مەرگەساتا ئێزدیان: برینەکا نەتەوەیی یە، نە کارتەکا هەڵبژارتنان!
زەنون سلێڤانەی ـ زاخو
دیاردهیا هەرە نەجوان و نەئەخلاقی د گۆڕەپانا سیاسی یا ئەڤڕۆ دا، ئهوه کو هەندەک حیزبێن ئۆپۆزسیۆنێ هەوڵ ددەن کێشە و مەرگەساتێن مەزن یێن نەتەوەیی وەک کارتەکا ئامادە بۆ ڕیکلاما سیاسی و حەلالکرنا خۆ بکاربینن. ئێک ژ ڤان برینێن ڕەش و زێڕین، مەرگەساتا قڕکرنا کوردێن ئێزدی و ڕوودانێن شنگالێ یە.
مەرگەساتا ئێزدیان برینەکا تەزینەر و نەتەوەیی یە د جەستەیێ هەمی کوردستانیان دا، نە بابەتەکێ حیزبی یە کو ئۆپۆزسیۆن خۆ پێ مەزن بکەت یان ژ کیستێ خوینا شەهیدان و نالینا ژن و زارۆکێن رەڤاندی یاریێن سیاسی بکەت. حەلالکرنا پێگەهێ حیزبی ل سەر حیسابا ئێش و دەردێن خەڵکەکێ بریندار، نە تنێ بێڕێزی یە بەرامبەر مێژوو و قوربانیان، بەلکێ نیشانا هەژاریا پرۆژە و ئانالیزا ڕاستەقینە یا سیاسی یە.
ئۆپۆزسیۆنا ڕاستەقینە ب پێشکەشکرنا پرۆژێن ب هێز بۆ ئاڤەدانکرنا شنگالێ، دابینکرنا مافێن ڕەوا یێن ڕزگاربوویان، و کارکرن بۆ ئینانا دادپەروەریێ دهێتە مەزندرن، نە ب بکارئینانا درووشمێن گەرم ل سەر سەکۆیێن میدیایی. ئازارا خەڵکێ مە پێدڤی ب چارەسەری و خەمخۆریێ یە، نە ب بازرگانیکرنێ ل بازاڕێ هەڵبژارتن و ململانێیێن دەسەڵاتێ دا.
