ڕەمەزان: گەشتەکا پیرۆز بۆ ساخلەمیا تەنی و دەروونی

نڤیسین “ئەدیبا عزەددین تاهر”

​مەها ڕەمەزانێ بتنێ وەرزەکێ پەرستنێ نینە، بەلکو وەرچەرخانەکا سالانە یە کو مرۆڤی د هەمی لایەنەکێ ڕا نوی دکەتەڤە. ئەگەر ئەم ل ڕەمەزانێ بنێرن، دێ بینین کو هاوسەنگیەکا بێ وێنە د ناڤبەرا فەرمانێن خودێ و پێدڤیێن جەستەیی دا هەیە.
​لایەنێ ئایینی: پاقژکرنا دەروونی
​ژ لایێ ئایینی ڤە، ڕەمەزان قوتابخانەیا تەقوایێ یە. وەک خودێ د قورئانا پیرۆز دا دبیژیت: “لعلکم تتقون” (دا کو هوین ببینە خودێ ترس).
​پەروەردەکرنا نەفسێ: ڕۆژیگرتن مرۆڤی فێری خۆڕاگریێ دکەت بەرامبەر ئارەزوویان، نەک هەر خوارن و ڤەخوارن، بەلکو دویرکەفتن ژ ئاخفتنا خراب و کریارێن نەپەسند.
​هەستێ مرۆڤایەتیێ: ڕەمەزان دلێ دەولەمەندی ل سەر هەژاری نەرم دکەت. برسیبوون دبیتە پرەک بۆ هەستکرن ب ئازارێن یێن دی، کو ئەڤە ژی لایەنێ سۆزداری و جڤاکی یێ مرۆڤی بەرهێز دکەت.
​لایەنێ زانستی: ساخلەمیا جەستەیی
​زانستێ نوی یێ پزیشکی ب سەرهاتیەکا سەرسۆرهێنەر ل سەر مفایێن ڕۆژیێ دئاخڤیت. زانایێ ژاپۆنی (یۆشینۆری ئۆسۆمی) خەلاتێ نۆبڵ وەرگرت بۆ دیتنا پرۆسەیا Autophagy (خۆخوارنا خانەیان).
​نووژەنکرنا خانەیان: دەمێ مروڤ بۆ ماوەیەکێ درێژ برسی دبیت، جەستە دەست دکەت ب ژناڤبرنا خانەیێن پیر و نەساخ و ژەهراوی، و ل جهێ وان خانەیێن گەنج و ساخلەم دروست دکەت.
​پاقژکرنا کۆئەندامێ هەرشێ: گەدە و جەرگ دەمەکێ وەردگرن بۆ پشێویا ژ کارێ بەردەوام، کو ئەڤە دبیتە ئەگەرێ کێمبوونا هەوکردنێ (Inflammation) د جەستەی دا.
​چالاککرنا مێشکی: ڕۆژیگرتن ئاستێ کێمبوونا فشارا دەروونی و زێدەبوونا تەرکیزێ پەیدا دکەت، چونکە جەستە وزەیێ ل جهێ هەرشێ، بۆ کارێن مێشکی و سیستەمێ بەرگریێ ب کار دئینیت.
​
​ڕەمەزان دیاریەکا خودایی یە؛ لایەنێ وێ یێ ئایینی روحێ پاقژ دکەت، و لایەنێ وێ یێ زانستی جەستەی نووژەن دکەت. مروڤێ ژیر ئەوە یێ بشێت ڤان هەردوو لایەنان دگەل ئێک بگونجینیت، ب شێوەیەکێ کو ل دوماهیا مەهێ نە هەر تەنێ خێر و پاداشت، بەلکو جەستەیەکێ ساخلەمتر ژی ب دەست بئێخیت.
زاخۆ /٢٠٢٦