دیوانا چرا ژ دایك بوو

دیوانا چرا، ژ كۆمەكا هەڵبەستێن زارۆكان پێكهاتییە، ل ڕۆژا 1/6/2026 كو ڕۆژا جیهانی یا زارۆكان بوو، ژ لایێ ناڤەندا خانی ڤە ل دهۆك هاتە چاپكرن و كەفتە بەر دەستێن زارۆكێن چاڤگەش. هەڵبەستێن دیوانا چرا ب زمانەكێ خۆش و سادە هاتینە نڤیسین و دەربڕینێ ژ زۆر مژاران دكەن، مینا ڤیانا وەلاتی، ڤیانا خاندنێ، ڤیانا پەرتووكێ، ڤیانا پێشكەفتنێ، ڤیانا زمانی، ڤیانا دایباب و مامۆستایان، ڤیانا گیانەوەران، ڤیانا سروشتی، ڤیانا ژینگەهێ، ڤیانا یاریكرنێ و هەڤاڵینییێ و …هیتر.
هەڵبەت هەكە ئاوازێن خۆش بۆ ڤان هەڵبەستان بهێنە دانان، ئەز باوەرم دێ كاریگەرییەكا زۆر ل سەر دل و دەروونێن زارۆكان هەبیت، ژ بەركۆ ب زمانەكێ سادە و ساكار و خۆش هاتینە ڤەهاندن و ب ساناهینە بۆ ژبەركرنێ، لەوما هیڤیدارم ئەڤ هەڵبەستە ببنە چرایەكێ گەش بۆ ساهیكرنا ژیانا زارۆكێن مە یێن خۆشتڤی.
هەڵبەت هەتا نها ژ بلی دیوانا چرا، من سێ بەرهەمێن دی ژی بۆ زارۆكان چاپكرینە، بناڤێ (ئەڵند)،(سەرهاتییا هرچێ و جوتیاری) و (خاڵخالۆك).
ل دیماهیكێ ئەز ب فەر دزانم سوپاسییا ناڤەندا خانی بكەم، بۆ چاپكرنا ڤێ دیوانێ، هەروەسا سوپاسییا ڕادیۆیا دهۆك و ماڵپەڕێ زییێ بادینان ژی دكەم بۆ گرنگیدانا وان ب دیوانا چرا.
نموونەك ژ هەڵبەستێن دیوانا چرا

چرا
زارۆکێن پاشەڕۆژێ
پێشكەڤن ڕۆژ بۆ ڕۆژێ
بگرن ڕێکا خواندنێ
زانین و پێشکەفتنێ
زانست بۆ وە چرایە
ڕەوشا هەمی درایە
بۆ ژینێ زۆرا فەرە
خڕ دەما تاجێ سەرە
ب زانست و زانینێ
نەهێلن نەزانینێ
ب ڕێکا خامە و پەیڤێ
هەڕنە سەر بانێ هەیڤێ
خۆ فێرکەنە زانستی
وەرنە قادێ ب تستی
ل مەیدانێ ئازابن
زیرەک و شارەزابن
نەمینن دیل و بن دەست
بژین ئازاد و سەربەست

هەڵبەستڤان
محەمەدساڵح پێندرۆیی (جگەرسۆز)
1/6/2026