کورتە چیروک: (دوو هەڤالێن سەیر)
هەڤالێنی د ڤێ ژیانێ دا گەلەک رەنگ هەنە ، ئەم مروڤ وەسا هزردکێن کەنی و گری دژی ئیکن دراستی دا وەسانینە ئەو هەر دوو هەڤال هند نێزیکێ ئێکن کو چ جاران ئەم نەشێن وان ژ ئێک و دوو جودا بکەین ، ئەو هەردو هەڤال ئیک کەنیە و ئیک گریە. ئەگەر مرۆڤ ل دەستپێکێ بەرێ خۆ بدەتێ، دێ بێژیت هەر دوو چەند ژ ئیک دویرن هەر وەکو شەڤ و ڕۆژان ناگەهنە ئێک، بەلێ ئەو هەردوو ژ ئێک هێلین دەردکەڤن، کو ئەو ژی دلێ مرۆڤی یە. وەرن دا گۆهبدەینە ڤێ چیروکاهەڤالینیا ئاشوپی د ناڤبەرا وان دا.
گری و کەنی ڕۆژەکێ ژ روژان ل ناف باخچەکێ خەملین جوان و ل بن سێبەرا دارەکا رەنگین، کەنی و گری پێکڤە ڕوینشتن خوار دا دهردێ دلێ خۆ بۆ ئێک بێژن . کەش و هەوایەکێ ناڤنجی دهات و ئەردی ب گولێن رەنگ ورنگ خو خەملاندبو پیچەکێ یێ شل بوو ژ بەرکو بارانا بارینا بەری چەند روژێن بوری .
کەنیێ ب دێمەکێ بەشوش و چاڤێن گەش بەرێ خو دا گریێ و گۆتێ: ئەرێ تو بۆچی هند یێ ناف جاڤ گرێی و دار گران و خوین تەحلی هەما هەر مروڤ قەت حەژتە ناکەن؟ هەر دەمێ تو دئامادە دبی نەخوش زیدە دبن و چاڤ سۆر دبن و دل تەنگ دبن. بۆچی تو وەک من یێ رەح و سەفک نینی و کەیف و خۆشیێ نادەیە دلێ مرۆڤان؟
گریێ ب دەنگەکێ ئارام و خەمگین بەرسڤ دا و گۆت: خۆزیکێن تە کەنیێ تو یا ڕەح سڤکی و هەمی مرۆڤ حەز ژ تە دکەن ژبەرکو تو دلێ وان خۆش دکەی. بەلێ پا باوەر بکە ئەز نە دژی تە مە. ئەز دهێم دا وی بارێ گران یێ خەمێ یێ کو تە نەشیا ب ب دەڤێ کەنیێ سڤک بکەی. ئەز وی باری گران ب روندکێن چاڤان سڤک بکەم دلی پێ ئارام بکەم
کەنیێ سەرێ خۆ هەژاند و گۆت: ئەو چەندە ژی ڕاستە، بەلێ پا مرۆڤ ب کەیف و کەنیا من دژین ئەز نیشانا سەرکەفتنێ مە، ئەز ل سەر لێڤێن زارۆکان مە دەمێ یاریێ دکەن، وئەز ئامادەمە د ناڤ هەر خێزانەکا کەیف خۆشیێ دناڤ داهەبیت . ب کورتی ئەز ژیانێ ب جوانی دگوهورم . گریێ ئاخینەکێ ڕاهێلا و
گوت : ڕاستە، تو ڕەنگەکێ گەش جوان ددەیە ژیانێ . بەلێ پا ئەگەر ئەز نەبم، دلێ مرۆڤی دێ ژ بەر ئازاران دا توشی نەخوشێن مەزن بن و دا ژناف چن . دەمێ خەم دبنە چیا ل سەر سەرێ مرۆڤی، ئەگەر ئەز نەبم مرۆڤ نەشێت بژیت. ڕوندکێن من وەک ئاڤا پاقژکەرن، وەک ژێبرکی خەمێ ژ سەر دێمێ وان ژێ دبەت . پا تو چ دبێژی بۆ وان ڕوندکێن کەیفخۆشیێ کو ژ بەر کەیفێ دبارن ل وێرێ ئەز و تو دبینە ئێک و رولێ مە وەکی ئیک لێ دهیت .
کەنی پێچەکێ بێ دەنگ بوو، پاشی ب نەرمی گۆت: ڕاست دبێژی.من چ جاران هزر د ڤێ چەندێ دا نەکربوو. گەلەک جاران من ددیت مرۆڤ ژ کەیفا دا دگرین، لێ هەر من دگۆت ئەز ب تنێ تيرا وێ چەندێ هەمە.
گریێ گۆتێ: نەخێر هەڤال، مرۆڤ پێدڤی ب مە هەردووانە. تو ڕووناهیا وانی و ئەز ژی ئارامیا وانم. ئەگەر ئەز نەبم، مرۆڤ قەدرێ تە ژی نزانن و ئەگەر تو نەبی، مرۆڤ د ناڤ خەمێن من دا دێ خەندقن.
ل دوماهیێ، هەردووان دەستێن خۆ کرنە دەستێ ئێک دا و پێکهاتن گوت ئەم هەردوو پێکڤە دجوانین و ل بەر سیبەرا دارێ ئەو کەش و هەوایێ خۆش هەڤلینیا خۆ پتر ب هێز ئیخست ، وان زانی کو ژیان بێ ئێکی ژ وان ب تنێ بڕێڤە نا چیت. ئەوان پێکڤەسوزو پەیمان نوی کرن دا کو هەڤسنگیێ د ناڤبەرا دلێ مرۆڤیان دا پەێدابکەن .
نڤێسکار : رەحیما بەرواری
