ڕاگەهاندنا نشتیمانی و هەستا نشتیمانی

غیاس خالد زێباری

رەنگە زۆر جارا هاتبینە گۆتن کو زێدەتر ل پێدڤیبوونێ کوردا کەناڵ و دەزگەهێن راگەهاندنێ هەنە، ب تایبەت کەناڵێن ئاسمانێ . لێ روودانێن رۆژئاڤایێ کوردستانێ و ئەو پیلانێن نیڤدەولەتی و هەرێمایەتی و هێرشێن هۆڤانە یێن لەشکرێ عەرەبیێ دەولەتا سووریا دژی رۆژئاڤایێ کوردستانێ و وان بنپێکرنێن قانوونی و مرۆڤاتی د ژی خەلکێ وان دەڤەران دیارکر، چەند کەناڵێن راگەهاندنا نشتیمانی و نەتەویی هەبن هەر کێمە، چونکی دیار بوو کۆ هێزا راگەهاندنێ ل هێزا دبلۆماسی و سیاسی و ئابووری و لەشکری بهێزتر و کاریگەرترە . ژمارەکا کەناڵێن راگەهاندنا کوردستانی ل سەرانسەرێ جیهانێ شۆرەشەکا بەرفرەهــ بەرپاکر، ژلایەکێ هەستا نەتەوەیی و نشتیمانی دناڤ خەلکێ کوردستانێ بهێزتر کر و هەر وەڵاتیەکی ئەکاوتن و پێگەهێن خوە یێن سۆشیال میدیایێ کرنە چەپەر و سەنگەرێن پاراستن و بەڕەڤانیکرنێ ل رۆژئاڤایێ کوردستانێ، بێ لبەرچاڤگرتنا ژێیاتی و ناکۆکیێن حزبایەتی. ژلایەکێ دیتر وان کەناڵێن راگەهانێ و پەیامنێرێن وان ب هەستەکا نشتیمانی دەنگ و رەنگێ وێ زۆرداریا ل خەلکێ رۆژئاڤایێ دهێتە کرن، گەهاندە سازیێن نیڤدەولەتی و سەنتەرێ وەڵاتێن بریار بدەست و کاریگار لسەر ئاستێ جیهانێ نەخاسمە ئەمریکا و ئەورۆپا و نەتەوەیێن ئێکگرتی . ڤێ هەوا کەناڵێن ڕاگەهاندنا نشتیمانیا کوردستانێ و سۆشیال میدیایێ، هەر زوو خەلکێ کورد یێن نشتیمان پەروەر ل باژارێن کوردستانێ و پڕانیا وەڵاتێن جیهانێ ئینانە سەر جاددا بۆ پشتەڤانیا خەلکێ رۆژئاڤایێ کوردستانێ و ماندەلکرنا وێ زۆرداریا لێ دهێتە کرن و کاریگەریەکا باش هەبوو و شیان هەڵویستێن زۆر وەڵاتان بگۆهڕن و نەچار بکەن پشتەڤانیا مافێن خەلکێ کوردستانێ بکەن و هەڵویستێ دەولەتا سووریا نەرمتر بکەن و بەرەڤ ئاشتەوایێ و رێکەفتنێ بهێن .
ژلایەکێ دیتر ڤان روودانێن رۆژئاڤایێ کوردستانێ و ڤێ شۆرەشا ڕاگەهاندن و سۆشیال میدیایا نشتیمانیا کوردستانی، ئەو پڕ و پاکندە نە ڕاست دیاکرن کو هەستا نەتەوەی و نشتیمانی دناڤ خەلکێ کوردستانێدا لاواز بوویە، بەرۆڤاژی خەلکێ کورد خەلکەکێ نشتیمانپەروەر و خودان هەستەکا بلندا نەتەویی یە . ئەڤ هەڵویستێن کەناڵێن راگەهاندنا کوردی ب تایبەت کەناڵێن ئاسمانی و پەیامنێرێن هێزا راستا راگەهاندنێ دیارکر و تەکەز کر کۆ چەند کەناڵێن راگەهاندنێ هەبن هەر کێمە و پێدڤییە هەرێما کوردستانێ و ئالیێن سیاسی یێن کوردستانێ لسەرانسەرێ کوردستانێ گرنگیەکا زێدەتر بدەنە کەناڵ و سازیێن راگەهاندنێ و هەمی پێکڤە راگەهاندنێن خوە بکەنە راگەهاندنێن نشتیمانی و بڤی رەنگی لسەر ئاستێ جیهانێ شۆرەشێن گەهاندنا دەنگ و مافێن خەلکێ کوردستانێ و وێ زۆرداریا بەرامبەر دهێتە کرن بگەهیننە سەرنتەرێ بریارێن نیڤدەولەتی و پشتەڤانیێ بۆ ماف و ئازادیا کورد و کوردستانێ دابین بکەن .