هەڵەبجە: ​سێڤێن ژەهراوی ، کورتە چیرۆکا قڕکرنا مللەتەکی .

​کێمیا بارانکرنا هەڵەبجە تنێ ڕوودانەکا مێژوویی نینە، بەلکو برینەکا کوورە د دلێ هەر مرۆڤەکێ ئازادیخواز و هەر کوردەکێ دا. ل ڕۆژا ١٦ی ئادارا ١٩٨٨ێ، دەمژمێر بەرەو نیڤرۆ دچوو، ل وی دەمی کو سروشتێ کوردستانێ خۆ بۆ بهارێ د خەملاند، ئەسمانێ هەڵەبجە ل شوینا بارانا ڕەحمەتێ، ژەهر و مرن ب سەر خەلکێ سڤیل دا باری.
​ئەوێ ڕۆژێ، بێدەنگییا مرۆڤایەتیێ ل هەمبەر هەوارێن زارۆک و دایکان بوو نیشانا مەزنترین ستەم ل سەدەیێ بیستێ. کیمیابارانا هەڵەبجە ب دەستێ ڕژێما بەعس، نە تنێ هێرشەک بوو بۆ سەر باژێرەکی، بەلکو هەوڵەک بوو بۆ ژناڤبرنا ناسنامە، مێژوو و هیڤیێن مللەتەکی.
​کارەساتا دیمەنێن نەمر
​کیمیابارانا هەڵەبجە کۆمەکا دیمەنێن جەرگبڕ ل پاش خۆ هێلان. کێ هەیە دیمەنێ “عومەرێ خاوەر” ژ بیر بکەت؟ ئەو باوکا کو ب باوەشەکا گەرم کۆرپێ خۆ پاراستی و هەتا مرنێ ژی دەست ژێ بەرنەدا. ئەو دیمەنە بوو سیمبولێ مەزلوومییەت و بێتاوانییا خەلکێ هەڵەبجە. پێنج هزار شەهید و ب هزاران بریندارێن چەکێ کیمیایی، کو هەتا ئەڤڕۆ ژی هندەک ژ وان ب ئێش و ئازارێن وێ ژەهرێ دنالن، شاهدێن زیندی یێن وێ تاوانێ نە.
​هەڵەبجە و پەیاما مرۆڤایەتیێ
​هەڵەبجە بوو “هیرۆشیما”یا کوردستانێ. ئەڤ کارەساتە نیشان دا کو هندەک جاران مفا و بەرژەوەندیێن سیاسی دبنە پەردە ل سەر چاڤێن جیهانێ، تا وی ڕادەیێ کو ب هزاران مرۆڤ ب چەکێن قەدەغەکری ببنە قوربانی و کەس دەنگێ خۆ نەکەت. لێ هەڵەبجە ب خوینا شەهیدێن خۆ، دەنگێ کورد گەهاندە هەمی قوژبنێن جیهانێ.
​ژ ئازارێ بەرەو ئومێدێ
​سەرباری وێ هەمی ئێش و وێرانکاریێ، هەڵەبجە نەمریا. خەلکێ وێ یێ خۆراگر دووبارە باژێر ئاڤا کرەڤە. ئەڤڕۆ هەڵەبجە نەک تنێ باژێرێ شەهیدانە، بەلکو پارێزگەهەکا گەشە و زانست و ڕەوشەنبیریێ یە.

​هەڵەبجە پەیامەکە بۆ هەمی جیهانێ: کو ژەهر و چەکێن کۆمکوژ نەشێن ئیرادا مللەتەکێ تێ تینووی ئازادیێ بشکێنن.

​هەزار سلاڤ ل گیانێ پاک یێ شەهیدێن هەڵەبجە و هەمی شەهیدێن ڕێکا ڕزگارییا کوردستانێ. هەڵەبجە د دلێ مە دا زیندییە و دێ مینیت.

هاشم جومعە سەیداڤایی
16ـی 3ـی 2026