ئاخ و ڕەهـ: پەیاما کوردان.

کەوسەر شەوکەت

د نوکە دا هەبوونا کوردان، چەپەرێ دووماهییێ یە دژی میکانیزمبوونا ڕۆحێ. ب درێژاهییا دیرۆکێ پشتبەستنا کوردان ب چیایان، دیسان ئەو پەیوەندییا وجوودی یا مرۆڤێ کورد ب چیای ڤە گرێدەت، نە بتنێ ستراتیژییەکا سەربازییە بۆ ڕەڤینێ ژ مرن و نەمانێ، بەلکی ڕێورەسمەکێ پیرۆزە، هەرجار ئەڤ ڕێورەسمە بۆ دوبارە ڤەژاندنا ژیانێ بوویە. چیا د مەژیێ کوردان دا ڕەمزێ سەربەخویێ یە، لێ نەبتنێ سەربەخوییا سیاسی و جوگرافی، بەلکی سەربەخوییا ڕۆحێ؛ ئەڤ سەربەخوییە ڕێکێ نادەت مرۆڤایەتی ژبیر بکەت،کا وژدان چەوان دلڤیت.
د سەردەمێ نوو دا، جیهان یا پێنگاڤێن خۆ بەر ب قوناغا “پاش ـ مرۆڤی” دهاڤێژیت، ئەو نەمایە سیستەمێ نووی دوماهییێ ب مرۆڤبوونی بینیت. د ئەڤێ قوناغێ دا، شارستانیەت گەهشتیە تاریترین پلەیا خۆ، کو ب تەمامی ڕادەستا ئەقلێ تەکنیکی و سنۆردارە؛ ئەڤ ئەقلە بتنێ ب زمانێ مفای دئاخڤیت. ل ناڤ ڤی تێگەهشتنا ڤی ئەقلی، هەگەر دارەکێ ژی مفایێ خۆ یێ ماددی نەبیت، دێ بڕیت، پا ب ڤێ دیتنێ هەگەر مللەتەک د هاوکێشەیا هێزێ دا نەبیت، دێ چارەنڤیسێ وی چ بیت!؟ هەلبەت دێ ژ ناڤ بەت، بێی هزرێ بۆ تشتەکێ دیتر بکەت.
ئاها ل ناڤ ئەڤی بازنەیێ، کو ب تەمامی تاریی بووی، پێناسەیا کوردان؛ نە مللەتەکێ بێ دەولەتن، بەلکی “زێرڤانێن فترەتێ” نە! فترەتا مرۆڤێ ڕەسەن، خودانێن پەیامەکا زیندی نە، ئەو پەیاما جیهان د سەکەراتا ڕۆحێ دایە و پێدڤی پێ هەیە، بۆ دوبارە ڤەژاندنا لایەنێ ڕۆحی.
هەر کوردەک ب ڕۆحا خۆ یا ڕەسەن دبێژتە جیهانێ، مرۆڤ بێی “ئاخ” و “ڕەهـ” دبیتە هەبوونەکا بەرزە و بێواتا. کوردبوون دوپاتییە کو هەبوونا مرۆڤی ب خۆ پیرۆزییە، ئەڤ پیرۆزییە گرێدای مفایێ ئابوری و سیاسی نینە.
ئەڤرۆ جیهان پتر ژ هەر سەردەمەکی پێدڤی ب ڤێ ڕۆحێ هەیە، هەگەر ئەڤ ڕۆحە ب وێ زیندبوون و جوانییێ نەمینیت، جیهان بتنێ گۆڕستانەکا تەکنۆلۆژییا مەزنە.
مانا کوردان، بیردانکەکا زیندی یە بۆ پاراستنا مرۆڤبوونا ڕەسەن. هەرجار ل شوونا کو جیهان کوردان فێر بکەت، کا دەولەت چییە، یان فشارێ بێخیتە سەر “یان دەولەت یان نەمان”. نها هەر کوردەک ل جهێ خۆ، یێ جیهانێ فێردکەن کو مرۆڤایەتی نە پرۆسەیەکا تەکنیكی یە، بەلکی لێدانا دلەکی یە ل سەر ئاخەکێ. کورد ب مانا خۆ دوپات دکەن، ئەو پەیامبەرێن وێ ڕاستیێ نە کو پەیوەندییا دگەل ئەردی، جوانی و ڕەسەنایەتی و ئێکانە ڕێکا مانێ یە د سەردەمێ مەکینەیێن بێ ڕۆح دا.