پتڤیە یاسایا ژینگەپارێزیا دەڤەرا بارزان ل هەمی کوردستانێ بهێتەپەیڕەو کرن

محەمەد هەسنانی

کەلتورێ ژینگەپارێزیێ ل دەڤەرا بارزان: ژ شێخ ئەحمەد بارزانی ڤە هەتا سەرۆک بارزانی و نڤشێن وی و وەلاتیێن دەڤەرا بارزان ب گشتی.

کەلتورێ ڕەسەنێ ژینگەپارێزیێ ل دەڤەرا بارزان—کو بنەغەیێ وی ژلایێ شێخ ئەحمەد بارزانی ڤە هاتیا دانان و ژلایێ سەرۆک بارزانی و نڤشێن وی ڤە بەردەوامی پێ هاتیا دان—کاریگەریەکا ئەرێنی یا بەرفرەهـ ل سەر سروشتێ دەڤەرێ هێلایە. ئەڤ ڕێبازا جوان یا ڕێزگرتنێ ژ سروشتی بوویە ئەگەرا گەشەکرن و پاراستنا ئاژەڵ و باڵندەیێن کیڤی؛ ب ئاوایەکی کو ب بێترسی ژ مرۆڤی، ئازادانە ل ناڤ گوند، شارۆچکە و ڕێکێن دەڤەرێ دچن و دهێن، ئەڤێ ژی دیمەنەکێ ناوازە و بێوێنە ب دەڤەرێ بەخشییە.

ژ لایەکێ دن ڤە، جێبەجێکرنا یاسا و ڕێنماییێن توند یێن پاراستنا دار و بار و روبەرێ سەوزاتیێ وەسا کری بێت، کو هەر شاخ و چیایەکێ ڤێ دەڤەرێ وەک دارستانەکا پرپیت بهێتە بەرتەنگێ چاڤی. گەشەکرنا دارستانان زێدەباری کو ژێدرەکا گرنگێ ساخلەمیا مرۆڤییە، ل هەمان دەم دا پەناگەهەکا ئارام و سروشتی یە بۆ ئاژەڵ و باڵندەیێن کیڤی.

ئەڤ ئەزموونا سەرکەفتی دیار کری بێت کو پێویستە یاسا و ڕێنماییێن پاراستنا ژینگەی ل دەڤەرا بارزان بۆ هەمی دەڤەرێن دن یێن کوردستانێ بهێنە ڤەگوهاستن و پەیڕەوکرن، چونکی پاراستنا ژینگەی، دیمەن و ڕوخسارەکێ سروشتیێ ناوازە ددەتە شاخ و دۆلێن کوردستانێ.
ئەوا فەرە ئاماژە پێ بهێتە دان و دڤێت وەک ئەرکەکێ نیشتمانی، پەیڕەوکرن و جێبەجێکرنا یاسا و کەلتورێ ژینگەپارێزیا دەڤەرا بارزان ل تەڤایا هەرێما کوردستانێ بهێتە جێبەجێکرن.

ئەڤ ئەزموونە تەنێ بیرۆکەیەکا تیۆری نینە، بەلکۆ مۆدێلەکێ ب کردار تاقیکری یە کو تێدا ڕێزگرتن ژ سروشتی و پاراستنا ژیانا کیڤی بوویە بەشەک ژ بەهایێن کۆمەڵایەتی یێن خەڵکێ دەڤەرێ.