مەزارگەهێن نەمران: قیبلگەها هەست و هشیاریانەتەوەیێ یا هەمی کۆردانە

نڤێسین ؛ زەنون سلێڤانەی

د مێژووا گەلەک نەتەوەیان دا، هندەک جهـ هەنە کو ژ سنورێن جوگرافیایێ و کێلیێن مێژوویی دەرباز دبن، و دبنە رامانەکا پیرۆز، قیبلگەهەکا ڕۆحی یا کو مرۆڤ تێدا خۆ ل ناڤ رەهـ و قوربانیێن نەتەوەیا خۆ د دیتڤە. مەزارێ بارزانیێ نەمر، ل باژێرێ بارزانێ سەرفراز، ئێدی نە تنێ جهەکێ ئارامکرنا گۆڕەکی یە، بلکو بوویە ئاڤاهییەکێ مەزن یێ هزر، خۆڕاگری و نیشتمانپەروەریێ، قیبلگەها هەموو ئەو کەسێن کو باوەریا وان ب ئازادی و سەربەخۆییێ هەەی.
بارزانیێ نەمر تنێ سەرکردەکێ سیاس نەبوو، بلکو ڕێبازەک بوو، قوتابخانەیەک بوو کو تێدا وانەیێن نەترسن، لێکتێگەهشتن، و سەربریا بەرخودانێ هاتنە نڤیسین. هەر پەیڤەکا ژ لایێ وی ڤە هاتییە گۆتن، هەر گاماوەکا ل سەر رێکا تێکۆشانێ هاتییە هاڤێتن، بوونە نەخشەیا رێکا خەباتا کوردایەتیێ. و ئەڤرۆ، دەما مرۆڤ سەرا مەزارێ وی ددەت، مرۆڤ نە تنێ بۆ ڕێزگرتنەکا سادە دچە، بلکو بۆ تێرکرنا ناخێ خۆ ب وێ هێزا مۆنۆمێنتال و شکۆدار دچە کو ژ کێل و خاکا وی بلند دبت.
ئەڤ قیبلگەها نەتەوەیی، ل هەر وەرزەکی و ل ژێر هەر بارودۆخەکی دا، جهێ کۆمبوونێ یە بۆ خەباتگێڕ، رەوشەنبیر، نڤیسکار و هەموو پارچێن ڤی گەلی یێن کو بێهیڤی ل دەڤ ژیانێ نەبووینە. مرۆڤ ل وێرێ هەست ب هندێ دکەت کو بوری، نوکە و پاشەڕۆژ ب ئێکدیڤە گڕێدایی نە. خوینا پاکا شێخ ئەبدولسەلامێ بارزانی، قوربانیێن قۆناغێن جودا، و رێبازا نەمریان، هەمی د ناڤ وێ ئارامگەهێ دا دبنە ئێک پەیڤ: خۆراگری تا گەهشتمە مەرەمێ.
هەبوونا مەزارێ بارزانی وەکی قیبلگەها کوردان، مە بۆ پاشەڕۆژێ هایدار دکەت کو ئازادیا ئەڤرۆ ب بایی گران هاتییە ستاندن. پێدڤییە ئەڤ جهە نە تنێ جهێ سەرەدانەکا وەرزێ بیت، بلکو نەخشەیا ڕۆژانە یا مێژووا مە بیت، دا کو نەوەیێن نوو بزانن کو ڕێکا سەربەخۆیی و مرۆڤایەتیێ چەندە پێدڤی ب ڕژدبوون و پاکییا نیتشمانپەروەریێ هەیە