مەغریب ڕێز لە ترەمپ دەگرێت ڕێگایەکی ستراتیژی بەناوی ئەوەوە ناونراوە بەهۆی هەڵوێستی لەسەر سەحرای ڕۆژئاوا
لە نامەیەکدا کە پاشای مەغریب محەمەد شەشەم بۆ دۆناڵد ترەمپ سەرۆکی ئەمەریکا ناردووە، جەختی لەوە کردووەتەوە کە مەغریب بڕیاری داوە یەکێک لە ڕێگا سەرەکییەکانی وڵاتەکە بە ناوی ترەمپەوە ناوبنێت.
هەفتەی رابردوو، ترەمپ خۆی لە پۆستێکدا لە پلاتفۆرمی “تروث سۆشیال” سوپاسی پاشا محەمەد شەشەم کرد. لەگەڵ ئەوەشدا، دەسەڵاتدارانی مەغریب لەو کاتەدا هیچ ڕاگەیەندراوێکی فەرمییان سەبارەت بە گۆڕینی ناوی شەقامەکە بڵاونەکردووەتەوە.
دواتر ئاژانسی هەواڵی فەرمی مەغریب نامەیەکی پاشای بۆ سەرۆکی ئەمەریکا بڵاوکردەوە و تێیدا جەختی لەوە کردەوە کە ناونانی شەقامەکە بە ناوی ترەمپەوە “دەربڕینی سوپاسگوزارییەکی قووڵ” بوو.
ئەم ڕێگایە لە سەرەتادا پێی دەگوترا ڕێگای خێرای تیزنیت-داخلا و بەناو ئەو ناوچەیەدا درێژ دەبێتەوە کە بە سەحرای ڕۆژئاوا دادەنرێت. مەغریب کۆنترۆڵی زۆربەی ئەم ناوچە جێناکۆکە دەکات و بە بەشێک لە خاکی سەروەری خۆی دادەنێت و بەرەی پۆلیساریۆ کۆنترۆڵی هەندێک بەشە دەکات و داوای سەربەخۆیی بۆ ناوچەکە دەکات لە جیاتی خەڵکی سەحراوی.
درێژی ڕێگاکە نزیکەی 1055 کیلۆمەترە و شا محەمەد شەشەم لە پەیامەکەیدا بە تەوەرێکی ستراتیجی وەسفی کردووە.
