هەلەبچە پایتەختێ قوربانیدانێ، پێگەهێ رێزگرتن و ڤیانێ

زەنون سلێڤانەی ـ زاخو

پێدڤیە ب رێز و سۆز ڤە، بێهنەکێ ل سەر باژێرەکێ ب راوەستین، ئەو باژێرێ بوویە نیشانا مەزن یا ستەمێ و د هەمان دەم دا، بوویە ئالا و نیشانا بلند یا بەرخودانێ و مروڤایەتیێ. ئەو باژێرێ هەلەبچە یە، ئەوێ ناڤێ وی ل هەر چار پارچێن کوردستانێ و ل هەر جهەکێ جیهانێ، هەستەکێ تێکەل ژ ئازارێ و شانازیێ د دڵێن مە دا چێدکەت.
هەلەبچە؛ برینەک کو بوو دەرگەهێ ئازادیێ
هەلەبچە ب تنێ نە باژێرەکە ل سەر نەخشەیی، بەلکو بوویە “ناسنامە”. ل وی رۆژێ کو چەکێن کیمیاوی ل دژی زارۆک، ژن و پیرێن ڤی باژێری هاتنە بکارئینان، دوژمنی د ڤێ باژێرێ دا مروڤایەتی د کرە ئارمانج. لێ هەلەبچە، د ناڤ وێ دووکەلا رەش و وێ ئازارا بێ وێنە دا، نەهاتە شکاندن. بەلکو بوو ئەو هێزا مروڤایەتیێ کو جیهان هەموو ل سەر ئازارا گەلێ مە هشیار کر. هەلەپچە بوویە پێگەهێ رێزگرتن و ڤیانێ ،
ئەم ئەڤرۆ ل ڤێرێ نە، نە بتنێ ژ بۆ گریانێ، بەلکو ژ بۆ رێزگرتنێ ل ڤێ “باژێرێ ئەنفالکری”. رێزگرتن ل وان شەهیدێن کو ب تنێ ب سەدەمێ کوردبوونا خوە، ب وی رەنگێ دڕندانە هاتنە شەهیدکرن. رێزگرتن ل وان دایک و بابێن کو ل وێ رۆژێ د رێیا پاراستنا زارۆکێن خوە دا، گیانێ خوە دانا. هەلەبچە ئەڤرۆ ل دەڤ مە، جهێ پیرۆز یێ بیرئانینێ یە، جهێ وێ یە کو مرۆڤ لێ دبینیت کو چەوا گەلەکێ دکاریت ل بەرامبەر ستەمێ رابیت و سەرێ خوە نەتەڤینیت ،
دیسان هەلەبچە بۆ مە جهێ ڤیانێ یە. ڤیانا ئاخێ، ڤیانا مرۆڤایەتیێ، و ڤیانا ئاشتیێ. هەلەبچە ل پشتی وێ کارەساتێ ژی، ب هێز ڤە ژێر باخێ خوە یێ ئاشتیخواز رابوو و پەیاما خوە گەهاندە جیهانێ کو گەلێ کورد گەلەکێ ئاشتیخوازە و دڤێت ب رێز و تەناهی د ناڤ دەولەتا خوە دا بژیت.،
هەلەبچە د دڵێ مە هەموویان دا یە. هەر دەمێ ئەم ناڤێ هەلەبچێ دبیستین، ئەم فێری وانەیا مەزن دبین: کو دۆزەکا رەوا، ئیرادەکا ب هێز، و رێزگرتنا ل خوینا شەهیدان، دێ کێلیەکێ ژی بیت، ئازادیێ بۆ مە مسۆگەر کەت.
بلا هەلەبچە ل بیرا مە دا بمینیت، نە ب تنێ وەکی باژێرەکێ بریندار، بەلکو وەکی وێ چرایێ کو رێیا مە بەرەڤ ئازادیێ و سەرکەفتنێ رۆهن دکەت؛