هۆشدارییەک ژ سەقاناسییا هەرێمێ بۆ وەلاتییان
🔴 هۆشدارییەک ژ سەقاناسییا هەرێمێ بۆ وەلاتییان
ڕێڤەبەرییا گشتی یا سەقاناسی و بوومەلەرزەزانی ل هەرێما کوردستانێ هۆشداریێ ددەت و ڕادگەهینیت: “کارتێکرنا پێلەکا بارانبارینا ب هێز دێ ل سەر دەڤەرێن مە هەبیت د ناڤبەرا ڕۆژێن ٢٥ تا ٢٧ی ئادارا ٢٠٢٦”.
ئەڤرۆ سێشەمبی ٢٤ی ئادارا ٢٠٢٦، سەقاناسییا هەرێمێ ڕاگەهاند: “ل دویڤ دوماهیک نەخشەیێن سەقای و د ئەنجامێ ئێکگرتنا نزمە پەستانا دەریایا ناڤەڕاست دگەل بارستە هەوایەکێ سار د چینێن سەری یێن هەوای دا، ئەڤە دێ بیتە ئەگەرێ دروستبوونا نەجێگیرییا سەقای ل دەڤەرێن مە کو دێ بۆ چەند ڕۆژان یا بەردەوام بیت”.
هەروەسا هاتییە دیارکرن: “هەرێما کوردستانێ کەفتییە بن کارتێکرنا پێلەکا بارانبارینێ ب شێوەیێ بارانەکا نەرم و مامناڤەند، و هندەک جاران ژی بارانەکا ب هێز (لێزمە) دگەل هەورەبروسکە و تەرزێ بۆ ماوەیەکێ کورت، ئەڤە ژی دێ بیتە ئەگەرێ بلندبوونا ئاستێ ئاڤێ د هندەک دەمان دا و ئاستەنگان بۆ هاتنوچوونێ دروست کەت”.
