جینوسایدا گەلێ کورد
نازی محەمەدشەریف
پەرلەمانێ فرەنسا لسەر داخازا پارتەکا ئوپوسسیون دناڤا پەرلەمانیدا کومبو لدور جینوساید ناسینا گەلێ کورد ل باشورێ کوردستانێ کو ژلایێ ئیراقێ ڤە ب دەهان جارا هاتیە قرکرن.
لێ مخابن ڤی پرۆژەی دەنگێن پيدڤی ب دەستڤە نەئینان و نەهاتە پەسەندکرن.
لێ تشتێ من دڤیت بیژم و گرنگ ئەوە کو ئەڤ پرۆژە ژ ئالێ پارتا دەستهەلادار ڤە هاتە رەدکرن کو پارتا سەروک ماکرونە و پرانیا کورسیکێ پەرلەمانی پیک دئینیت و فرەنسا کو دهێتە هژمارتن ژ دوستێن هەری نێزیکی گەلێ کورد، لێ مە دیت دەنگ نەدا پروژەکی کو ئیراق پێ بهێتە تاوانبارکرن ب جینوسایدکرنا گەلێ کورد. کو بهزرا من ئەڤە ناڤەرۆکا سیادەتێ یە و ئەڤە گوپیتکا سیاسەتێ یە.
ئەگەر ئەم ژ ئالێ ئەخلاقیڤە بەرێخوبدەینێ رەنگە کارەکێ درست نەبیت، لێ ئەگەر ئەم ژ ئالێ سیاسی ڤە بەرێخوبدەینێ کارەکێ زورێ نورمالە و پارتا دەستهەلادار رەنگە بەرژوەندیا پارتا خو و ولاتێ خۆ و زور تشت دیتر بەرچاڤ گرتبیت و پرۆژە رەدکربیت.
لەورا فەرە ئەڤە ببیتە وانەک بۆ سیاسێن مە کو گوپیتکا سیاسەتەکا سەرکەفتی پارستنا بەرژوەندين ولاتیە و د سیاسەت و دەولەتداریدا رۆلێ ئەخلاقی یێ لاوازە و ئەڤە ژی بیرا مە ل بیردوزا میکافیلی دهینیت دەمێ سیاسەت و ئەخلاقی ژیک جودا دکەت.
راستە دەولەتا فرەنسا دوستەکا نێزیکی گەلێ کوردە بەس ژبیر نەکەیەن کو د سیاسەتێ دا بەرژوەندی بەری دوستایەتیێ دهێت و هەرچەند دوو حکومەت دوست بن ژی لێ هەر ئێک بەراهیکێ بەرژوەندێن خۆ بەرچاڤ دگریت.
ئەڤە هەمی ئیماژەنە بۆ بەرپرس و ئەوێن سیاسەتێ دکەن کو ژبۆ ئاڤا کرنا دەولەتێ خالا ئێکێ یا گرنگە ئەوە کو گرنگيێ ب ناڤ مالا کوردی و ئیگرتنێ بدەن، هەتا ئەم کورد ناڤ مالا خۆ رێک نەئێخین نە فرەنسا و نەئەمریکا هیچ هێزەک نکاریت مە قورتال بکەت. ئەڤە سی سالە ئەمریکا مە دپارێزیت ژ دەستێ دەولەتێن داگیر کەر ، ئەگەر ئیک دەمژمیر پشت بدەتەمە بەسی هندێ یە کو ئیران و تورکیا تشتەکی نەهێلن بناڤێ هەرێمێ و زێدەباری ڤئ ئەڤە سی سالە ئەمریکا و هەڤپەیمان یێ گڤاشتنا ل هەرێمێ دکەن کو ئیک حکومەت و ئیک ئیدارە و ئیک لەشکر هەبیت، لێ مخابن هێشتا دەستهەلاتدارێن هەرێمێ نکارینە ڤێ راستێ قەبول بکەن. ڤجا هەکە ئەڤ دەستهەلاتدارێن مە کوردا بن و بەرژوەندێن خۆ زێدەتر ژ یت مللەتی پارێزن ڤجا بۆچی گازندا ژ فرەنسا بکەین.
٢٨/١١/٢٠٢١
- نڤیسەرێ هێژا ئەو ناڤێ تە لخارێ هاتیە نڤیسین دکاری هەموو بابەتێن خۆ بینی یێن هاتیە بەلاڤکرن سەرەدانا ناڤێ خۆ بکە …. دگەل رێز
