مرۆڤ د ناڤبەرا کۆیلایەتییا ژیانێ و ئیرادەیا مانێ دا
ئاوارە نێروەیی
دەمێ ئەم هزر د ڕاستییا بوونا مرۆڤی و پێگەهێ وی ا لسەر ڤێ جیهانێ دا بکەین دێ گەلەک پرسێن فەلسەفی د مێشکێ مە دا پەیدابن و هەروەها ئێک ژ کورتترین و سەرنجڕاکێشترین دەستەواژەیان ئەوە کو دبێژیت (مرۆڤی چ نینە ژبلی کۆیلەیێ ژیانێ ) .
ئەڤ گۆتنە د ناخێ خۆە دا دیتنەکا توند و ڕەشبینانە هەلگرتییە لێ بەلێ د هەمان دەم دا پەردەیێ لسەر حەقیقەتەکا تاڵ ل سەر ژیانا مە لاددەت و ئەم وەک مرۆڤ زۆرجاران هزر دکەین کو د ئازادین و خودان بڕیارین لێ د ڕاستی دا ژ دەستپێکا ڕۆژا ژدایکبوونێ تا چرکەیا دوماهییێ ئەم د بن زنجیرێن یاسایێن سروشتی و پێدڤیاتیێن بایۆلۆژی دا دژین.
وەکو دهێتە زانین چ ژ مە ب حەزا خۆ نەهاتییە سەر ڤێ دونیایێ و مە خێزان و نەتەوە و زمانێ خۆ هەلنەبژارتییە و مە چ دەستهەلات ل سەر دەمژمێرا ژیانێ نینە کو مە بەرەڤ پیریێ و مرنێ ڤە ببەت ، هەروەها پەندا پێشینیان دبێژیت (مروڤ قەدەرێ دکێشیت نەکو تهدبیرێ).
ئەڤە نیشا مە ددەت کا چەوا مرۆڤ لبەرامبەر پێلێن ڕوودانێن ژیانێ یێن بێ دەستهەلات ڕۆژانەیا مە یا پڕی زەحمەت دەربازدکەت ژ پێخەمەت دابینکرنا نان و ئاڤ و جهەکێ ئارام هەروەها ئەڤ پێدڤیاتییە مرۆڤی دکەنە خزمەتکارەکێ هەمیشەیێ کو نەچارە بژیت.
وەکو دهێتە گۆتن (کهسێ ل بن بارهكی یێ ئاگههـ ژ بارێ كهسێ دی نینه) و هەر ئێک ژ مە د بن بارێ مەرجێن ژیانا خۆ دا یێ چەمیایە بتنێ پێخەمەت مانا خوە ، هەروەها وەکی دهێتە زانین کو هێزا هزری و ئیرادەیا مرۆڤی دشێت واتا و جوانییێ بدەتە ڤێ هەبوونێ و مرۆڤ نە یاخیبوویەکێ بێدەنگەبەلکو ئەو یێ خودان شیانە د ناڤ ڤی شەرێ مان و نەمانێ دا و حەژێکرنێ و زانستی دا .
ئارمانجا مە د ژیانێ ئەوە کو ئەم یاسایێن گەردوونی بشکێنین چونکی ئەڤە ژ دەستهەلاتا مە دویرە بەلکو ئارمانجا مە ئەوە کو د ناڤ ڤان مەرجێن سەپاندی د ب کەرامەت بژین و شوێنپەنجەکا جوان ل دویڤ خۆ بهێلین.
چونکی ئەوا بوو مرۆڤی دمینیت بتنێ کار و ناڤێ وی و چاکیێن وینە
ب کورتی مرۆڤ ڕەنگە کۆیلەیێ مەرجێن ژیانێ بیت لێ بەلێ خودانێ ئازادییا ناخی و هزری یە و هەروەها ئەڤ فەلسەفەیە مە فێر دکەت کو پاشایێ چارەنووسێ خۆ بین و د ناڤ بێدەنگییا گەردوونی دا و دەنگێ خۆ یێ مرۆڤایەتییێ بلند بکەین.
