١٦ی تەباخێ: شەماڵکا ئازادیێ د تاریاتییا مێژوویێ دا

١٦ی تەباخێ نەک تەنێ هەڤلێهاتنەکا مێژووییە، بەلکو جەژنا ڕابوونا نەتەوەیەکێیە، ژدایکبوونا هەستێ خۆڕاگریێ، و دەستپێکا قۆناغەکا نوو یا شکۆمەندیێ یە بۆ گەلێ کوردستانێ. د ڤێ ڕۆژا پیرۆز دا، مللەتێ کورد ل بن سایەیا بڕیارا مێژوویی یا نەمرێ ڕێبازا نەتەوەیی، مەلا موستەفا بارزانیێ نەمر، شییا قەدەرا خۆ ب دەستێ خۆ بنڤێسیت و خەباتا ڕزگاریخوازی ژ ناڤ بازنەیێ بێهێزیێ ببەتە ناڤ چوارچۆڤەیەکێ سیاسی، ئۆرگانی و دامەزراوەیی.
دامەزراندنا پارتی شکەستنا بێ دەنگیێ:
ل ١٦ی تەباخا ١٩٤٦ێ، د ناڤ گێژەلۆکێن ئالۆزێن سیاسی یێن ناڤچەیی و نێڤدەوڵەتی دا، پارتی دیموکراتی کوردستان وەک بەرسڤەکا مێژوویی هاتە مەیدانێ. پارتی بتنێ ڕێکخراوەکا سیاسی نەبوو، بەلکو مالبات و هێلینا هەموو نیشتمانپەروەران، خەباتکاران، ڕۆشنبیران و پێشمەرگەیێن کوردستانێ بووییە؛ بەری چەک و قادێن سەنگەران بەهایێن مرۆڤاهی، ئاشتی و ئازادی بەرقەرار کرینە.
ب ڕێبازا خۆ یا ماقوولانە و بیرمەندانە گۆتارا ناڤچەیی گوهارت بۆ گۆتارەکا گشتگیر یا نەتەوەیی، و شییا هەستێ نیشتمانپەروەریێ د ناڤ ناخێ هەموو تاکەکێ کورد دا بچەسپینیت. هەر ژ وێ ڕۆژا پیرۆز وەرە وارگەهێ هزرا ئازادیخوازیێ و زانین و مەعریفەتێ بوویە؛ سەلماند کو کورد خودان ئیرادەیەکا زێندینە و چ داگیرکەر نکارن ناسناما ڤی مللەتی ژ ناڤ ببەن.
لێڤەگەڕێ ئازا ژ بانی هەیڤەکا دلۆڤان:
١٦ی تەباخێ نە ژڤانەکێ هەرەمەکی بوو، بەلکی قەدەرا مللەتەکێ بوو د هە مبێزا ئەڤی گەردوونی و تاریاتییا مێژوویێ دا؛ پەیمانەکا ئەزەلی بۆ هەلگرتنا بارێ گرانێ مللەتێ بەلاڤەکری ل دونیایێ. مژدەیا بەخشینا ڕێبەرەکێ ڕەسەن بوو کو هەر ژ گاڤا ئێکێ، تەراتی و بوهارا تەمەنێ خۆ کرە قوربانی. سەرۆک بارزانی ژ نەخشەڕێیا پێشمەرگایەتیێ بۆ شەملەکا ئاڤەدانیێ، ئەندازیارێ سپێدەها ڕاپەڕینێ و پاشان چەسپاندنا وێستگەها مێژوویی د کۆپیتکا داستانا ڕێفراندۆما سەربەخۆییێ دا، هەردەم وەک چیایەکێ گەورە و سەربەرز ل هەمبەری نەحەز و نەیاران ڕاوەستایە و بڵێسەیا ئازادیێ د دەروونێ هەر کوردستانیەکێ دا ب گەشی ڕاگرتییە. سەرۆک مەسعود بارزانی د ناڤ جەرگێ ئێکەم کیانێ سەربەخۆیێ کوردی دا، چاڤێن خۆ ل بن سیبەرا ئاڵایێ پیرۆزێ کوردستانێ ڤەکرین.
ڕێبازا بارزانی: “شەڕ خراپترین شتە، بەلێ ژ شەڕی خراپتر تەسلیمبوونە.”
هۆشمەندی و بیر و باوەریا بابێ مەزن بەرجەستەکرنا کۆپیتک و ئەڤرازێن خودێناسی و مرۆڤاهیێ یە. ستوون و بنیا تە سەروەری و ڕەوشت، تیتاڵ و بنەمایێن مرۆڤی: پاکڕەوانی، ئازایەتی، شەرەفمەندی، سەرفەرازی، پێکڤەژیان، ڕێز و ڕێزانی بوویە. پێنووس و زانین ژ گۆتنا خودایێ مەزن {الَّذِي عَلَّمَ بِالْقَلَمِ}، دلسۆزی و دلۆڤانی ژ ڕەوشتێ سەروەرێ عالەمێ محەمەد موستەفا (سلاڤێن خودێ لێ بن) «ارْحَمُوا مَنْ فِي الأَرْضِ يَرْحَمْكُمْ مَنْ فِي السَّمَاءِ» بەرقەرار و بلند هەلگرتینە.
ئەڤرۆ ب چوونا پارتی بۆ ناڤ ساڵەکا نوو یا خەبات و شۆڕشگەریێ، بەرپرسیارەتییا مە مەزنتر لێ کرییە.
د ڤان هەلۆمەرجێن ئالۆز و دڤێ رەوشا سەخت دا، نەحەزێن گەلێ کورد ب شێوازێن جودا جودا هەوڵا بێهێزکرنا هەرێما کوردستانێ ددەن؛ پارتی دیموکراتی کوردستان وەک کێلگەکێ قایم بەرامبەر هەموو نەخشە و پلانێن دوژمنان ڕاوەستایە. پاراستڤانێ قەوارەیێ هەرێما کوردستانێ و دەستکەفتێن شۆڕشێن ئەیلوول و گوڵانێ و بەرهەمێ خوێنا شەهیدانە.
“١٦ی تەباخێ وەفادارییا بێپایانە ب ڕێبازا بارزانیێ نەمر، باوەریا ڕەها کو پارتی ستوونا خۆراگریێ و بەرگریێ یە ژ ئاخ و کەرامەتا کوردستانێ، هەتا ب دەستڤەئینانا تەمامەتییا مافێن نەتەوەیی و سەربەخۆییێ ناڕاوەستیت.”
کادر، ئەندام و لایەنگرێن پارتی، و گشت جەماوەرێ سەربەرزێ کوردستانێ! ١٦ی تەباخێ نووکرنا پەیمانێ یە؛ پەیمانا نەچەماندنێ بەرامبەر زۆرداریێ، پەیمانا ئێکڕێزییا نەتەوەیی، و بەردەوامییا خزمەتێ ل بن سەرکردایەتییا ژیرانە یا سەرۆک بارزانی.
سڵاڤ ل گیانێ پاکێ شەهیدێن کوردستانێ و ڕابەرێ مە بارزانیێ نەمر و کاکە ئیدریسێ هەمیشە زیندوو!
بلند و سەربەرز بێت ساڵڤەگەڕا ١٦ی تەباخێ!
بژیت پێشمەرگە ،بژیت کورد، بژیت کوردستان.