پێکڤەژین و هەڤکاریا ئەمنی: کلیل بۆ پاراستنا ئارامیا عێراقێ:
زەنون سلێڤانەی ـ زاخو
د ناڤبەرا مەزنترین ئەرکێن نیشتمانی دا، پاراستنا ئاخ و سەروەریا وەلاتێ مە د رێزێن پێشین دا دهێت. ئەڤرو، عێراق ب قۆناغەکا هەستیار و گرنگ دا دەرباز دبیت، کو تێدا پێدڤی ب یەکگرتن و هەڤکاریا هەمی هێزێن ئەمنی یە. سوپایێ عێراقێ و هێزا پێشمەرگەی، وەکی دوو ستوونێن سەرەکی یێن ئەمنیا وەلاتێ مە، د ڤێ قۆناغێ دا رۆلەکێ مێژوویی دبینن٫
هەڤکاری د ناڤبەرا سوپایێ عێراقێ و پێشمەرگە دا
دیرۆکا پێکڤەبوونا ڤان هەردوو هێزان د بەرەنگاربوونا تیرۆرێ دا، ب تایبەت د شەڕێ ل دژی رێکخراوا تیرۆرستی یا داعش دا، نیشانا وێ چەندێ یە کو دەمێ ئەڤ دوو هێزە د هەڤپشک بن، شیانێن وان بۆ پاراستنا ئاخ و وەلاتی دبنە ئاستەکێ گەلەک بلندتر. هەڤکاری د ناڤبەرا وان دا نە تنێ ل سەر ئاستێ مەیدانی یە، بەلکو ل سەر ئاستێ ئاڵوگۆڕکرنا زانیاریێن هەواڵگری و هەماهەنگیا ئەمنی یا بەردەوامە.
سەقامگێری و سەروەریا وەلات
سەقامگێری یا سیاسی و ئابووری ل عێراقێ بێی سەقامگێری یا ئەمنی ناهێتە دەستەبەرکرن. سوپایێ عێراقێ وەک هێزەکا فیدرال و پێشمەرگە وەک هێزەکا دەستووری یا هەرێما کوردستانێ، ب پێکڤە کارکرنێ دکەنە دیوارەکێ پولایین ل بەرامبەر هەر هەڕەشەکا دەرەکی یان ناڤخۆیی کو بڤێت سەروەریا عێراقێ بێخیتە د مەترسیێ دا.
ئایندەیێ پێکڤەکارکرنێ
پێدڤی یە ئەڤ هەماهەنگییە ب رەنگەکێ رێکوپێک و ب مەرجێن دەستووری بەردەوام بیت. گرنگیا ڤێ هەڤکاریێ ل وێرێ دایە کو پەیامەکێ ددەتە هەمی لایەنێن جیهانی کو عێراق و هەرێما کوردستانێ د ئێکگرتی نە د پاراستنا ئاشتی و سەقامگێریێ دا. دەستکەفتێن ڤان هەردوو هێزان د چەند سالێن بۆری دا، بونە ئەگەرێ وێ چەندێ کو شیانێن عێراقێ بۆ پاراستنا سنوورێن خوە و دابینکرنا ئارامیا وەلاتیاتیان ل هەمی باژێران بهێنە سەلماندن.
