سەرۆک نێچیرڤان بارزانی دگەل پەرلەمانتارێن مەسیحی کۆمبوو.

د دەستپێکا دیدارێن روژا دووێ یا سەرەدانا خۆ دا بۆ بەغدا، سپێدەهیا ئەڤڕۆ سێشەمبی 2026/5/5، رێزدار نێچیرڤان بارزانی، سەرۆکێ هەرێما کوردستانێ، دگەل پەرلەمانتارێن پێکهاتا مەسیحی ل ئەنجوومەنێ نووێنەرێن عێراقێ کۆمبوو.

د کۆمبوونێ دا، بارودۆخێ مەسیحییان و نووێنەرایەتیا سیاسی یا پێکهاتان هاتە بەحسکرن. سەرۆک نێچیرڤان بارزانی جەخت ل سەر هندێ کر کو مەسیحی پێکهاتەکێ رەسەن یێ عێراقێ و هەرێما کوردستانێنە و رۆڵێ وان یێ مێژوویی و شارستانی بلند نرخاند.

هەروەسا دوپات کر کو پێدڤییە د کابینەیا بهێت یا حکوومەتا فیدرالی یا عێراقێ دا ب پۆستێن وەزاری پشکدار بن، و کار بۆ پێشڤەبرنا کولتوورێ پێکڤەژیانێ، لێبۆردەیی و ئێکودو قبوولکرنێ بهێتە کرن وەکی بنەمایەکێ سەرەکی بۆ سەقامگیریا وەلاتی.

هەر دوو ئالی هەڤرا بوون کو دڤێت بزاڤ بۆ چەسپاندنا هەڤپشکی و یەکسانیێ بەردەوام بن، ب شێوەیەکی کو هەمی پێکهاتە بگەهنە ماف و شایستەیێن خۆ یێن دەستووری. د ڤی واری دا، سەرۆک نێچیرڤان بارزانی پشتەڤانیا تەمام یا هەرێما کوردستانێ بۆ پاراستنا مافێن مەسیحییان و دابینکرنا ژیانەکا شایستە بۆ وان دوپات کر.

ژ لایێ خۆ ڤە، پەرلەمانتارێن مەسیحی سوپاسیا هەلوێستێن بەردەوام یێن سەرۆک نێچیرڤان بارزانی کر بۆ بەرەڤانیکرن ژ مافێن پێکهاتان و پاراستنا فرەیی و تەباییێ ل هەرێما کوردستانێ و عێراقێ.