راستیەکا تاڵ بۆ دیرۆکێ

غیاس خالد زێباری

( ئەڤ بابەتێ لرۆژا ٢٥ ێ مەها بۆری من نڤیسییە، لێ ژبەر رەوشا تایبەت و لبەرچاڤگرتنا هیڤیێن ئێکرێزیا ئالیێن کوردی، من بەڵاڤ نەکر، لێ نهۆ راگەهاندنا پەکەکێ پێشبینیا من پشتڕاستکر و هەمی هەوڵ و پشتەڤانی و بزاڤێن هەرێما کوردستانێ ب تایبەت یێن پارتی و سەرۆک بارزانی ژبیر کرن و چ نەهاتنە پێشچاڤ ) .

رەوشا رۆژئاڤایێ کوردستانێ و دەڤەرێن لبن دەستهەڵاتا ( قسد) پشتی ٦ ێ کانوونا دوویێ ٢٠٢٦، لسەر دەستێ لەشکرێ دەولەتا سووریا، کۆ رەفتارێن تیرۆرستێن داعش دئیننە بیرا مرۆڤی، چەند بەحسێ کار و رەفارێن وان یێن دژی مرۆڤایەتیێ بکەین بەرامبەر گەلێ کورد، ناهێتە دەربڕین . چونکی هەمی سنوورێن دژی مرۆڤایەتیێ و ئایینان بەزاندینە، شۆفینیێەتەکا بێ هاوتایە دژی گەل و نەتەوا کورد .
ئەو دوژمنێن گەلێ کورد و ئازادیا مرۆڤایەتیێ نە و هەر ئەڤ چەندە لێ دهێتە چاڤەڕێکرن . لێ بۆ راستیا دیرۆکێ مرۆڤ بێژیت، بەشەکێ زۆرێ فاکتەرێن ڤان کارەساتا دەستهەڵاتا بناڤ کوردییا وان دەڤەرایە کۆ پەکەکە و رێکخستنێن بن سێبەر و ئایدیۆلۆژیا وانە، چونکی ل سەرەتایا رزگاریا وان دەڤەرا لدەمێ شۆرەشا گەلێن سووریا دژی رژێما ئەسەدی، پەکەکێ ب هێزا چەکۆچ و سندانا دەستهەڵاتا خوە سەپاند و رێکخستنێن کوردی یێن نەتەوەیی و نشتیمانی دەرکرن و بارەگەهێن وان شەوتاندن و کادر و ئەندامێن وان زیندانیکرن، چ ئازادی بۆ راگەهاندنێ نەهێلان، پیرۆزیێن نەتەوەیی بنپێکرن و بێ رێزی بەرامبەر ئاڵایێ پیرۆزێ کوردستانێ کر .
د ڤان ساڵان دا پەکەکە ل ئاراستەیا نەتەوایەتیا کوردی دۆرکەفت و ب ئاشکرا درۆشم و پەیامێن نەتەوی و نشتیمانی دڕاندن و سۆتن، ل جهێ پەروەردەیا نەتەوایەتی، گەنج و سنێلە و زارۆک لسەر پەروەردەیا حزبایەتیا بەرتەسکا توند و پەروەردە کرن و دژی وەڵاتپارێزێن کورد بکارئینان و ئێکرێزی د ناڤبەرا لایەنێن سیاسی ل رۆژئاڤایێ کوردستانێ تێکدا و هەمی هەوڵ و رێکەفتنێن ئێکرێزیێ بنپێ کرن، ب تایبەت ئەوێن ب چاڤدێریا جەنابێ سەرۆک مەسعود بارزانی دهاتنە کرن .
چەندین ساڵە خەلکێ نشتیمانپەروەرێن کورد هۆشداریا مەترسیا ڤێ چەندێ لسەر پاشەرۆژا رۆژئاڤایێ کوردستانێ دیار دکەن، لێ جهێ ئێکرێزیا کوردا، پەکەکە درۆشمێ ئێکرێزیا گەلان بلند دکەن، کۆ ئەڤرۆ بوویە بەڵا سەرێ وان و گەلێ کورد.
بەشەکێ زۆرێ ڤان کارەساتێن مەزنێن بسەر کوردێن رۆژئاڤا دهێن، ژ ئەنجامێ وێ سیاسەت و رەفتارێن وانە . دەمێ مرۆڤ ڤێ راستیا تاڵ د بێژین، هەر وەکی مرۆڤ خەنجەرەکا ژەهراوی ل خۆ ددەت، لێ ئەڤە راستیە و پێدڤییە بهێتە گوتن داکۆ پەند لێ بهێنە وەرگرتن و ئەڤ روودان و کارەساتە ڤێ ئێکرێزیا خەلکێ کوردستانێ، بکەنە ئەرکەکێ نەتەوی و نشتیمانی بۆ ئێکگرتنا هێز و ئالیێن سیاسی یێن کوردستانێ ، چونکی هەتا ئێکرێزی و برایەتیا کوردی نە چەسپیت، نەشێن داخازا ئێکرێزیا گەلان بکەین، بلا هەمی ئالی پشتەڤانیا پرۆژێ سەرۆک بارزانی بین بۆ ئێکرێزیێ و برایەتیێ و بن سێبەرا ئاڵایێ کوردستانێ خەباتا رزگاریێ بکەین و دەنگ و رەنگێ ڤێ زۆردایێ بگەهینینە جیهانێ، نەک بلندکرنا ئاڵایێن حزبا د خۆنیشاندانێن جەماوەریدا ل ئەورۆپا و ئەمریکا .
بلا خۆ بێ ئۆمید نەکەین و مە باوەری هەبیت ب ئێکبوون و ئێکرێزیێ ب سەرفیرازی دێ ڤێ رەوشێ دەرباز کەین و دەستکەفتێن مەزنتر بدەست ئینین .
مە باوەری هەبیت کۆ سەرۆک بارزانی کلیلا چارەسەریا هەمی پرس و ئاستەنگا یە و ئێکبوون و ئێکڕێزی هیڤی و ئارمانجا خەلکێ کوردستانێ و دوست و پشتەڤانێن گەلێ مەیە، ئەگەر بەرجەستە ببیت . پشتەڤان و هەڤپەیمانێن بهێزێن نیڤدەولەتی ژی مە دێ هەبن .