ئیدریس نێچیرڤان بارزانی ٦٨ قوتابیێن سەرکەفتی ل دهۆک و زاخۆ خەلات دکەت
مەکتەبا رێکخستنا پارتی ب پشتەڤانیا دارایی یا ڕێزدار ئیدریس نێچیرڤان بارزانی ٦٨ قوتابیێن سەرکەفتی ل دهۆک و زاخۆ خەلات دکەت
ئەڤرۆ رۆژا دووشەمبی ١٠ی تەباخا سالا ٢٠٢٦ێ، مەکتەبا رێکخستنا پارتی دیموکراتی کوردستان ل پارێزگەها دهۆکێ و ب ئامادەبوونا ڕێزدار مەھدی مزووری نوێنەرێ نڤێسینگەھا جێگرێ سەرۆکێ پارتی دیموکراتی کوردستان و ب پشتەڤانیا ڕێزدار ئیدریس نێچیرڤان بارزانی، د رێوڕەسمەکا تایبەت دا و ب سەرپەرشتیا ڕێزدار سەربەست لەزگین، ئەندامێ مەکتەبا سیاسی و بەرپرسێ مەکتەبا رێکخستنا پارتی، ٦٨ قوتابیێن سەرکەفتی و پلەبڵندێن سەر ئاستێ دهۆک و ئیدارا سەربەخۆیا زاخۆ خەلات دکەت.
د ڤێ رێوڕەسمێ دا، سەربەست لەزگین گۆتارەک پێشکێش کر و تێدا سوپاسیا ڕێزدار ئیدریس نێچیرڤان بارزانی کر بۆ پشتەڤانیا وان ل تەخا قوتابیان و پیرۆزباهی ل قوتابیێن سەرکەفتی و مالباتێن وان کر. ئاماژە ب وێ یەکێ دا کو قوتابی جهێ شانازیا مەزن يا مە و تەڤایا کەس و کارێن خۆنە، و جەخت ل سەر هندێ کر کو پشتەڤانیکرنا کەسێن سەرکەفتی و خودان شیان ئەرکەکێ سەرەکی یێ پارتی دیموکراتی کوردستانە.
بەرپرسێ مەکتەبا رێکخستنێ ڕوون ژی کر کو زانکۆ ب تنێ جهێ وەرگرتنا باوەرنامێ نینە، بەلکو بناغەیەکێ سەرەکی یە بۆ پێگەهاندن، ئاڤاکرنا کەسایەتیا مرۆڤی و گەشەپێدانا خێزانی و جڤاکی. وی داخواز ل قوتابیان کر، د قوناغا نوو یا زانکۆیێ دا پێگەهاندنا زانستی و فکری بکەنە ئارمانجا خۆ یا سەرەکی.
د بەشەکێ دی یێ گۆتارا خۆ دا، سەربەست لەزگین جەخت ل سەر مێژووا پارتی کر د گرنگیدان ب زانست و زانینێ و دیار کر کو پارتیا وان د دژوارترین قوناغێن خەباتێ دا—ژ شکەفت و نهالان بگرە هەتا د ناڤ کەمپێن ئاوارەیێ دا—هیچ دەمەکێ دەست ژ گرنگیدان ب خواندن و پەروەردەکرنا بەرەبایان بەرنەدایە.
ل دووماهیێ، ناڤهاتی هۆشیاری دا ل دۆر بکارئینانا ساخلەم و دروست یا تۆرێن جڤاکی و ئەو یەک ب پێدڤیەکا گرنگ د ئەڤرۆ دا زانی. هەروەسا دەستخۆشیەکا گەرم ل کەس و کار و مالباتێن قوتابیان کر بۆ ئەو مەکوریا وان دابین کری د پێخەمەت گەهاندنا زارۆکێن وان ب ڤێ قوناغا گەش و پر ژ سەرکەفتن.
