١٤ی ئادارێ؛ ڕۆژا ژدایکبوونا هیڤی و ئیرادا گەلێ کورد.
کەس و کارێن سەربلند یێن شەهیدان،
پێشمەرگێن قەهرەمان، پارێزەرێن ئاخ و کەرامەتێ،
کوردستانیێن خۆراگر و نیشتیمانپەروەر..
ئەڤرۆ، ١٤ی ئادارێ، رۆژا گەشبینا ئاسۆیا کوردستانێ و سالرۆژا ژدایکبوونا سمبولێ نەتەوەیی و رێبەرێ بزاڤا رزگاریخوازییا گەلێ مە، جەنابێ بارزانیێ نەمر (مستەفا بارزانی) یە.
١٢٣ سال بەریا نوکە، د قوناغەکا تاری یا دیرۆکا مللەتێ مە دا، ل دەڤەرا بارزان رێبەرەک چاڤێن خۆ ل جیهانێ ڤەکرن کو ببوو تیشکا هیڤیێ بۆ مللەتەکێ بن دەست. ژدایکبوونا بارزانی تەنێ رویدانەکا خێزانی نەبوو، بەلکو وەرچەرخانەکا مەزن بوو بۆ ڤەژاندنا روحا نەتەوەیی. ئەو زارۆکێ دناڤ ژوورێن تاری یێن زیندانێن عوسمانی دا ل گەل دایکا خۆ مەزن بووی، داهاتوویێ مللەتەکێ ل سەر شانیێن خۆ هەلگرت.
بارزانیێ نەمر، قوتابخانەیەکا خەباتێ دامەزراند کو ل سەر بنەمایێ “یان کوردستان یان نەمان” هاتبوو ئاڤاکردن. وی سه‌لماند کو کورد مللەتەکێ ئاشتیخوازە، بەلێ چ جاران دەستبەرداری ئاخ و کەرامەتا خۆ نابیت. خەباتا وی تەنێ دناڤ چیا و سەنگەران دا نەبوو، بەلکو خەباتەکا دبلۆماسی و سیاسی یا مەزن بوو بۆ ناساندنا دۆزا کورد ل سەر ئاستێ جیهانێ. ژ پشکداریکرنا وی د کۆمارا کوردستان ل مەهاباد هەتا مەلحەمەیا “هەندرێن” و “رێپێڤانا دیرۆکی بەرەڤ سۆڤیەتێ”، بارزانی نیشا جیهانێ دا کو ئیرادا گەلێ کورد ناهێتە شکاندن.
ئەو قوتابخانەیا بارزانیێ نەمر ل سەر دەستێن وی هاتیە ئاڤاکردن، تەنێ قوتابخانەکا سەربازی نەبوو، بەلکو قوتابخانەیا رەوشت، وەفاداری، و پێکڤەژیانێ بوو. وی دناڤ شۆرەشا ئەیلوولا مەزن دا، هەمی تەخ و چین، هەمی ئایین و نەتەوە دبن سێبەرا ئالایێ کوردستانێ دا کۆمکرن. وی فێری مە کر کو هێزا مە د ئێکڕێزییا مە دا یە.
خوشک و برایێن هێژا..
ئەڤرۆ، دەما ئەم یادی دکەین، ئەم نە تەنێ باسێ رابردوویەکێ زێڕین دکەین، بەلکو ئەم پەیمانێ بۆ وێ رێبازا پیرۆز نوو دکەینەوە. رێبازا بارزانی چراگۆپایە بۆ هەر کوردەکێ کو ب ئازادی دژی. ئەرکێ مە یێ پیرۆز یێ ئەڤرۆ ئەوە کو ب وێ ئیرادا پۆلایین یا بارزانی، پارێزگاریێ ل قەوارەیێ هەرێما کوردستانێ و دەستکەفتێن خوینا هزاران شەهیدان بکەین.
ئەڤرۆ هەرێما کوردستانێ، کو بەرهەمێ وێ خەباتا درێژخایەنە، پێدڤی ب وێ رەوشت و سۆزا بارزانی هەیە بۆ ئاڤاکرنا پاشەرۆژەکا گەشتر بۆ نەوەیێن داهاتی.
ل کۆتاییێ، د ئەڤرۆیەکی دا، سەری ل هەمبەر مەزناهییا بارزانیێ نەمر دچەمینین. هزار سلاو ل سەر گیانێ پاکێ وی و هەمی شەهیدێن رێکا ئازادیێ و سەروەرێ شەهیدان ئدریسێ هەمیشە ساخ.
بژیت کورد ، ئاڤەدان بیت کوردستان ، و بلند و شەکاوە بیت ئالایێ پیرۆزێ کوردستانێ.
هاشم جومعە سەیداڤایی
14ـی 3ـی 2026
