هونەری سیاسەت و دیپلۆماسیی نێودەوڵەتی
هونەری سیاسەت و دیپلۆماسیی نێودەوڵەتی
کاتێک هەرێمی کوردستان و ڕۆژاوای کوردستان بەراورد دەکەین، جیاوازییەکان زۆر گەورەن.
سیاسەت و دیپلۆماسی بە دروشم و وشەی بەرز یان زۆریی حیزبەکان ناپێوە. ڕێگای تر هەیە بۆ بەدەستهێنانی پشتیوانیی کۆمەڵگەی نێودەوڵەتی و دروستکردنی لۆبییەکی کوردی کە کاریگەری لەسەر بڕیارە نێودەوڵەتییەکان هەبێت. باشترین نموونەش هێرشە کۆتایییەکان بوون کە لەلایەن حکومەتی سووریاوە دژ بە ناوچە کوردییەکانی ڕۆژاوای کوردستان ئەنجام دران. لەو بارەیەدا، هەرێمی کوردستان بە هەنگاوە دیپلۆماسییە جۆراوجۆرەکانی بۆ چەندین وڵات توانی قەناعەت بە جیهان بهێنێت کە کورد ڕووبەڕووی مەترسییەکی گەورە دەبن. لێرەدا دەتوانین بڵێین ئەو ئەزموونەی حکومەتی هەرێمی کوردستان لە دیپلۆماسی و پەیوەندییە نێودەوڵەتییەکان هەیە، کاریگەرییەکی گرنگی هەبوو بۆ پاراستنی گەلی کورد لە مەترسییەکان.
بەڵام کوردانی سووریا نەیانتوانی متمانەی وڵاتانی ئەورووپی و وڵاتانی عەرەبی بەدەست بهێنن، چونکە بە شێوەیەکی تەواو سوودیان لە سیاسەت و دیپلۆماسیی نێودەوڵەتی وەرنەگرت.
متمانەی وڵاتانی ڕۆژئاوا بە هەرێمی کوردستان گەورەیە، چونکە لە هەرێمدا کەسانێک هەن بە شێوەیەکی بەردەوام لە بواری سیاسەت و دیپلۆماسی کار دەکەن. هەروەها پڕۆژە گەورەکان و بنەماکانی ژێرخان، هێزی زیاتر بە سەرکردایەتیی هەرێم داوە بۆ ئەوەی ببن بە بەشێکی کاریگەر لە سیاسەتی نێودەوڵەتی، تا ئەو ڕادەیەی هەرێمی کوردستان وەک نموونەیەک بۆ ئاسایش و ئارامی لە ڕۆژهەڵاتی ناوەڕاست ناسراوە.
لە بەرامبەردا، کوردانی ڕۆژاوای کوردستان نەیانتوانی بنەمایەکی بەهێزی سیاسی و ئابووری دروست بکەن، هەرچەندە ئەو دەرفەتەیان هەبوو. بەڵام گەندەڵیی سیاسی و ئابووری ڕێگەی لەوە گرت.
لە لایەکی دیکەشەوە، پشتگوێخستنی بڕیارەکانی هێزە گەورە نێودەوڵەتییەکان و گرنگی نەدان بەوان، بووە هۆی گەیشتن بەو دۆخەی ئێستا.
ئەمڕۆ لە سووریا دەرفەتێکی کۆتایییان هەیە؛ ئەویش بەدەستهێنانی کات بۆ ڕێکخستنەوەی ناوخۆیان، نوێکردنەوەی ڕێکخستنی حیزبە سەرەکییەکان و پێکهێنانی هێزێکی سیاسی. لەم ڕووەوە، هەرێمی کوردستان هیچ هاوکارییەکی لێیان قەدەغە نەکردووە.
نیشتمان بە دروشم و درۆ بنیاد نانرێت.
جیهاد ادهم
روژنماوان
