ڕەوشت ناسنامەیا ڕاستەقینە یا مرۆڤیە…
ئاوارە نێروەیی
د جیهانەکا تژی دا ژ پێشکەفتنا تەکنەلۆژیا و داهێنانێن زانستی، کو ڕۆژ بۆ ڕۆژێ تشتێن نوی جهێ تشتێن کەڤن دگرن، هندەک بنەما هەنە چ جاران کەڤن نابن و تۆز ناگریتە سەر بهایێ وان. ل سەری هەمییان “ڕەوشتێ جوانە”؛ ئەو کانیا کو چو جاران چکمە نابیت و بهایێ مرۆڤی پێ دهێتە کێشان ڕەوشت بتنێ پەیڤ و دروشم نینن د پەرتۆکان دا بەلکو ئەو “کردارن” و د مەیدانا ژیانێ دا خۆ دیار دکەن ڕەوشت نیشانا بلندیا کەسایەتیا مرۆڤی و ئاستێ هۆشمەندیا وی یە.
بنەمایێ ڕێزگرتنێ:
یا ئێکێ، ڕێزگرتنە کو بنەمایێ هەر پەیوەندیەکا سەرکەفتی و جڤاکەکێ ساخلەمە. دەمێ تو ڕێزێ ل بچووکان دگری وەک میهرەبانی، و ڕێزێ ل مەزنان دگری وەک وەفاداری، هەروەسا د ڕاستی دا وێنەیەکێ جوان و گەش ژ پەروەردەیا خێزانا خۆ و رەسەناتیا خۆ نیشانی جیهانێ ددەی.
مرۆڤێ ب ڕەوشت ئەو نینە یێ ب هێزا زەندکا یان ب پلە و پۆست و پارێ خۆ شانازیێ ل سەر خەلکی بکەت و وان ب چاڤەکێ کێم ببینیت بەلکو مرۆڤێ مەزن ئەو کەسە یێ کو ب دلەکێ مەزن ب سینگەکێ فرەهـ و ب زمانەکێ شرین و پڕی رێز سەرەدەریێ دگەل دەوروبەرێن خۆ دکەت هێزا ڕاستەقینە د دل نزماتیێ دایە نەک د خۆ مەزنکرنێ دا.
ستوونێن ڕاستگۆیی و دلسۆزیێ:
هەروەسا، دلسۆزی و ڕاستگۆیی دوو ستوونێن سەرەکی و ب هێزن د جیهانا کار و ژیانا رۆژانە یا هەر مرۆڤەکی دا د جڤاکەکێ دا کو بەرژەوندیێن ماددی زال بووین باوەری ب تنێ ب ڕێکا ڕاستگۆییێ دهێتە ئاڤا کرن. مرۆڤێ ڕاستگۆ دبیتە جهێ پشتراستیا هەمی کەسان ئەو وەک مروارییەکا گران بهایە د ناڤ جڤاکیدا کو خودان سەنگ و کێش و رێزە دلسۆزی د کار دا نیشانا ویژدانەکێ زیندی یە و ئەڤە ژی لۆتکەیا ڕەوشت بەرزیێ یە.
جوانییا هەمی ژیانێ:
د دوماهیێ دا ڕەوشت وەک بهێن خۆشیا گولێ یە هەر چەند تو وێ گولێ ڤەشێری بهێنا وێ یا ناسک دێ هەر دەرکەڤیت و هەمی جهی گریت ئاڤاکرنا کەسایەتییەکا ب ڕەوشت ژ هەر ئاڤاهیەکێ تەلارسازی یێ بلندتر و جوانترە چونکی ئاڤاهی دێ هەر ڕۆژەکێ دا کەڤن بن و هەرڤن بەلێ ناڤ و دەنگێ ب ڕەوشت دێ بۆ هەتا هەتایێ مینیت.
وەک دهێتە گۆتن: “جوانی یا دەمی یە بەلێ ڕەوشت یێ هەمی ژیانێ یە.” بلا ڕەوشتێ مە ببیتە ناسنامەیا مە دا کو ل هەر جهێ لێ بین بهێنا مە یا خوش و شوون تبلێن مە یێن ئەرێنی ل دویڤ مە بمینن بوو هەتا هەتایێ.
