردستانێ یێ لاواز کری بەرامبەر گۆڕانکاریێن بهایێ وزێ ل جیهانێ.
ناکۆکیێن ناڤخۆیی یێن د ناڤبەرا لایەنێن سیاسی دا هندەک جاران دبنە ئەگەرێن لاوازبوونا پێگەهێ هەرێمێ
هەروەها دەربازبوون ژ ڤێ ڕەوشێ چاکسازیێن بنەڕەتی د سیستەمێ کارگێڕی و دارایی دا هەمەجۆردانانا ژێدەرێن داهات و پشتەڤانیکردنا کەرتێ چاندنێ و پیشەسازی و گەشتوگوزارێ تاکە ڕێکەکە بۆ ئاڤاکرنا ئابۆرەکێ سەقامگیر کو بشێت پاشەڕۆژەکا گەشتر بوو هەرێما کوردستانێ مسۆگەر بکەت و ڕێگریێ ل کۆچبەریا گەنجان بۆ دەرڤەی وەلاتی بگریت.
سەرەڕای ڤان هەمی تەحەدی و ئاریشەیێن مەزن ئیرادە و هشیاریا مللەتێ کوردستانێ و ب تایبەتی تەخا گەنجان و ئافرەتان پەیامەکا پڕی هیڤی ددەتە مە کو جڤاکەکێ کوردی ڕۆژ بۆ ڕۆژێ بەرەڤ پێش دچیت د بوارێن پەروەردێ و تەکنۆلۆژیایێ و داهێنانێن تاکەکەسی دا گەنجێن مە نوکە خودان شیانێن مەزنن و دکەڤنە د ناڤ کێبرکیێن نێڤدەولەتی دا، ئەڤ چەندە ژی نیشانا هندێ یە کو سەرمایێ ڕاستەقینە یێ ڤی وەلاتی مرۆڤێن وێ نە و ب هێزکرنا کەرتێ پەروەردێ و زانکۆیان و ڕەخساندنا ژینگەهەکا ل بەرامبەری گەشەکرنا شیانان.
هەروەها ئەڤ چەندە دێ بیتە کلیلا سەرەکی بۆ ئاڤاکرنا کوردستانەکا بهێزتر و ئاڤەدانتر د دەرئەنجام دا سەرەڕای تاریاتیا قەیرانان هیڤی د ئیرادا مللەتی دا یا زیندی یە و ب چاکسازی و ئێکگرتنێ کوردستان دێ شێت ڤان تەحەدیان کەتە دەلیڤەیێن سەرکەفتنێ .
