حەوت ساڵی چاکسازی؛ هەڵسەنگاندنێک بۆ ئەزموونی سەرکردایەتی مەسرور بارزانی

نووسینی: علی عادل سلیم

لە سیاسەتدا، هەڵسەنگاندنی هیچ حکومەتێک نابێت تەنها بە پێوەری دروستکردنی پرۆژە یان ژمارەی دەستکەوتەکان بکرێت؛ بەڵکو دەبێت لە چوارچێوەی بارودۆخی سیاسی، ئابووری و ئاسایشی ئەو قۆناغەدا بخوێندرێتەوە. لەم ڕوانگەیەوە، حەوت ساڵی سەرکردایەتی مەسرور بارزانی وەک سەرۆکی حکومەتی هەرێمی کوردستان، شایەنی هەڵسەنگاندنێکی ورد و بابەتییە.
ئەم حەوت ساڵە لە کاتێکدا تێپەڕیون کە هەرێمی کوردستان ڕووبەڕووی هەندێک لە ئاڵۆزترین قۆناغەکانی مێژووی نوێی خۆی بوو؛ لە کێشە دارایییەکان و دابەشکردنی داهات، تا ناکۆکییە دەستوورییەکان لەگەڵ حکومەتی فیدراڵ، هەروەها گۆڕانکارییە خێراکانی ناوچە و جیهان. لە ژێر ئەم بارودۆخەدا، پاراستنی جێگیریی دامەزراوەکان و بەردەوامی لە پڕۆژەکانی چاکسازی، بە خۆی پێوانەیەکی گرنگی سەرکەوتنی حکومڕانییە.
لە ڕووی دامەزراوەییەوە، حکومەت هەوڵی دا بەڕێوەبردنی گشتی بەرەو مۆدێرنبوون ببات، خزمەتگوزارییەکان زیاتر دیجیتاڵ بکات و سیستمی دارایی بە ئاراستەی شەفافیەت و کارامەیی بگوازێتەوە. هەرچەندە ئەم پڕۆسەیە هێشتا تەواو نەبووە، بەڵام ئاراستەی گشتیی سیاسەتەکان پیشانی دەدات کە چاکسازی وەک هەڵبژاردەیەکی ستراتیژی مامەڵەی لەگەڵ کراوە، نەک وەک چارەسەری کاتی.
لە بوارەی ئابووریدا، هاندانی وەبەرهێنان، پشتگیری لە کەرتی تایبەت و هەوڵ بۆ جۆراوجۆرکردنی سەرچاوەکانی داهات، بەشێکی گرنگی ئەجێندای حکومەت بووە. ئەگەرچی ئابووریی هەرێم هێشتا کاریگەریی زۆرێک لە هۆکارە دەرەکییەکانی لەسەرە، بەڵام ئاراستەی چاکسازی و ئامادەکردنی ژینگەیەکی باشتر بۆ وەبەرهێنان، هەنگاوێکە کە دەتوانێت لە درێژخایەندا کاریگەریی خۆی نیشان بدات.
لە ئاستی پەیوەندییە نێودەوڵەتییەکانیش، هەرێمی کوردستان توانیویەتی شوێنی خۆی وەک هاوبەشێکی جێمتمانە لەگەڵ زۆرێک لە وڵاتان و دامەزراوە نێودەوڵەتییەکان پارێزێت. ئەم بابەتە، لە کاتێکدا کە ناوچە ڕووبەڕووی گۆڕانکارییە ستراتیژییەکان بوو، گرنگیی تایبەتی هەبوو.
بێگومان، هیچ ئەزموونێکی حکومڕانی لە ڕەخنە و داواکاری بۆ باشترکردن بەدور نییە. بەردەوامبوونی چاکسازی، باشترکردنی خزمەتگوزارییەکان، زیادکردنی هەلی کار و بەهێزکردنی دەسەڵاتی دامەزراوەکان، هێشتا لە گرنگترین ئەولەوییەتەکانی داهاتون. بەڵام لە هەمان کاتدا، دادپەروەرانە نییە ئەزموونێک تەنها بە کێشەکانی هەڵبسەنگێندرێت و هەنگاوەکانی بۆ گۆڕان پشتگوێ بخرێت.
دوای حەوت ساڵ، ئەوەی دەتوانرێت بوترێت ئەوەیە کە سەرکردایەتی مەسرور بارزانی هەوڵی دا چەمکی حوکمڕانی لە بەڕێوەبردنی ڕۆژانە بگوازێتەوە بۆ بیرکردنەوەی ستراتیژی، دامەزراوەسازی و چاکسازیی بەردەوام. سەرکەوتنی تەواوی ئەم دیدگایە، بێگومان، بەوە پەیوەستەیە کە لە ساڵانی داهاتوودا چەندە بتوانێت ئەم ئاراستەیە بە هەنگاوە پراکتیکییەکان بەردەوام بکات.
لە کۆتاییدا، حەوت ساڵی ڕابردوو دەکرێت وەک قۆناغێکی دانانی بناغە بۆ گۆڕان لێک بدرێتەوە، نەک وەک کۆتایی گەشتێک. ئەوەی ئێستا گرنگە، پاراستنی متمانە بە دامەزراوەکان، بەردەوامی لە چاکسازی و دروستکردنی ژینگەیەکە کە بتوانێت وەڵامی پێداویستییە گۆڕاوەکانی هاووڵاتیانی هەرێمی کوردستان بدات.