خەلک و دەستهەلات: دناڤبەرا ئەرکێ خزمەتکرنێ و دەنگێ نەرازیبوونێ دا ؛
زەنون سلێڤانەی
پەیوەندیا دناڤبەرا دەستهەلاتێ و خەلکى دا، بڕبڕەپشتا هەر کۆمەلگەهەکا ساخلەم و پێشکەفتییە. ئارمانجا سەرەکی یا هەر دەستهەلاتەکێ دێ هەمیشە خزمەتکرنا وەلاتییان و دابینکرنا ژیانەکا شەرەفمەندانە بیت. لێ د ڤێ ڕێیا درێژ دا، گەلەک جاران گرژی و نەخۆشی دکەڤنە دناڤبەرا ڤان هەردوو لایەنان دا، کو د ئەنجام دا دبنە سەدەمێ تورەبوون و گلەیێن وەلاتییان.
خزمەتکرنو ئەرکێ سەرەکی یێ دەستهەلاتێ
دەستهەلات، ب هەمی ئاستێن خۆ ڤە، ب کارێ خزمەتکرنێ رادبیت. ئەڤ خزمەتکرنە نە ب تنێ داکۆکیکرنە، بەلکو ئەرکەکێ ئەخلاقی، یاسایی و نیشتمانییە. دەمێ دەستهەلات دەستپێشخەریێ دکەت بۆ باشترکرنا ژێرخانا ئابووری، پەروەردێ، ساخلەمیێ و دابینکرنا دەلیڤێن کارێ، خەلک هەست ب هەبوونا دەستهەلاتەکێ دکەت کو بڕاستی پەرژانا وان دکەت. لێرەدا، متمانە دناڤبەرا وەلاتی و دەستهەلاتێ دا دروست دبیت و ئارامی ل جڤاکی بەلاڤ دبیت.
سەدەمێن گلەیی و تورەبوونا خەلکی
هندەک جاران، دناڤبەرا خواستێن خەلکی و توانایێن دەستهەلاتێ دا بۆشاییەک دروست دبیت. ئەڤ بۆشاییە دێ بیتە سەدەمێ گلەییان. هندەک ژ وان سەدەمان ،
کێمبوونا شەفافیەتێ نەبوونا روونکرنێن راستەوخۆ بۆ خەلکی دەربارەی گرفتان.
خەلەتیێن ئیداری: هندەک جاران گەندەلی یان بێباکیا هندەک فەرمانبەران د گەهاندنا خزمەتگوزارییان دا، وەلاتییان تورە دکەت، پێویستیێن روژانە
پاشگوهـ ئێخستنا داخوازێن بنەڕەتی (وەکی کارەبا، ئاڤ، و مووچەی) دێ بیتە سەدەمێ کو جاددە و سۆشیاڵ میدیا ببنە جهێ دەربڕینا ڤێ تورەبوونێ.
چەوانیا چارەسەریێ و ئاراستەکرنا پەیوەندییان
بۆ ئەوەی ئەڤ گرژییە کێم ببن و پەیوەندی بەرەو باشتر بچن، پێدڤییە ئەم ل سەر دوو خاڵان بوەستین،
ژ ئالیێ دەستهەلاتێ ڤە پێدڤییە دەستهەلات ب دڵفەرهی گوێ ل دەنگێ نەرازیبوونێ بگریت. گلەیێن خەلکی نە دژایەتیکرنە بەلکو ئاماژەنە بۆ وێ یەکێ کو کێماسییەک هەیە و دڤێت بهێتە راستڤەکرن. شەفافیەت و دادپەروەری د دابەشکرنا خزمەتگوزارییان دا، باشترین دەرمانە بۆ تورەبوونا جڤاکی.
ژ ئالیێ خەلکی ڤە دیمۆکراسی و ئازادیا دەربڕینێ مافەکێ ڕەوایە، لێ دڤێت ئەڤ رەخنە و گلەییە ب رێیێن شارستانی بن، داکو ئارمانج ژێ هەر نە چارەسەری و پێشڤەبرنا وەڵاتی بیت، نە تێکدانا رەوشێ.
ل دوماهیێ، دەستهەلات و خەلک دناڤ یەک کەشتیدا نە. هەر دەرزیەک د وێ کەشتیێ دا بیت، هەر دوو لایەن دێ زیانێ بینن، و هەر پێشکەفتنەک ژی دێ ب ڤێ کەشتیێ ڤە بیت. دەستهەلاتا سەرکەفتی ئەو دەستهەلاتە یا کو ب چاڤێن ڕێزێ ل گلەیێن خەلکێ خۆ دمینیت و خزمەتکرنێ دکەتە سەنتەرێ کارێ خۆ، و وەلاتییێ سەرکەفتی ژی ئەوێ یێ کو ب رەخنێن خۆ یێن ب مفا، هەڤکارێ دەستهەلاتێ د بیت بۆ گەهشتن ب ئارمانجێن بلند.
هێڤییە داهاتێ مە هەمییان پڕ بیت ژ هەڤکاری و بجهئینانا داخوازێن رەوایێن وەلاتییان ؛
