سەرهایتیەک ژ سەرهاتیێن فلکووری( وهەر دوو چاڤێن خۆ نقاندن )
دبێژن دو برایێن ئێك هەبوون، ئێكێ دەولەمەند بوو و ئێكێ هەژار بوو. خەلکێ وێ گوندی گەلەک گازندە ژ برایێ دەولەمەند دکرن و دگۆتێ:
تو بوچی هاریکاریا برایێ خۆ ناکەی؟ ئەو یێ هەژارە و خودان زارۆکە. ئەگەر نە ژ بەر وی ژی بیت، هەما بلا بیچەکێ دلێ تە ب برازیێن تە ڤەبیت.
برایێ دەولەمەند هندی دگۆت: ڕزق یێ دابەشکرەیە و چ ژ دەستێن من ناهێت ئەز بۆ برایێ خۆ بکەم، ژ بەر کو من ئەو شیان نینن. ئەڤە شۆلا خودێ یە، ئەگەر بڤێت دێ ڕزقێ وی ژی زێدە کەت دەولەمەند کەت. بەلێ هەر خەلکی ب چاڤەکێ نزم بەرێ خۆ ددا برایێ دەولەمەند و لۆمە ژێ دکرن.
برایێ دەولەمەند نەچار بوو د ناڤ ڕوونشتنەکا ڕەهسپیێن گوندی دا ڕوونشتە خوار و گۆت:
گەلی برایێن عەزیز، ئەڤە ب شەهدەییا هەوە، ئەز دێ مالێ خۆ هەمیێ دەمە برایێ خۆ. هەمیان سەحکرە ئێك و دوو کا ئەڤە تو ژ ڕاستا وە دژبێژیت؟ وی گوت ئەز دبێژم بو هەوە جهێ حێبەتیێ یە بەلێ، ئەڤا هەوە ب گۆهـێن خو لێ بووی ڕاستی یە.
بەلێ برایێ دەولەمەند گۆت: من ژی مەرجەکێ هەی.
وان ژی گۆت: کەرەمکە، مەرجێ خۆ بێژە.
گۆت: ئەز دێ مالێ خۆ هەمیێ کەمە د کیسەکێ مەزن دا و دێ دانمە د ڕێکا برایێ خو وی دا. ئەگەر وی دیت، بلا هەمی بۆ وی بن و من چ نەڤێت. لێ ئەگەر وی کیس نەدیت، ئیدی هوین چ گازندە و لۆما ژ من ناکەن.
ئەو ان مرۆڤان د ناڤبەرا خۆ دا گەنگەشەکر؛ هندەکان دگۆت گونەهە، پا ئەگەر دیت ئەڤە پارە بۆ وی مان. هندەکان ژی دگۆت ئەگەر دیتن ئەو دیارە پارە ڕزقێ وی یە، پشتی گەنگەشاوان ب دوماهی هاتی هەمی بۆنە ئێك بۆچوون و ڕازیبوون.
برایێ دەولەمەند ژی سۆزا خۆ ب جهـ ئینا، پاریێن خۆ کرنە د کیسکی دا و ئینان، گۆت: دێ هەڤالان، دا ب ڕێ بکەڤین.
برایێ هەژار یێ ژ مزگەفتی بەرەف مالا خۆ دچیت. ئەوان ژی ئەو کیسێ پاران دانا د ڕێکا وی دا و خۆ ل پشت ڕێکێ ڤەشارت. دلێ وان یێ هزار ئاوازان دبێژیت کا دۆماهیا پاران دێ چ لێ هێت و دێ بو کێ مینن.
برایێ هەژار نێزیکی پاران دبیت، چاڤێن خۆ نقاندن هەتا ژ وان پاران دەرباز بووی، پاشی چاڤێن خۆ ڤەکرن! ئەو کەسێن خۆ ڤەشارتین دگەل خودانێ پاران ژ پشتا ڕێکێ دەرکەفتن و د حێبەتی مان؛ بۆچی چاڤێن خۆ نقاندن هەتا ژ پاران دەرباز بووی شنی چاڤێن خۆ ڤەکرن؟
برایێ دەولەمەند کیسێ پاران ب پشتا خۆ ڤەدا و گۆت: من گۆتە هەوە ڕزق یێ د دەستێن خودایێ مەزن دا یە، لێ ئەڤە هوین شاهدن و ئیدی کەس ژ هەوە چ گازندا و لۆمەیان ژ من نەکەن و قەستا مالا خۆ کر و چوو.
لێ ئەو مرۆڤێن دگەل دا بڕیار دا بچنە مالا هەژاری دا بزانن بۆچی چاڤێن خۆ نقاندن هەتا ژ وی کیسی دەرباز بووی. گەهشتنە بەر دەرگەهێ مالا وی، دەرگەهێ وان قوـتا. وی دەرگەهـ ڤەکر و کەیفا خۆ گەلەک پێ ئینا، چایە دانا بەرسینگێ وان.
ئێك ژ وان گۆت: من تو دیتی دەما تو ژ مزگەڤتێ دەرکەفتی، و بەری تو بگەهیە مالێ، تە مقدارەکێ چاڤێن خۆ نقاندن؛ تو مە نابێژی بۆچی؟
برایێ هەژار گۆت: هزرەک بۆ من چێبوو و منژی گۆت الحمدلله ئەز نەیێ کۆرەمە. ئەگەر ئەز یێ کۆرە بام، دا چاوا شێم ب ڕێ ڤە چم؟ کا دا بێچەکێ خۆ دانمە جهێ وان، لەورا من هەردوو چاڤێن خۆ نقاندن و ب ڕێ ڤە چووم، پاشان من چاڤێن خۆ ڤەکرن و من گۆت: وهلله کارێن وان گەلەک ب زەحمەتن، الحمدلله خودایێ مەزن ئەڤ نیعمەتە چاڤان دگەل من کریە.
وان مرۆڤێن ڕەهسپی سەحکرە ئێك و دوو بێ دەنک بوون. خاترا خۆ ژ برایێ هەژار خواست و ب ڕێ کەفتن و گۆتن: والله برایێ وی ڕاست دگۆت، ڕزق ئەوە یێ خودێ لێكڤەکری و چ ژ دەستێن کەسێ ناهێت.
و دۆماهییێ، برایێ دەولەمەند ژ لۆمەیێن خەلکی خلاس بوو، برایێ هەژار هەر ما هەژار، و خەلکێ گوندی ژی تێگەهشتن کو مرۆڤان ئەو هێز و شیان نینن ڕزقی چ کەسان زێدە بکەن یان ژی کێم بکەن، چونکی خودایێ مەزن رزق یێ ل سەر هەمی بونەوەران دابەش کری…
نڤێسکار : رەحیما بەرواری
